சனியே வருக

சனிஸ்வரன். நவக்கிரகங்களுள் ஈஸ்வரன் பட்டம் பெற்ற ஒரே ஆள் சனி மட்டும்தான். சனி கருமை நிறமானவர். காகத்தை வாகனமாக கொண்டவர். எள் வைத்து வழிபடுபவர்களின் தொல்லைகளைப் போக்குபவர். வன்னி இலைகளை விரும்பி ஏற்பவர். மகர, கும்ப இராசிகளின் நாயகன்.

நமக்குப் பிரியமானவர்களை இன்முகத்துடன் வரவேற்பது நமது பழக்கம். அதிலும் மதுரைக்காரர்கள் ரொம்ப பாசமானவர்கள். வரவேற்க சுவர் விளம்பரம், சுவரொட்டி, பதாகை என பட்டையக் கிளப்பிவிடுவர். துலாமிலிருந்து விருட்சிகத்திற்கு வரும் என் இராசிநாதனான சனிபகவானை மதுரைக்காரனான நானும் சிறப்பாக வரவேற்க வேண்டுமல்லவா? அதற்காகத்தான் இந்தப் பதிவு.

எல்லோரையும் சனிக்குப் பிடிக்கும். அதனால்தானோ என்னவோ சனியை எல்லோருக்கும் பிடிக்காது. சனி அவரவர் செயல்களுக்கு ஏற்ப நியாயத்தீர்ப்பு வழங்கும் தர்மவான். நாம் நற்செயல்களை செய்தால்தானே நல்லதை எதிர்பார்க்க முடியும்?. சனி குறித்து ஒரு பழமொழி உண்டு ‘சனி போல கொடுப்பவரும் இல்லை, சனி போல கெடுப்பவரும் இல்லை’. ஆனால், நாம் தப்பு செய்பவர்களை திட்டும்போது ‘சனியன் பிடிச்சவன்’ எனத் திட்டுகிறோம். சனி தப்பு செய்பவர்களுக்குத்தான் கெடுபலன்களைத்தருவார். சனி, நல்லவனுக்கு நல்லவர். கெட்டவர்க்கு அவர்களை விடக் கெட்டவர்.

சனியின் வாகனமான காகம், அவருக்கு பிடித்த எள் எனும் தானியம், வன்னி மரம் இவைகளைக் கூர்ந்து கவனித்தால் சனியைப் புரிந்து மகிழ்வூட்டலாம். காகம் கூடி வாழும் பறவை. தனியே உண்ணாது. ஆகாயத்தை சுத்தம் செய்வதோடல்லாமல் பூமியிலுள்ள அழுக்குகளையும் தின்று சுத்தம் செய்கிறது. எள் மிகவும் சத்து வாய்ந்தது. இளைத்தவனுக்கு எள்ளைக் கொடு, கொழுத்தவனுக்கு கொள்ளைக் கொடு என்றொரு பழமொழி உண்டு. இதிலிருந்து எள்ளை எளிதாக எள்ளி நகையாடக்கூடாது என அறியலாம். வன்னி மரத்தின் மீது இடிவிழாது என்ற நம்பிக்கை உள்ளது. பாண்டவர்கள் அஞ்ஞாத வாசத்தின்போது வன்னிமரத்தில்தான் தங்களது ஆயுதங்களை வைத்துச் செல்வார்கள் எனக் கதை கேட்டிருக்கிறேன். வன்னி இலைகள் நல்லதொரு மருந்து.

சனியின் பார்வை யாருக்கெல்லாம் தீங்காக அமையும் எனப் பார்க்கலாம். குழுவாக சேர்ந்து செயல்படாமல் தான்தோன்றித்தனமாக முடிவெடுத்து நிறையப் பேருக்கு கெடுதல் செய்பவர்களை, தனக்கென அதிகமாக சேமித்து வைக்கும் கருமிகளை, நீர்நிலைகளை நாசம் செய்பவர்களை, மரங்களை வெட்டி காயப்படுத்துபவர்களை, ஒருமுறை பயன்படுத்து பிறகு தூக்கியெறி  என USE AND THROW கலாச்சாரத்தில் இருப்பவர்களை, குறைந்த சம்பளம் கொடுத்து ஊழியர்களை கொத்தடிமைபோல் நடத்தும் முதலாளிகளை, மக்களை ஏமாற்றும் அரசியல்வாதிகளை, மது மயக்கத்தில் மயங்கி தன்னையும் சுற்றத்தையும் நாசப்படுத்துபவர்களை, இயற்கையைப் பாழ்படுத்துபவர்களை எல்லாம் சனி ஒருவழி படுத்தியெடுத்துவிடுவார். மேற்கண்டவாறு செயல்படுபவர்களுக்கு ஏழரை ஆண்டுகள் அல்ல ஆயுளுக்கும் கெடுதலையே செய்வார்.

SATURN copy

சனிக்கு பிரியமானவராக யாரெல்லாம் திகழ முடியும் எனப் பார்க்கலாம். சாதி&மதம் பார்க்காமல் பழகுபவர்களை, நிழல்தரும் மரங்களை வளர்ப்பவர்களை, நீர்நிலைகளை சுத்தம் செய்பவர்களை, தொன்மையைப் பாதுகாப்பவர்களை, நேர்மையாக நடப்பவர்களை, பிறர் துன்பத்தை துடைக்க உதவிக்கரம் நீட்டுபவர்களை, கற்பதோடல்லாமல் அதைப் புரிந்து கொண்டு நடப்பவர்களையெல்லாம் சனிக்கு மிகவும் பிடிக்கும். பிடித்தமானவர்களுக்கு சனிபகவான் நல்லதையே செய்வார். அவர்களுக்கு வரும் தடைகளை தானே முன்நின்று தடுப்பார்.

சனிப்பெயர்ச்சிக்கு பரிகாரம் செய்வது மிகவும் எளிது. அரசுப்பள்ளி மாணவர்களுக்கு புத்தாடை எடுத்துக் கொடுப்பது, அவர்களுக்கு சத்தான எள்ளுருண்டை, கடலைமிட்டாய், சிறுதானியத் தின்பண்டங்கள் வாங்கிக் கொடுப்பது, நம் பகுதியில் ஒரிரு மரங்களை நட்டாலும் அவை நன்றாக வளரும்படி பாதுகாப்பது, பிளாஸ்டிக் பைகளைப் பயன்படுத்தாமல் துணிப் பைகளைப் பயன்படுத்துவது, நம் பகுதியில் சிறிய நூலகம் அமைப்பது, பொதுக் கழிப்பிடங்களை கட்டி விடுவது, எதற்கெடுத்தாலும் அலோபதியின் பின் ஓடாமல் பாரம்பரிய மருத்துவத்தையோ அல்லது மாற்று மருத்துவத்தையோ பின்பற்றுவது, நம் பண்டைய உணவு முறைகளை ஏற்பது என நிறைய வழிகள் உண்டு. எல்லாவற்றையும் கொஞ்சம் முயற்சி எடுத்து செய்தால் சனி மட்டுமல்ல நவக்கிரகங்களும் உங்களுக்கு நன்மையையே செய்யும். சனிப் பெயர்ச்சி பலன்கள், குரு பெயர்ச்சி பலன்கள், இராகு-கேது பெயர்ச்சி பலன்கள், 2015 புத்தாண்டு பலன்கள் என எதைப் படித்தாலும் இந்தப் பதிவில் உள்ளதை கொஞ்சம் நினைவில் வையுங்கள். என்னுடைய எல்லாப் பதிவுகளையும் படிப்பவர்களுக்கு சனி இன்னும் நற்பலன்களைத் தருவார். (சும்மா ஒரு விளம்பரம்)

மேட்டூர்நீர்த்தேக்கம்.

முப்பாட்டன் காலம் தொட்டு முப்போகம் யாராலே?
கல் மேடு தாண்டிவரும் காவேரி நீராலே!
சேத்தொட சேர்ந்த விதை நாத்து விடாதா!
நாத்தோடு செய்தி சொல்ல காற்று வராதா!

செவ்வாழ செங்கரும்பு ஜாதி மல்லி தோட்டம்தான்!
எல்லாமே இங்கிருக்க ஏதும் இல்லை வாட்டம்தான்!
நம்ம சொர்க்கம் என்பது மண்ணில் உள்ளது வானில் இல்லையடி!
நம்ம இன்பம் என்பது கண்ணில் உள்ளது கனவில் இல்லையடி

- கவிஞர் வாலி, மகாநதி

மதுரையைத் தாண்டி பயணித்து வெகுநாட்களாயிற்று. ஊர்சுற்றுவதற்கு எப்போதாவதுதான் வாய்க்கிறது. சமீபத்தில் ஒரு திருமணநிகழ்விற்கு கலந்து கொள்வதற்காக சகோதரர் வெள்ளியன்று சேலம் வந்தார். ஞாயிற்றுக்கிழமை இருவருமே கோயம்புத்தூரில் இன்னொரு விசேசத்திற்கு கலந்து கொள்ள வேண்டிய சூழல் இருந்தது. ‘சேலத்திற்கு வா இங்கிருந்து கோயம்புத்தூர் போகலா’மென அண்ணன் அழைக்க வெள்ளியன்று இரவு மதுரையிலிருந்து கிளம்பி சனிக்கிழமை அதிகாலை சேலம் சென்றேன்.

திருச்செங்கோடு போவதாகத்தான் திட்டம். மலைமேல் உள்ள கோயிலென்பதால் நாங்கள் செல்லும் நேரம் நடைசார்த்திவிட்டால் சிரமமென்று தாரமங்கலம் சிவன் கோயில் போகலாமென்று முடிவெடுத்தோம். தாரமங்கலம் நோக்கி நகரப்பேருந்தில் பயணித்தோம். சேலத்தை வேடிக்கைப் பார்த்துக் கொண்டே சென்றேன்.

Tharamangalam Assorted 2

தாரமங்கலம் பேருந்து நிலையத்தில் இறங்கி நுழைவாயிலுக்கு எதிரேயுள்ள கோயிலை நோக்கி நடந்தோம். கோயிலின் பின்வாசல் என்பதால் அப்பகுதியில் கூட்டமில்லை. வெளிப்பிரகாரத்தைச் சுற்றி சன்னதிக்குள் நுழைந்தோம். கைலாசநாதராக வீற்றிருக்கும் சிவபெருமானை வணங்கினோம். அம்மனை வழிபட்டு உட்பிரகாரத்தைச் சுற்றி வந்தோம். ஒவ்வொரு தூணிலும் உள்ள சிற்பங்கள் கண்கொள்ளா காட்சி தருபவை. நடராஜர் சன்னதிக்கு அருகில் உள்ள ஊர்த்துவத்தாண்டவர், சிவனும் அம்பிகையும் ஊடல் கொண்ட சிற்பம் அதற்கடுத்த தூணில் ஊடல் தணிந்திருக்கும் சிற்பம், ஜூரகேஸ்வரர், ரிஷபவாகனர், ரதி, மன்மதன், மோகினி, மாணிக்கவாசகர், திருஞானசம்பந்தர் என ஒவ்வொரு தூணிலும் உள்ள சிற்பங்களைப் பார்த்துக் கொண்டேயிருக்கலாம். அவ்வளவு அழகு.

Tharamangalam Assorted

அந்தக்காலத்தில் இப்பகுதியிலுள்ள சிற்பிகள் கோயில் சிற்பங்கள் செய்யும் பணியேற்கும்போது ‘தாரமங்கலம், தாடிக்கொம்பு நீங்கலாக’ என்று சொல்லித்தான் வேலையை ஒப்புக் கொள்வார்களாம். அந்தளவிற்கு இங்குள்ள சிற்பங்கள் மிக நேர்த்தியாக உள்ளன. தாடிக்கொம்பிற்கு நானும், சகோதரரும் சிறுமலையில் எஸ்.ராமகிருஷ்ணனின் நாவல் முகாமிற்கு சென்றுவிட்டு வருகையில் பார்த்துவிட்டு வந்தோம். அங்குள்ள சிற்பங்களும் மிக அழகானவை. என்ன நிழற்படம் எடுக்க இருஇடங்களிலும் அனுமதி கிட்டவில்லை.

ரதி சிலையிலிருந்து பார்த்தால் மன்மதனும், மன்மதன் சிலையிலிருந்து பார்த்தால் ரதியும் தெரியும் படி சிற்பத்தை அமைத்திருக்கிறார்கள். பாதாளலிங்க சன்னதியொன்று உள்ளது. அதிலிருந்து பார்த்தபோது அங்கொருவர் புல்லாங்குழல் வாசித்துக் கொண்டிருந்தார். நடைசாத்தும் நேரமென்பதால் உடனே கிளம்பிவிட்டோம். சன்னதிக்குள் நுழையும் முன்புள்ள வாசலில் உள்ள சிற்பங்களை கம்பிவலை வைத்து அடைத்திருக்கிறார்கள். அதிலுள்ள சிற்பங்கள் புகழ்பெற்றவை. அதிலொரு சிற்பத்தில் சிம்மத்தின் வாயினுள் உருளையான பந்து ஒன்றுள்ளது. எப்படி அதை உள்ளே வைத்தார்கள் என்றே தெரியவில்லை.

வெளிக்கோபுரத்திற்கு செல்லும்முன் இருபுறமும் இரண்டு சன்னதிகள் உள்ளன. அதில் ஒன்றில் சகஸ்ரலிங்கம் உள்ளது. இந்த சன்னதிகள் மிகப்பழமையானதாக உள்ளது. இக்கோயில் ஆயிரம் வருடங்கள் பழமையானதாகயிருக்கலாம். பல்வேறு காலகட்டங்களை இக்கோயிலுள் சுற்றி வரும்போது அறியலாம். கோயிலுக்கு வெளியே இக்கோயில் தேர் நிற்கிறது. அருமையான மரவேலைப்பாடுகள் கொண்டது. இக்கோயில் குறித்து தமிழ்விக்கிபீடியா மற்றும் ஜெயமோகன் தளத்தினுள்ள ஒரு கட்டுரை வாயிலாக மேலும் அறிந்து கொண்டேன். பேருந்துநிலையித்திலிருந்து பார்க்கும்போது சமீபத்தில் கட்டிக்கொண்டிருக்கும் நந்தி இக்கோயில் சிற்பங்களுக்கு திருஷ்டி போல உள்ளது.


தாரமங்கலத்திலிருந்து மேட்டூர் அணை பார்க்கச் செல்லலாமென நினைத்தோம். பேருந்துக்காக காத்திருந்தோம். மேட்டூர் RS என்று போட்டு வந்த வண்டி ஊரெல்லாம் சுத்திப்போகுமாம். (RSன்னா Railway Stationனாம்). அதனால் வேறு வண்டிக்காக காத்திருந்தோம். மேட்டூர் வண்டி ஒன்று வந்தது. கூட்டம் கொஞ்சம் குறைவாகயிருந்தது. ஏறி அமர்ந்தோம். லேசாக சொக்கியது. மதிய உணவாக கல்யாணவீட்டில் கொடுத்த லட்டும், சேவும் அமைந்தது.

CIMG0888

நீரோவியம்மேட்டூர் பேருந்து நிலையத்தில் இறங்கி அணை நோக்கி நடந்தோம். பேருந்து நிலையத்திலிருந்து இரண்டு கிலோமீட்டர் இருக்கலாம். அணையை மேலே ஏறிப்பார்க்க அனுமதி கிடையாதாம்.

என்ன செய்வதென யோசித்த போது அங்கிருந்து பவளவிழா கோபுரம் சென்றால் நீர்நிரம்பியிருப்பதைப் பார்க்கலாமென்று சொன்னார்கள். இரண்டு கிலோமீட்டர் தூரம் இருக்குமென்றதால் ஆட்டோவில் சென்றோம்.

பவளவிழா கோபுரத்திலேறி மேட்டூர் அணையைப் பார்க்க படியேறிச்சென்றால் ஐந்து ரூபாய், மின்தானியங்கியில் சென்றால் இருபது ரூபாய். படியேறியே சென்றோம்.

கீழ்தளத்தில் அணை கட்டப்பட்ட காலத்தில் எடுக்கப்பட்ட படங்களை காட்சிக்கு வைத்திருக்கிறார்கள்.

Mettur Dam Construction

மேட்டூர் அணை கட்ட அப்போதைய மைசூர் சமஸ்தானாம் அனுமதி கொடுக்கவில்லையாம். கி.பி.1800 களிலிருந்து முயற்சித்து இருக்கிறார்கள். இறுதியில் கி.பி.1920களில் தஞ்சை மாவட்ட விவசாயிகள் வெள்ளச்சேதத்திற்கு ஈடாக 30,00,000/- ரூபாய் கேட்க மைசூர் சமஸ்தானம் வேறு வழியில்லாமல் அணை கட்ட அனுமதி கொடுத்து விட்டார்கள். ஸ்டேன்லி என்பவர் கட்டியதால் இதற்கு அவர் பெயரையே வைத்து ஸ்டேன்லி நீர்த்தேக்கம் அழைக்கப்படுகிறது. தமிழகத்திலேயே பெரிய அணை இந்த மேட்டூர் அணைதான். 124 அடி உயரம் கொண்டது. (நன்றி – வீக்கிபீடியா)

Mettur Dam

அணையை ஏறிப்பார்த்த போது மலைகளுக்கிடையேயிருக்கும் கடல் போல காட்சியளித்தது. மேட்டூர் அணை நீர்மட்டம் என்ற வார்த்தைகளையெல்லாம் நாளிதழ்களில்தான் வாசித்திருக்கிறேன். அதை நேரில் கண்டபோது ஏற்பட்ட அனுபவம் அற்புதமானது. கொஞ்சநேரம் பார்த்துவிட்டு அங்கிருந்து நீர்வெளியேறிவரும் பகுதியைப் போய் பார்த்தோம். பின் வந்த ஆட்டோவிலேயே ஏறி மேட்டூர் அணைப்பூங்காவிற்கு சென்றோம். அணையை அடியிலிருந்து பார்க்கும்போது பிரமாண்டமாகயிருந்தது. நேரம் குறைவாகயிருந்ததாலும், பூங்காக்கள் சிறுவர்களுக்கும், காதலர்களுக்கும் ஏற்ற இடம் என்று தோன்றுவதாலும் சீக்கிரம் கிளம்பிவிட்டோம்.

மேட்டூர் பேருந்துநிலையம் செல்ல பேருந்து கிடைத்தது. அங்கிருந்து சேலம் போய் சேலத்திலிருந்து கோயம்புத்தூருக்கு இரவு பதினொருமணிவாக்கில் சென்றோம். நள்ளிரவு ஒருமணிவரை அரட்டை. அதன்பின் நல்ல தூக்கம். ஞாயிறு நிகழ்வில் கலந்து கொண்டு இரவு 9 மணிக்கு மதுரையம்பதிக்கு வந்தேன். திங்கள்கிழமை தினத்தந்தியில் மேட்டூர் அணை நூறு அடி நீருடன் தொடர்ந்து ஒருமாத காலமாகயிருந்து வருவதால் விவசாயிகள் மகிழ்ச்சி அடைந்ததாக வந்த செய்தியைப் பார்த்தபோது உடன் இருந்தவர்களிடம் நானும் போய் பார்த்துட்டு வந்தேன் என சொல்லிக் கொண்டிருந்தேன். ஆண்டாள் சொன்னது தீங்கின்றி நாடெல்லாம் திங்கள் மும்மாரி பொழியட்டும். வாழ்க வளமுடன்.

இயற்கை

ஞாயிற்றுக்கிழமை யாராவது பள்ளிக்குச் செல்வார்களா? அதுவும் பத்தாம் வகுப்பு மற்றும் பனிரெண்டாம் வகுப்பு படிப்பவர்களே அன்று பள்ளிக்கு வரச் சொன்னால் சங்கடத்தோடுதான் வருவார்கள். ஆனால், மதுரையில் மாதந்தோறும் கடைசி ஞாயிற்றுக்கிழமைகளில் ஆண்கள், பெண்கள் மற்றும் குழந்தைகள் என பெருங்கூட்டமே பள்ளிக்கு விருப்பத்தோடு சென்று வருகின்றனர். ஒவ்வொரு வகுப்பையும் தவறவிடக்கூடாதென கங்கணம் கட்டிக்கொண்டு பல்வேறு பகுதிகளிலிருந்து வந்து செல்கின்றனர்.

தொடக்கப்பள்ளி

கடந்த நான்கு வருடங்களாக நாற்பதுக்கும் மேற்பட்ட இடங்களுக்கு பசுமைநடை குழுவினர் தொடர்ந்து பயணித்து வருகின்றனர். அதிலும் இன்றைய பள்ளிகளுக்கெல்லாம் ஆதிப்பள்ளியான சமணப்பள்ளிகள் உள்ள மலைகளை நோக்கி தொடர்ந்து சென்று கொண்டிருக்கின்றனர். வரலாற்று வகுப்புகள் பெரும்பாலானவர்களுக்கு அலுப்பூட்டலாம். தொன்மையான தலங்களில் அந்த வரலாற்றை கேட்கும் போது அனைவரும் ஆர்வமாகிவிடுகிறார்கள்.

ஓடை

சமணத்துறவிகள் தாங்கள் தங்கியிருந்த மலைக்குகைத்தளங்களில் அனைவருக்கும் கல்வி கற்றுத் தந்ததால் படிக்கும் இடங்களுக்கும் பள்ளி என்ற பெயர் வந்தது. மீனாட்சிபுரம் – மாங்குளம் ஓவாமலையிலுள்ள சமணப்பள்ளிக்கு 23.11.14 அன்று பசுமைநடையாக கிட்டத்தட்ட இருநூறுபேர் சென்றிருந்தோம். மதுரை மாட்டுத்தாவணியிலிருந்து குழுவாகச் சென்றோம். மலைகளின் அரசனான யானைமலையைப் பார்த்து வணக்கத்தைச் செலுத்தி வழியிலுள்ள வயல்களை வேடிக்கைப் பார்த்துக் கொண்டே சென்றேன்.

அளவுகல்

முல்லைப் பெரியாறு அணை 142 அடியை எட்டியதாலும், வைகையில் பாசனத்திற்கு நீர் வந்ததாலும் மதுரையில் பெரியளவில் மழை பெய்யாவிட்டாலும் மதுரையைச் சுற்றியுள்ள கிராமங்கள் பச்சைப்பட்டு உடுத்தி அழகரைப் போல அழகாகயிருக்கிறது. ஓடை, கண்மாய், கால்வாய் என எங்கும் நீர்க்கோலம்.

மலைவயல்

சிலுசிலுவெனக் காற்று, அதற்கேற்ப அசைந்தாடும் இளங்கதிர்கள், சலசலக்கும் நீரோடை என சிட்டம்பட்டி பிரிவு திரும்பியதிலிருந்து மீனாட்சிபுரம் வரை வழிநெடுக இயற்கை செழித்து நிற்கிறது. பனைமரங்கள் அடந்திருக்க கண்மாய் பெருகி நிற்க அடிக்கிற காற்று ஆளையே தூக்குகிறது. கூட்டங்கூட்டமாய் வண்டியில் வருபவர்களைப் பார்த்து வியக்கும் கிராமத்து மக்கள். வேடிக்கைப் பார்த்துக் கொண்டே கடந்து கொண்டிருந்தேன். மலையெல்லாம் அறுக்குறாங்ங. ஆனா, ரோடெல்லாம் குண்டும் குழியுமாயிருக்கு.

பசுமை

மீனாட்சிபுரம் ஊரை அடைந்தோம். இருசக்கர வாகனங்களையும், மகிழுந்தையும் ஓரங்கட்டி விட்டு காலாற அந்த ஊர் இளவட்டங்கள் வழிகாட்ட மலையை நோக்கி நடந்தோம். வருபவர்களை வரவேற்கும் திண்ணைகள், ஓடு அல்லது கூரையென கிராமத்து வீடுகள் எளிமையானவை. மலைக்கு பின்னிருந்து சூரியன் மெல்ல எட்டிப் பார்த்துக் கொண்டிருந்தான். மலைக்குச் செல்லும் வழியில் மழையால் செடிகள் அடர்ந்து முளைத்திருந்தன. படிகள் அழகாய் செதுக்கப்பட்டிருந்தன.

ஓவாமலை

மலைப்பாதை

செங்கல்தளம்

மலையில் பாறையில் நரந்தம்புற்கள் நிறைய வளர்ந்திருந்தது. பாறைகள் ஒவ்வொன்றும் ஒவ்வொரு வடிவில் அழகாய் காட்சி தந்தது. மலைமீது சமதளப்பகுதியில் அனைவரும் சற்று ஓய்வெடுத்தோம். நீளமான மலை. சமதளத்திற்கு அருகில் பழமையான செங்கல் கட்டிடத்தின் அடிப்பகுதி மட்டும் எஞ்சியுள்ளதைப் பார்த்தோம். அங்கிருந்து சமணப்படுகையிருந்த இடத்தை நோக்கி நடந்தோம்.

மலையேற்றம்

மீனாட்சிபுரம்

வரலாற்று வகுப்பு

எல்லோரும் அங்கு குழுவாக அமர வரலாற்றுப் பேராசிரியர் கண்ணன் அவர்கள்  உரையாற்றினார். அந்த உரையைக் கேட்பதற்கு பசுமைநடைப் பயணிகளைப் போல ஏராளமான தும்பிகளும் வந்தன. சமணம் தமிழ்நாட்டிற்கு வந்த கதை, சமணத்தின் கொள்கைகள், மதுரையில் சமணம் செழித்த வரலாறு, மீனாட்சிபுரம் மாங்குளம் மலையின் தொன்மை, கல்வெட்டுகள் கண்டுபிடிக்கப்பட்ட காலம், கல்வெட்டுகளில் உள்ள செய்திகள் என ஒவ்வொன்றையும் மிகத் தெளிவாக கூறினார். அதன்பின் எழுத்தாளர் அ.முத்துக்கிருஷ்ணன் இதுபோன்ற இடங்களை நோக்கி நாம் வரவேண்டியதன் அவசியத்தையும், நாம் தொடர்ந்து பயணிக்க வேண்டியதையும் குறிப்பிட்டார். பாண்டிச்சேரியில் வசிக்கும் ஶ்ரீதரன் அவர்கள் தன்னுடன் வந்தவாசிப் பகுதியிலுள்ள தமிழ்ச்சமணர்கள் கொஞ்சப்பேரை இந்நடைக்கு அழைத்து வந்திருந்தார். அங்கிருந்த தமிழ்பிராமிக் கல்வெட்டுக்களைப் பார்த்துவிட்டு இறங்கத் தொடங்கினோம்.

பேராசிரியர் கண்ணன்

தும்பி

பசுமைநடை

எழுத்தாளர் அர்ஷியாவுடன் பேசிக்கொண்டே மலையிலிருந்து கீழே இறங்கினேன். சமீபத்திய வாசிப்பு, மலைகளில் ஓரிரவு தங்கிப் பார்க்க வேண்டுமென்ற ஆசை, நரந்தம்புல் என எங்கள் உரையாடல் நீண்டு கொண்டேபோனது. மிளிர்கல் நாவலில் ஓரிரவு அந்தக்குழு இம்மலையில் தங்குவதாக கதையில் வரும்.

பாறைத்திருவிழா

மலையிலிருந்து இறங்கி ஒரு வீட்டுத் திண்ணையில் அமர்ந்தோம். அங்கிருந்த பாட்டி எங்களிடம் எப்படிய்யா இந்த பாதையில வந்தீங்க? ரோடெல்லாம் ஒக்குடச் சொல்லுங்கய்யா? என சொன்னாங்க. நான் அந்தப் பாட்டியிடம் டவுனுக்குள்ளையே ரோடெல்லாம் பேந்துதான் கிடக்கு என  என்னால் ஒன்றும் செய்ய முடியாத கையறுநிலையை வேறுமாதிரி சொன்னேன்.

உணவு

எல்லோரும் வர அங்கிருந்த நாடகமேடையில் ஒரு குழுவும், சிறுதோப்பில் ஒரு குழுவுமாக அமர அனைவருக்கும் உணவு வழங்கப்பட்டது. மாங்குளத்தைச் சேர்ந்த ஆர்வலர் ஒருவர் வடை மற்றும் காபி எல்லோருக்கும் வழங்கினார். மதுர வரலாறு மற்றும் புத்தக விற்பனை செய்தோம்.

சின்னமாங்குளம்

அங்கிருந்து மாங்குளம் வழியாக அழகர்கோயில் சாலையை அடைந்தோம். வழிநெடுக விவசாய வேலைகள் நடந்து கொண்டிருந்தது. ஞாயிறன்று ஓய்வெடுப்போம் என எண்ணாமல் பணிகளைச் செய்து கொண்டிருந்தனர்.

வரப்பு

நிறைய இடங்களில் நெல், சில இடங்களில் யானைக்கரும்பு போட்டிருந்தனர். பார்க்க மிக அழகாகயிருந்தது. என்னுடன் வந்த சகோதரன் அதையெல்லாம் நிழற்படமெடுத்துக் கொண்டே வந்தான். அழகர்கோயில் சாலையிலிருந்து அலங்காநல்லூர் வழியாக இயற்கையெழிலை பார்த்துக் கொண்டே வீடு வந்து சேர்ந்தேன்.

தமிழி

நன்றி – படங்கள் உதவி – அருண், பினைகாஸ், பிரசன்னா

மாங்குளம் மீனாட்சிபுரம்

தொடர்புடைய பதிவு: பாண்டியனின் சமணப்பள்ளியில்

அழகுமலையானுடன்

மதுரை அழகர்கோயிலுக்கு சுற்றத்தோடும், நண்பர்களோடும் பலமுறை சென்றிருக்கிறேன். தொ.பரமசிவன் அய்யாவின் அழகர்கோயிலுக்குள் நுழைந்தபோதுதான் அக்கோயிலின் விஸ்வரூப தரிசனம் கிட்டத்தொடங்கியது; பலவருடங்களாக கொண்டாடிய சித்திரைத் திருவிழாவை புதுக்கோணத்தில் பார்க்கத் தொடங்கினேன்; ஆடித்தேரோட்டம் காண தொடர்ந்து செல்ல ஆரம்பித்தேன். அழகர்கோயில் நூலைப் படித்து வாய்ப்பு கிட்டும் போதெல்லாம் திருவிழாக்களுக்குச் செல்வது வழக்கம்.

அழகர்மலையிலுள்ள சிலம்பாறு குறித்து சிலப்பதிகாரம், மகாபாரதக் கதைகளிலெல்லாம் வருகிறது. சிலம்பாறு இன்று நூபுரகங்கை என்ற பெயராலேயே பெரும்பாலும் அழைக்கப்படுகிறது. ஆடிமாதத்தில் இராக்காயி அம்மனை வணங்கி தீர்த்தமாடிச் செல்வதை கிராமத்து மக்கள் கடமையாகவே கொண்டுள்ளனர். ஐப்பசியில் அழகர் தீர்த்தத்தொட்டிக்கு நீராட வருவதால் மழை நன்கு பொழியும் என்று மக்கள் நம்புகிறார்கள் என்று நாளிதழ்கள் சில குறிப்பிடுகின்றன. ஆனால், தைலக்காப்புத் திருவிழா ஏன் கொண்டாடுகிறார்கள் என அறிய தொ.பரமசிவன் அய்யா அழகர்கோயில் நூலில் என்ன சொல்லியிருக்கிறார் எனப் பார்ப்போம்.

ஐப்பசிமாதம் வளர்பிறை பன்னிரண்டாம் நாளில் (சுக்கிலபட்சத் துவாதசி) முதல் திருமாலையாண்டான் காலாமானார். இவர் ஆளவந்தாரின் மாணவர்; இராமானுசர்க்குத் திருவாய்மொழி கற்பித்தவர். இவர்க்கு அழகர்கோயிலுக்குள் ஒரு சன்னதியும் உள்ளது. இவரது மரபினர் இக்கோயிலில் ஆசார்ய மரியாதையினைப் பெற்று வருகின்றனர்.

இறைவன் தேவியரின்றித் தனித்துச் சென்று நீராடுகிறார். குடத்து நீரில் நீராடாமல், அருவியின் கீழ் உடுத்தவை, அணிந்தவையுடன் நின்று நீராடுகிறார். இன்னும் தமிழ்நாட்டில் பிராமணரல்லாத சாதியினர், ‘இறப்புத் தீட்டு’ கழியும் நாளில் தலைக்கு எண்ணெயிட்டு நீராடுவதைக் காணலாம். தமிழ்நாட்டு வைணவத்தில் குருவின் சிறப்பை விளக்கிக் காட்டும் இத்திருவிழா இக்கோயிலுக்கேயுரியது. பிற வைணவக் கோயில்களில் இல்லை.

தொ.பரமசிவன் (அழகர்கோயில்)

அழகர் மலை மேலுள்ள தீர்த்தத்தொட்டிக்கு நீராடச் செல்லும் தைலக்காப்புத் திருவிழாவிற்கு செல்ல வேண்டுமென்று ஓரிரு வருடமாக முயற்சி செய்து கொண்டிருந்தேன். இந்தாண்டு நவம்பர் 4 மொகரம் பண்டிகைக்கு அரசு விடுமுறையாகிவிட, அன்று தைலக்காப்புத் திருவிழாவும் வர நல்லவாய்ப்பு கிட்டியது. திருமாலிருஞ்சோலைக்கு திருமங்கலத்திலிருந்து நண்பர்கள் இளஞ்செழியனும், வஹாப் ஷாஜஹான் அண்ணனும் உடன்வர அலங்காநல்லூர் வழியாகச் சென்றோம். நானூறு ஆண்டுகளுக்குமுன் அழகர் தேனூருக்கு அலங்காநல்லூர் வழியாகச் செல்வாராம். அப்போது அழகருக்கு அலங்காரம் செய்த அலங்காரநல்லூர் இப்போது அலங்காநல்லூர் ஆகிவிட்டது.

பதினெட்டாம்படிக்கருப்புமுன்

வழியெல்லாம் மழையால் பசுமை போர்த்தியிருந்தது. பொய்கைக்கரைப்பட்டி தெப்பக்குளத்தில் கொஞ்சம் நீர் நிரம்பியிருந்தது. அழகர்கோயில் அழகாபுரிக் கோட்டைக்குள் நுழைந்தோம். ஆடித்திருவிழா போல கூட்டம் இல்லை. இரணியன் கோட்டைக்குள் சென்ற போதும் வழக்கமான நாள் போலத்தானிருந்தது. பதினெட்டாம்படியானை வணங்கிவிட்டு கோயிலுக்குள் சென்றோம். திருக்கல்யாண மண்டபத்தில் உள்ள சிற்பங்களின் அழகு குறித்து படித்ததால் அம்மண்டபத்திலுள்ள சிலைகளைப் பார்த்தோம். ஒவ்வொரு சிலையும் மிக அழகாக அற்புதமாக செதுக்கப்பட்டிருக்கிறது.

கோயில்யானை

வண்டிப்பாதை

கோயிலிலிருந்து அழகர் தீர்த்தமாடக் கிளம்பினார். கோயில்யானை அழகரை அழைக்க முன்வந்தது. கம்பத்தடி மண்டபம்முன் அழகர் நிற்க அங்கு வைத்து நாலாயிரத் திவ்யபிரபந்தம் பாடினர். தமிழ்பாடல்களை கேட்க கேட்க உள்ளம் குளிர்ந்தது. அங்கிருந்த கோயில் பணியாளரிடம் இன்று என்ன திருவிழா இங்கு என்ன செய்கிறார்கள் என்று விசாரித்தேன். அழகர் கிளம்ப அவரோடு நாங்களும் கிளம்பினோம். திருக்கல்யாண மண்டபத்தினுள் நுழைந்து வண்டிவாசல் வழியாக பதினெட்டாம்படிக்கருப்பு சன்னதிக்கு அழகர் வருகிறார். அங்கிருந்து மலைக்கு தீர்த்தமாடக் கிளம்பினார். திருமாலிருஞ்சோலை அழகனுக்கு சுந்தரத்தோளுடையான் என்ற திருநாமமுண்டு. பொருத்தமான திருநாமம்தான். பார்த்துக் கொண்டேயிருக்கலாம் மதுரை அழகரை.

சோலமாமலை

மலைவலம்

நாங்கள் இருசக்கர வாகனத்தில் அழகருக்கு முன்னும், பின்னுமாக மாறிமாறிச் சென்று நிழற்படமெடுத்து அவருடன் மெல்ல சென்று கொண்டிருந்தோம். மலைக்காற்று, குரங்குகள் விளையாட்டு, பக்தர்களின் கோவிந்தாவெனும் நாமம் ஒலிக்க மலைப்பாதையில் திருமாலிருஞ்சோலையழகன் வந்து கொண்டிருந்தார். அதிலும் அழகரின் மாற்றுத் தண்டியலைத் தூக்கிச் சென்ற சிறுவர்கள் ‘சோலமாமலை’ எனவும் ‘கோவிந்தா’ எனவும் கூறிக் கொண்டு சென்றது அழகாய் இருந்தது. ‘சோலை மாமலை’ எவ்வளவு அருமையான பெயர்.

ஆராதனை

வழியில் அனுமார் மண்டபம் மற்றும் கருடாழ்வார் மண்டபத்தின் முன் அழகரை நிறுத்தி வழிபாடு நடத்தினர். அழகர் மலைக்கு தீர்த்தமாட வருவதைப் பார்த்து வழியில் பக்தர்கள் ஆச்சர்யமடைந்தனர். கும்பிடபோன தெய்வம் குறுக்கே வந்தது போல என்ற சொலவம் அங்கு நிறைவேறியது. பெரும்பாலான மக்களுக்கு தைலக்காப்புத் திருவிழா குறித்து தெரியவில்லை. பழமுதிர்சோலைக்கு முன்புள்ள மலைப்பாதை வழியாக மாதவிமண்டபம் வரை தனிப்பாதை உள்ளது எனக்கு அன்றுதான் தெரியும்.

திருமாலிருஞ்சோலை

இயற்கையெழில் சூழ்ந்த மலைப்பாதைகளுக்கிடையில் அழகுமலையானோடு பயணமானேன். ஏகாந்தமாகயிருந்தது. முதியஅடியவர் ஒருவர் கயிறை முன்னெடுத்துச் செல்ல அவரைப் பின்பற்றி பல்லக்கைத் தூக்கி வந்தனர். மாதவிமண்டபத்திற்கருகில் ஒலிபெருக்கியில் “வாராரு வாராரு அழகர் வாராரு” பாடல் ஒலித்துக் கொண்டிருந்தது. அழகர் மாதவி மண்டபத்திற்கு நுழைவதற்கு முன் பக்தர்கள் பூமாரி பொழிய, பல்லக்கை குலுக்க, பாடல் ஒலிக்க மேனி சிலிர்த்துவிட்டது.

மாதவிமண்டபம்

அழகர் மாதவி மண்டபத்தில் நுழைந்து அங்கு பல்லக்கிலிருந்து மாறி சிறு தண்டியலில் இராக்காயி அம்மன் சன்னதிக்கு செல்வதற்கு முன்னுள்ள மேடைக்கு வருகிறார். அழகருக்கு மிகப் பெரிய சடையை கட்டி வைத்திருந்தனர். அழகருக்கு நைவேத்தியம், ஆரத்தி என நிறைய வழிபாடுகள் செய்தனர். தைலத்தை எடுத்து அழகரின் சடையைப் பிரித்து மெல்ல தேய்த்துவிட்டார் பட்டர்.

அலங்காரன்

மக்கள் அழகர் மதுரைக்கு துலுக்கநாச்சியார் வீட்டுக்குப் போய்வந்ததால் தீர்த்தமாடி இனித்தான் தீட்டுக் கழிந்து கோயிலுக்குள் போவார் என பேசிக்கொண்டனர். சிலர் ஆடிமாதமே தீர்த்தமாடி போய்விடுவாரென்று சொல்லுவர். ஆனால், இந்தக் கதைக்கும் அழகரின் தீர்த்தமாடலுக்கும் எந்த சம்மந்தமும் இல்லையென்பதை மேலே அய்யா சொன்ன தகவலிலேயே அறிந்திருப்பீர்கள். அழகர் மதுரைக்கு மண்டூக முனிவருக்கு மோட்சம் கொடுக்கவே வருகிறார். மற்றபடி அவர் மீனாட்சி திருமணத்திற்காக கூட வருவதில்லை. வண்டியூரில் பெருமாள்கோயிலில்தான் அழகர் தங்குவார். அக்காலத்தில் சமய ஒற்றுமைக்காக வடக்கே இஸ்லாமியப் பெண் கண்ணனை விரும்பியதை துலுக்கநாச்சியார் கதையாக்கிவிட்டார்கள் நம்மவர்கள். தொ.பரமசிவன் அய்யாவின் அழகர்கோயில் வாசித்தபின்னே எனக்கு இத்தெளிவு ஏற்பட்டது.

தீர்த்தத்தொட்டி

அழகர் தைலம் தேய்த்து தீர்த்தத்தொட்டிக்கு நீராடச் சென்றார். நான் மாதவிமண்டபத்திற்கு மேலுள்ள மாடிக்குச் சென்று அங்கிருந்து அழகர் தீர்த்தத்தொட்டிக்கு வருவதைப் பார்த்துவிட்டு கிளம்பினேன். தொட்டியில் நீராடுவதால் தொட்டி உற்வசம் எனவும், அருவியில் நீராடுவதால் தலையருவித் திருவிழா எனவும் அழைப்பதாக தொ.ப’ அய்யா சொல்கிறார். மிக அற்புதமான அனுபவம். அங்கிருந்து மெல்லோட்டமாக பழமுதிர்சோலைதாண்டி தைலக்காப்புத் திருவிழா என வரவேற்புதட்டி வைத்திருந்த இடத்தில் நிறுத்தியிருந்த வண்டியை எடுத்து மலையடிவாரம் வந்தேன். வீட்டிற்கு அழகர்கோயில் சம்பா தோசையும், கொய்யாபழமும் வாங்கிக் கிளம்பினேன். உள்ளங்கவர்ந்த அந்த அழகர்மலைக்கள்வர் இனி எந்தத் திருவிழாவிற்கு அழைப்பாரென்ற எதிர்பார்ப்பில் காத்திருக்கிறேன்.

பசுமை கொஞ்சும் அந்நாளின் படங்களை மேலும் காண, காண்க முன்னர் இட்ட பதிவு.

சித்திரவீதிக்காரன்

எனக்குள் ஒருவன், தசாவதாரம் – விஸ்வரூபம் எடுத்த உயர்ந்த உள்ளம், நம்மவர், கலைஞன், அன்பால் ஆளவந்த வெற்றிவிழா நாயகன், அபூர்வசகோதரர் கமல்ஹாசன் பிறந்து 60 ஆண்டுகள் ஆகிவிட்டதாம். ஆச்சர்யமாக இருக்கிறது. புதிய விசயங்களைத் தேடித்தேடிக் கற்று என்றும் இளமையாக இருக்கும் சகலகலாவல்லவருக்கு வயது என்றும் பதினாறுதான்.

1989ல் அபூர்வ சகோதரர்கள் வெளியானது. நான் ஓரளவு விவரம் தெரிந்து பார்த்த படம். அப்பு கதாபாத்திரமும், சர்க்கஸ் காட்சிகளும், பாடல்களும் மனதைக் கவர்ந்தன. குள்ளமாக வந்து நெஞ்சில் வெள்ளமாக நிறைந்து விட்டார் கமல்ஹாசன். அந்தப் படம் வெளியானபோது நாங்கள் அண்ணாநகரில் குடியிருந்தோம். சுந்தரம் தியேட்டரில்தான் கமல்ஹாசன் படங்கள் பெரும்பாலும் வெளியாகும்.

பள்ளிநாட்களில் பாட்டுப்புத்தகங்கள் வாங்கி வகுப்பறைகளில் புத்தகங்களுக்கிடையில் வைத்துப்படிப்பது, அங்கேயே பாடுவது என எல்லாம் நடக்கும். சிலநேரங்களில் ஆசிரியர்களால் பறிக்கப்பட்டு கிழிக்கப்படுவதும் உண்டு. கமல்ஹாசன் பாடல்களின் மொத்த தொகுப்பு புத்தகம் வாங்கி வைத்திருந்தேன். இப்போதெல்லாம் தொலைக்காட்சியில் யார் யாரோ பாட குடும்பத்தோடு பார்த்துக்கொண்டிருக்கிறார்கள். அந்தக் காலத்தில் எல்லோருமே சூப்பர் ஸிங்கர்ஸ்தான். எங்கள் வகுப்பில் பெரும்பாலான பேர் கமல் ரசிகர்களாக இருந்ததால் கமல்ஹாசன் பாடல்களை மனப்பாடப்பகுதிக்கு குறித்து கொடுத்ததுபோல படித்துக்கொண்டிருந்தோம்.

எட்டாம் வகுப்பிற்கு பிறகு நண்பர்கள் எல்லோரும் வேறுவேறு பள்ளிகளில் சேர்ந்துவிட்டாலும் வெள்ளிக்கிழமை மாலை வேளையில் பேசிக்கிட்டே கண்மாய்கரையோரம் உள்ள சோனையா கோயிலுக்கு போய்ட்டு வந்து மந்தையில் ஒளியும் ஒளியும் பார்க்க அமர்வோம். கமல்ஹாசன் பாடல் எப்போது போடுவார்கள் என்று காத்திருந்த அந்தக் காலம் திரும்ப வருமா?

Kamal Haasan's Uthama Villain First Look Wallpapers

தேவர்மகன் வெளியான போது ஒரு கம்பை எடுத்து கொண்டு குண்டு பல்பு வெளிச்சத்தில் என் நிழலைப் பார்த்து சாந்துப்பொட்டு பாடலை பாடிக்கொண்டே கம்பு சுற்றிப் பழகியதையெல்லாம் மறக்க மனங்கூடுதில்லையே. தனிமை கிட்டும்போது கணினியில் கமல்ஹாசன் பாடலைப் போட்டு ஆடுவது பெருங்கொண்டாட்டமான விசயம். சமீபத்தில் அப்படி ஆடத்தூண்டிய பாடல் ‘உன்னைக் காணாமல் நானிங்கு நானில்லையே’.

பாலிடெக்னிக் படிக்கும்போது எங்கள் ஆசிரியர் உட்பட அனைவருக்கும் நான் கமல்ஹாசன் ரசிகனென்று தெரியும். அன்பே சிவம் வெளியான சமயம் மீசையை எப்போதும் முறுக்கிக் கொண்டு திரிந்த காலம். விருமாண்டி வந்த போது தினமலரில் ஒருபக்க ப்ளோஅப் கொடுத்தார்கள். அதை எனக்கு எடுத்துவர வேண்டுமென்று ஒரு ஆசிரியர் நினைக்குமளவிற்கு பிரபலமாக இருந்தேன்.

2004ல் விருமாண்டி பார்த்துத் தொடங்கினேன். கல்லூரி காலமென்பதால் அந்த வருடம் மட்டும் 24 படங்கள் பார்த்துவிட்டேன். இறுதியாக டிசம்பர் 28 அன்று மீனாட்சி தியேட்டரில் விருமாண்டி பார்க்க ஆசிரியரிடம் அனுமதி கேட்டு சென்று 25வது படமாக விருமாண்டி பார்த்தேன். படித்து முடித்தபின் இருசக்கர வாகன விற்பனை பிரதிநிதியாக இருந்தபோது அங்குள்ளவர்கள் என்னை கமல் என்றே அழைப்பார்கள்.

Actor Kamal Haasan in Papanasam Movie Stills

உரையாடலின் போது கமல்ஹாசன் பட வசனங்களை அடிக்கடி சொல்வேன். அதிலும் வசூல்ராஜா பட வசனங்களைத்தான் மேற்கோளாக பெரும்பாலும் கூறுவேன். வசூல்ராஜாவை திரையரங்குகளில் மட்டும் ஆறுமுறை பார்த்தேன். கமல்ஹாசன் குறித்த செய்தியோ, பேட்டியோ நாளிதழ்களில் வந்திருந்தால் அதை அப்போதே வாங்கிவிடுவேன். இல்லாவிட்டால் அந்தப் பக்கத்தை மட்டும் எப்படியாவது எடுத்துருவேன். அப்படி தொகுத்தவை இரண்டு பெட்டி நிறைய இன்னமும் இருக்கிறது. இப்போது கணினியில் கமல்ஹாசனின் நேர்காணல்கள், பாடல்கள், படங்கள் எல்லாவற்றையும் சேமித்து வைத்துக் கொண்டிருக்கிறேன்.

விஸ்வரூபம்2

திருமணம் முடிந்தபிறகு கமல்ஹாசன் படம்தான் முதலில் பார்க்க வேண்டுமென்று இன்னும் ஒரு படமும் பார்க்கவில்லை. விஸ்வரூபம் 2, உத்தமவில்லன், பாபநாசம் என ஹாட்ரிக் ஹிட் கொடுக்க வருகிறார். என்னுடைய திருமண ஆல்பத்தில் ஒருபக்கம் எங்க படமும் மறுபக்கம் கமல் பியானோ வாசிப்பது போல் உள்ள படத்தையும் சேர்த்திருந்தோம். பார்த்தவர்கள் வியப்பில் ஆழ்ந்தார்கள்.

கமல்ஹாசன்

எங்க வீட்டில் இன்னமும் கமல்ஹாசன் படங்களைப் பார்க்கும் இடங்களில் ஒட்டி வைத்திருக்கிறேன். மழைக்கால மேகமொன்று மடி ஊஞ்சலாடும் நவம்பர் மாதத்தில் கமல்ஹாசனைப் போல வைகையெனும் மகாநதிக்கரையில் நானும் பிறந்தவன் என்ற பெருமை எனக்குண்டு. கமல்ஹாசனை நினைத்தாலே இனிக்கும். பார்த்தால் பசி தீரும். அன்பே சிவம், அன்பே கமல்.

???????????????????????????????

மதுரை அழகர்கோயிலுக்குச் சென்று பதினெட்டாம்படியானை வணங்கி மலைமேல் உள்ள சிலம்பாற்றில் நீராடி இராக்காயி அம்மனைத் தொழுது வருவது அடியவர்களின் வழக்கம். சிலம்பாற்றில் தேன் போன்று தித்திக்கும் நீர் வருவதால் தேனாறு என்று அழைக்கப்பட்ட காலமெல்லாம் போய் இன்று நூபுரகங்கையாகிவிட்டது. மலைமேல் அமைந்த தீர்த்தத்தொட்டியில் அழகரே வருடத்திற்கொருநாள் போய் நீராடுகிறார் என்றால் எவ்வளவு சிறப்பாய் இருக்கும். அதைக்காண இந்தாண்டு சென்று வந்ததைக் குறித்து பதிவு செய்யும்முன் அழகர்கோயில் குறித்து ஆழ்வார்களின் பாசுரங்களை ‘அழகர்கோயில் தல வரலாறு’ நூலிலிருந்து கொஞ்சம் பார்ப்போம். அழகுமலைத் தமிழ்ச்சாரலில் நனைவோம்.

???????????????????????????????

ஆயிரம் தோள் பரப்பி முடியாயிரம் மின்னிலக  
ஆயிரம் பைந்தலைய அனந்த சயனன் ஆளும் மலை
ஆயிரமாறுகளும் சுனைகள் பல வாயிரமும்
ஆயிரம் பூம்பொழிலுமுடை மாலிருஞ்சோலையதே

பெரியாழ்வார் திருமொழி, 357

???????????????????????????????

???????????????????????????????

சந்தொடு காரகிலும் சுமந்து தடங்கள் பொருது
வந்திழியும் சிலம்பாறுடை மாலிருஞ்சோலை நின்ற
சுந்தரனை, சுரும்பார்குழல் கோதை தொகுத்துரைத்த
செந்தமிழ் பத்தும்வல்லார் திருமாலடி சேர்வார்களே!

நாச்சியார் திருமொழி, 595

???????????????????????????????

சேயோங்கு தண் திருமாலிருஞ்சோலைமலை உறையும்  
மாயா! எனக்குரையாயிது மறைநான்கினு ளாயோ
தீயோம்புகை மறையோர்ச் சிறுபுலியூர்ச் சலசயனத்
தாயோ உனதடியார் மனத்தாயோ! அறியேனே!

திருமங்கையாழ்வார் பெரிய திருமொழி, 1634

???????????????????????????????

உணர்ந்தாய் மறைநான்கும் ஓதினாய் நீதி
மணந்தாய் மலர்மகள் தோள்மாலே – மணந்தாய்போய்
வேயிருஞ்சாரல் வியலிருஞாலம் சூழ்
மாயிருஞ் சோலைமலை.

 பூதத்தாழ்வார், இரண்டாம் திருவந்தாதி, 2229

???????????????????????????????

பண்டெல்லாம் வேங்கடம் பாற்கடல் வைகுந்தம்,
கொண்டங் குறைவார்க்குக் கோயில்போல், – வண்டு
வளங்கிளரும் நீள்சோலை வண்பூங் கடிகை,
இளங்குமரன் றன்விண் ணகர்.

பேயாழ்வார், மூன்றாம் திருவந்தாதி, 2342

???????????????????????????????

பயனல்ல செய்து பயனில்லை நெஞ்சே!
புயல் மழைவண்ணர் புரிந்துறை கோயில்
மயல்மிகு பொழில்சூழ் மாலிருஞ்சோலை
அயன் மலையடைவது அது கருமமே!

 நம்மாழ்வார் திருவாய்மொழி, 2888

???????????????????????????????

???????????????????????????????

???????????????????????????????

அழகர் தீர்த்தத்தொட்டியில் நீராடுவதால் நல்ல மழை பொழியும் என்று மக்கள் நம்புவதாக  நாளிதழ்களில் தைலக்காப்புத் திருவிழா குறித்து போட்டிருக்கிறார்கள். ஆனால், அழகர் தைலக்காப்பிட்டு நீராட என்ன காரணம்? தொ.பரமசிவன் அய்யா அழகர்கோயில் நூலில் என்ன கூறியிருக்கிறார் என்று ‘சிலம்பாற்றில் நீராட வந்த சுந்தரத்தோளுடையான்’ பதிவில் பார்க்கலாம்.

???????????????????????????????

படங்கள் உதவி – இளஞ்செழியன்

blogersmeet

உலகம் ஒரு நிறையாத் தான் ஓர் நிறையாப்
புலவர் புலக் கோலால் தூக்க, உலகு அனைத்தும்  
தான் வாட, வாடாத தன்மைத்தே – தென்னவன்  
நான்மாடக் கூடல் நகர்.  
- பரிபாடல்

சங்கம் வைத்து தமிழ் வளர்த்த மதுரையில் தமிழ் வலைப்பதிவர்கள் திருவிழா. மற்ற ஊர்களில் நடைபெற்று வந்த வலைப்பதிவர் சந்திப்பு மற்றும் புத்தகக்கண்காட்சி எல்லாம் திருவிழாவானது மதுரையில்தான். நாள்தோறும் மதுரையில் திருவிழாதான்.  நான் வலைப்பதிவு எழுத வந்த கதையும், வலைப்பதிவர் திருவிழாவில் கலந்து கொண்டு மதுரை குறித்து பேசியதையும் குறித்த சிறுபதிவு.

வாசித்தலும், அலைதலும் தான் வாழ்க்கையாய் இருக்கிறது. நான்காம் வகுப்பு படிக்கையிலிருந்து நாட்குறிப்பேடு எழுதுகிறேன். வேண்டாத வேலையாக தோன்றி நடுநடுவே விட்டாலும் இன்று வரை நாட்குறிப்பேடு எழுதிக்கொண்டுதானிருக்கிறேன். புத்தக வாசிப்பு இளமையிலிருந்தே தொடர்கிறது. ஆனால், இணையத்தில் தமிழில் வாசிக்க இது போன்ற வலைதளங்கள் இருக்கிறது என்பதே 2009ல் தான் தெரியும். விகடன் வரவேற்பறையில் எழுத்தாளர் எஸ்.ராமகிருஷ்ணன் வலைத்தளம் குறித்து வாசித்து பின் அவரது தளத்தை தொடர்ந்து வாசித்துக்கொண்டிருக்கிறேன்.

மற்ற தளங்களை வாசித்த போது நாமும் எழுதலாமே என்று மனதுக்குள் கெவுளி அடித்தது. மதுரையையும், வாசித்ததையும் குறித்து பதிவு செய்ய வேண்டும் என்ற ஆவல் எனக்குத் தொற்றிக் கொண்டது. என்னுடைய கனவை சாத்தியமாக்கிய தமிழ்ச்செல்வ அண்ணனுக்குத்தான் மிகவும் நன்றி சொல்ல வேண்டும். என்னுடைய பதிவுகளைப் படித்து தொடர்ந்து ஊக்கமளித்து வரும் அனைவருக்கும் நன்றி. 23.10.2010ல் சித்திரவீதிகள் என்ற பதிவோடு வலைப்பதிவு எழுதத் தொடங்கிய இந்த நாலாண்டுகளில் என் வாசிப்பும், பயணமும் கொஞ்சம் மெருகேறியிருக்கிறது.

தமிழ் வலைப்பதிவர் திருவிழாவில் மதுரை குறித்து பேச வேண்டுமென்று என்னிடம் சீனா அய்யாவும் அவரது துணைவியார் செல்விசங்கர் அம்மாவும் சொன்னார்கள். மதுரை குறித்து பேசுவது மகிழ்வான விசயம்தான். ஆனாலும், கிராமத்து பள்ளிநாட்களுக்குப் பிறகு எனக்கு மேடை வெகுதூரமாகிப் போனது. என் மீது அவர்கள் வைத்த நம்பிக்கையில் சரியென்றிருந்தேன்.

26.10.2014 அன்று தெப்பக்குளத்தில் உள்ள கீதா நடன கோபால மந்திர் அரங்கில் தமிழ் வலைப்பதிவர் திருவிழா தொடங்கியது. தெப்பக்குளத்தில் பசுமைநடை முடிந்தவுடன் பசுமைநடை நண்பர்களுடன் தமிழ் வலைப்பதிவர்கள் திருவிழாவில் கலந்து கொண்டேன். தமிழ்த்தாய் வாழ்த்துடன் நிகழ்வு தொடங்கியது. தமிழணங்குதான் அந்த அரங்கில் பலரையும் ஒருங்கிணைத்திருக்கிறது.

தெரிந்த வலைப்பதிவுலக நண்பர்களை சந்தித்தேன். புதிய நண்பர்களும் அறிமுகமானார்கள். சிலர் என்னுடைய பதிவுகளை வாசித்தேன் என்று சொன்னது மகிழ்வாகியிருந்தது. விழாவில் தருமி அய்யா, சீனா அய்யா, ரமணி அய்யா என மதுரையின் மூத்த பதிவர்கள் பேசினார்கள். நிகழ்ச்சியை ஒருங்கிணைத்த தமிழ்வாசி பிரகாஷ், தமிழன் கோவிந்தராஜ் மற்றும் திண்டுக்கல் தனபாலன் அவர்களும் ஓரிரு வார்த்தைகள் பேசினார்கள். தொழில்நுட்பப் பதிவர்களுக்கு பாராட்டும், விருதும் வழங்கப்பட்டது. மதுரை சரவணன் முன்னிலை வகித்து உரையாற்றினார்.

பசுமைநடை பயணத்தில் கலந்து கொண்டு தங்கள் அனுபவங்களை எழுதிய பதிவர்களின் கட்டுரைகளைத் தொகுத்து காற்றின் சிற்பங்கள் என்ற நூல் தெப்பக்குளம் பசுமைநடையில் வெளியிடப்பட்டது. அதை தமிழ் வலைப்பதிவர் திருவிழாவிலும் வெளியிட்டு அந்நூல் அனைவருக்கும் இலவசமாய் வழங்கப்பட்டது. அச்சமயத்தில் மதுரை, தமிழ், பசுமைநடை குறித்து பேச எனக்கு வாய்ப்பு வழங்கப்பட்டது. என்னை வாழ்த்தி செல்வி சங்கர் அம்மா அருமையாகப் பேசினார். அவரது வாழ்த்து எனக்கு பதட்டத்தைக் குறைத்து நம்பிக்கையை அளித்தது.

chithraveedhikkaranஎன்னை நன்றாக இறைவன் படைத்தனன்
தன்னை நன்றாகத் தமிழ் செய்யுமாறே! – திருமந்திரம்
 
என்னை நன்றாக மதுரை காக்கிறது
தன்னை நன்றாகப் பதிவு செய்யுமாறே!

என்ற வரிகளுடன் அனைவருக்கும் வணக்கம் சொல்லித் தொடங்கினேன். என்னைக் குறித்து அறிமுகத்தை ஓரிரு வார்த்தைகளில் முடித்துக்கொண்டு மதுரையின் தொன்மை, பரிபாடல், மதுரையில் உள்ள மலைகளின் வரலாறு, பசுமைநடை, திருவிழாக்கள், குடைவரைகள், மதுரையும் தமிழும் குறித்து ஐந்து நிமிடங்களுக்குள் பேசினேன். மதுரையின் பல பெயர்கள், மீனாட்சியம்மன் கோயில், மதுரையின் பன்முகத்தன்மை குறித்தெல்லாம் பேசணும் என்று நினைவில் இருந்தாலும் என்னையறியாமல் நன்றி சொல்லி முடித்துவிட்டேன். இந்த வாய்ப்பு அளித்த சீனா அய்யாவிற்கும், மதுரை மற்றும் அனைத்து தமிழ் பதிவர்களுக்கும் நெஞ்சார்ந்த நன்றி.

maduraivaasaganதமிழ் சிறப்பாக இருக்கும் வரை மதுரை இருக்கும் என்று பரிபாடல் சொல்கிறது. அதே போல மதுரை சிறப்பாக இருக்கும் வரை தமிழும் இருக்கும். இனி அகராதிகளில் மதுரை என்றால் தமிழ் என்றும் தமிழ் என்றால் மதுரை என்றும் சேர்த்துக் கொள்ளலாம் என்று பேசும்போது குறிப்பிட்டேன். நான் மதுரையையும், தமிழையும் தெய்வமாக வழிபடுபவன்.

எல்லோருக்கும் அருந்த குளிர்ந்த ‘மதுரைப்புகழ்’ ஜிகர்தண்டா கொடுத்தார்கள். பதிவர்கள் சுய அறிமுகம் செய்து கொள்ளும் நிகழ்வு தொடங்கியது. தாங்கள் எழுதும் பதிவுகள் குறித்து எல்லோரும் பேசினார்கள். இரத்னவேல் நடராஜன் அய்யாவைப் பார்த்தேன். ஶ்ரீவில்லிப்புத்தூரிலிருந்து துணைவியாருடன் கலந்து கொண்டார். என்னுடைய பதிவுகளைப் படித்து மறுமொழியிட்டு அதை தனது முகநூல் பக்கத்திலும் பகிர்ந்து கொள்வார். அன்றுதான் நேரடியாக சந்தித்தோம். திண்டுக்கல் தனபாலனையும் வெகுநாட்களுக்கு பிறகு பார்த்து பேசினேன். பதிவர்களின் நூல்கள் விற்பனைக்கு வைத்திருந்தார்கள். பத்திரிகை மற்றும் ஊடகத் தொடர்பை இன்றைய வானம் தமிழ்ச்செல்வன் அவர்கள் ஏற்றிருந்தார். திருமங்கலத்திலிருந்து நண்பர்கள் வந்திருந்தனர். நிகழ்ச்சி மிகச் சிறப்பாக நடந்தது.

நெருங்கிய உறவினர் ஒருவர் உடல்நிலை சரியில்லாததால் அவரைப் பார்ப்பதற்காக மதுரை அலங்காநல்லூர் தாண்டி ஒரு கிராமத்திற்கு செல்ல வேண்டியிருந்ததால் மதியத்தோடு கிளம்பினேன். மதியத்திற்கு மேல் நடைபெற்ற விழா நிகழ்வுகளை மறுநாள் வலைப்பூக்களில் பார்த்தேன். தமிழ்முரசு மற்றும் தினகரன் நாளிதழ்களில் நான் பேசும்போது எடுத்த படம் வந்திருந்தது. தினகரன் நாளிதழ் குழுமத்திற்கு என் மனமார்ந்த நன்றி.

மதுரை உலகின் தொன்மையான நகரம் என்று கல்லூரி ஆண்டுவிழா மலரில் நான் எழுதிய கட்டுரையில் உள்ளதைத்தான் கொஞ்சம் பேசினேன். அந்தக் கட்டுரையைப் படத்தில் பார்க்கவும். அடுத்த பதிவர் சந்திப்பு புதுக்கோட்டையில்.

படங்கள் உதவி – தினகரன் (நாளிதழ்), ரகுநாத், இளஞ்செழியன்

madurai