மலையரசனைக் காணவந்த மாலழகன்

Posted: மார்ச் 30, 2015 in நான்மாடக்கூடல், பகிர்வுகள்

CIMG1876

இயற்கை எழிலும், வனப்பும் சூழ்ந்த மலைத்தொடர்கள் மலைகளின் அரசி, மலைகளின் இளவரசி என்றழைக்கப்படும்போது மலைகளின் அரசன் யாரென்று தெரியுமா? பார்க்கப் பார்க்கச் சலிக்காத அழகும், கம்பீரமும் ஒருங்கே கொண்ட மதுரை யானைமலைதான் மலைகளின் அரசன். உலகிலேயே நீண்ட ஒற்றைமலைகளில் யானைமலையும் ஒன்று.

திருமால் முல்லைநிலத் தெய்வம். அழகர்மலைக் காட்டில் வாழும் தெய்வம். காடு, மலைகளைக் காக்க காளமேகமாய் திருமோகூரில் வீற்றிருக்கும் தெய்வம். கூப்பிட்ட குரலுக்கு தம் அடிவரை நோக்கி ஓடிவரும் தெய்வம். யானையைக் காக்க சடுதியில் பறந்து வந்த தெய்வம்.

மாசி மகத்தை ஒட்டி பெருமாள் கோயில்களில் திருவிழாக்கள் கொண்டாடப்படுகிறது. மதுரை கூடலழகர் பெருமாள் கோயில், அழகர்கோயில், திருமோகூர் காளமேகப்பெருமாள் கோயில்களில் மாசித்திருவிழா வெகுவிமரிசையாக நடைபெறுகிறது. யானைக்கு முக்தியளித்த கஜேந்திரமோட்சலீலையை மாசித்திருவிழாவையொட்டி நிகழ்த்துகின்றனர்.

அழகர்கோயிலில் பார்க்கலாமென்றாலும் யானைக்கு முக்தியளித்த லீலையைக் காண யானைமலை நரசிங்கம் போகலாமென்று முடிவெடுத்தேன். அதுவும் திருமோகூரிலிருந்து காளமேகப்பெருமாள் யானைமலைக்கு வருகிறாரெனும்போது நாம் போக வேண்டாமா?. யானைமலையை மேகமாய் தழுவி மழை பெய்யச் செய்யும் காளமேகப்பெருமாள் திருவிழாவுக்கு வரும் போது காண வேண்டாமா?

நரசிங்கம் சாலையில் பலமுறை பயணித்திருக்கிறேன். விழாநாளில் அலைவது கொண்டாட்டமான அனுபவமல்லவா. அதுவும் திருமோகூர் காளமேகப்பெருமாளை வரவேற்று யானைமலை பின்னணியில் நரசிங்கப்பெருமாள் படத்துடன் நிறைய பதாகைகள் வைத்திருந்தார்கள்.

 CIMG1871

நரசிங்கம் தோரணவாயிலுக்குள் திருமோகூர் காளமேகப்பெருமாள் நுழையும்போது பார்த்தேன். பெருமாளைத் தொழுது பல்லக்கு வந்த வாகனத்துடன் சென்றேன். நள்ளிரவில்தான் கஜேந்திரமோட்ச லீலை நடக்குமென்றும், அதன்பின் கருட வாகனத்தில் கோயிலுக்கு செல்வாரென்று கோயில்பணியாளரிடம் கேட்டறிந்தேன். சிறுவர்கள் வெகுஉற்சாகமாக டயர்வண்டியில் வைத்து காளமேகப்பெருமாளை ஊருக்குள் அழைத்துச் சென்றனர்.

CIMG1880

நரசிங்கம் சாலை முழுக்க உற்சாக வெள்ளமாகயிருந்தது. ஆங்காங்கே தாகம் தணிக்க தண்ணீர் பந்தல்கள். பெரும்பாலான இடங்களில் ஆரஞ்சு, திராட்சை சுவை மற்றும் வண்ணங்களில் செயற்கை குளிர்பானங்களையே வழங்கினர். இது உடல்நலத்திற்கு ஏற்றதல்ல. நம் முன்னோர்கள் வெயிலுக்கு இதமாய் வழங்கிய அற்புதக் கொடைகளான நீர்மோரையும், பானகத்தையும் விட்டு நாவின் சுவைக்கு பழகி தண்ணிரைக் கூட குடிக்க மறுக்கிறோம்.

CIMG1889

நரசிங்கத்தில் ஆங்காங்கே திருக்கண்களை எல்லாம் அழகாய் அலங்கரித்து அலங்காரனுக்காக காத்திருந்தார்கள். வாசல் தெளித்து வண்ணக் கோலமிட்டு காளமேகப்பெருமாள் வருகைக்காக காத்திருந்தார்கள். தீபங்களை ஏற்றி திருமோகூரானுக்காக காத்திருந்தார்கள். காத்திருந்த அடியவர்கள் மனங்குளிரும் வண்ணம் மாலழகன் வந்து கொண்டிருந்தார். திருமாலிருஞ்சோலைமலையழகன் மதுரை நோக்கி வருவது போல கள்ளர் வேடமிட்டு கரியமாலழகன் வந்து கொண்டிருந்தார்.

மக்கள் கூட்டங்கூட்டமாக சாலைகளில் அலைந்து கொண்டிருந்தனர். இரவை பகலாக்கும் விளக்குகளும், விதவிதமான தின்பண்டங்களும், குழந்தைகளுக்கான விளையாட்டுச் சாமான்களும், இராட்டினங்களும் என வேடிக்கை பார்த்துக் கொண்டே நடந்தோம். ஜாலியாக கம்ப்யூட்டர் ஜோதிடம் பார்த்துக் கொண்டிருந்த சிறுவர்களைப் பார்த்தோம். மிளகாய் பஜ்ஜி வாங்கித் தின்றோம். உடன்வந்த தம்பி கனசதுரம் ஒன்றை வாங்கினான்.

CIMG1891

CIMG1894

யானைமலை கருமையாய் மறைந்திருக்க மேலே வானம் அடர்நீலமாகயிருந்தது. நம்பிக்கை ஒளியாய் நிலவொளி மெல்ல யானைமலை முகட்டில் பரவத்தொடங்கியது. அடர்நீலவானம் வெண்நீலவானமாகத் தொடங்கியது.

CIMG1911

திருமோகூரான் யானைமலை நரசிங்கப்பெருமாள் கோயில் முன்வர அவரைக் காண சந்திரன் ஓடோடி வந்தான். அற்புதமான தரிசனம். முழுநிலவு யானைமலைக்கு மேலே ஒளிர ஒருபுறம் திருவிழா என கொண்டாட்டமாகயிருந்தது.

CIMG1898

கோயில் முன்புள்ள ஒரு திருக்கண்ணில் யானை மற்றும் முதலை பொம்மைகளை வைத்திருந்தனர், இறைவனின் அருளை நாடகமாக நிகழ்த்திக் காட்டுவதற்கு. யானை காலை முதலை கவ்வியிருக்க, யானை கூப்பிய தும்பிக்கையோடு திருமாலை நோக்கியிருக்க, அடியவர் துயர் தீர்க்க இன்முகத்தோடு வரும் பெருமாளை பக்தியோடு கருடாழ்வார் சுமந்திருக்கும் திருக்காட்சி சித்திரமாய் வைத்திருந்தனர். எல்லாவற்றையும் பார்த்தோம். அங்கிருந்து தாமரைக்குளம் நோக்கி நடந்தோம். அங்குள்ள ஒரு மண்டபத்தில்தான் இரவு காளமேகப்பெருமாள் வீற்றிருக்க குளக்கரையில் இந்நிகழ்வை நிகழ்த்துவார்களாம்.

CIMG1908

காளமேகப்பெருமாள் ஒவ்வொரு திருக்கண்ணாக நோக்கி வர அவருக்கு முன்பாக கோயில் நாயனகாரும், மேளக்காரரும் வாசித்துக் கொண்டு வந்தனர். பெட்ரோமாக்ஸ் தூக்கி வந்த பெரியவர்கள், திரி பிடித்த வந்த இளைஞர்களைப் பார்த்தேன். திருவிழா நடக்கும் இடங்களுக்கெல்லாம் விளையாட்டுச் சாமான்களையும், பீமபுஸ்டி அல்வாக்கடைகளையும் சரியாகக் கொண்டுவந்து போடுபவர்களுடன் நானும் ஐக்கியமாக விரும்புகிறேன். திருவிழா திருவிழாவிற்கு ஊர் ஊராய் சுற்றித் திரியணும் போலிருக்கிறது.

CIMG1879

CIMG1893

அழகர்கோயில் நூலில் தொ.பரமசிவன் அய்யா கஜேந்திர மோட்சத்திற்கு திருமால் கள்ளர் வேடமிட்டு வருவது குறித்து எழுதியிருக்கிறார். கி.பி.1700களில்  திருமோகூர் கோயிலில் உள்ள விக்கிரகங்களை ஆற்காடுநவாப் படைகளும், ஆங்கிலேயப் படைகளும் சேர்ந்து கொள்ளையடித்துச் செல்ல கள்ளர்கள் அந்த விக்கிரங்களை மீட்டுக் கொண்டு வந்து கொடுத்தனராம். அதற்காக திருமோகூர் கோயிலில் தேரிழுக்கும் உரிமையையும், கஜேந்திர மோட்சத்திற்கு கள்ளர் வேடமிட்டு பெருமாள் வருவதையும் செய்தார்களாம்.                    (நன்றி – தொ.பரமசிவன்)

கஜேந்திர மோட்சம் திருவிழா பார்த்தாச்சு. கள்ளர் வேடமிட்டு வருவது குறித்தும் அறிந்தாச்சு. கஜேந்திரன்னா யானைன்னு நமக்குத் தெரியும். எதற்காக இதைக் கொண்டாடுறாங்கன்னு தெரிஞ்சுக்க வேண்டாமா?. கஜேந்திர மோட்சம் குறித்த கதையை இளம்பிராயத்தில் கேட்டிருக்கிறேன். சமீபத்தில் தமிழ் இந்துவில் ஆனந்தஜோதியில் இதைக் குறித்து கொஞ்சம் வாசித்தேன். கேட்ட கதையையும், வாசித்த கதையையும் சேர்த்துச் சொல்கிறேன்.

மன்னனொருவன் திருமால் மீது ஆழ்ந்த பக்தி கொண்டவன். எந்நேரமும் திருமாலின் திருநாமத்தையே சுவாசித்துக் கொண்டிருப்பவன். ஒருமுறை தன்னை மறந்து பக்தியில் திளைத்திருந்த வேளையில் கோவக்கார முனிவர் துர்வாசர் வந்துவிடுகிறார். மன்னனோ மாலழகனின் நினைப்பில் கண்டுகொள்ளாமலிருக்கிறார். மதங்கொண்ட யானையாகப் போவென சாபமிடுகிறார். பின் மனமிறங்கி திருமாலே வந்து உனக்கு மோட்சமளிப்பார் என்று சாபவிமோசனம் சொல்கிறார். மதங்கொண்ட யானையாய் மன்னன் பிறந்தாலும் திருமால் மீது பக்தி கொண்டிருக்கிறார்.

thirumohoor

ஒரு குளத்தில் வந்து போனவர்களையெல்லாம் இழுத்து வம்பிழுத்த அரக்கன் அகத்திய மாமுனியிடம் தன் விளையாட்டை காட்ட அவர் முதலையாகப் போக சாபமிடுகிறார். பின் திருமாலால் மோட்சம் கிடைக்குமென வரமும் தருகிறார். முதலை குளத்திலிருப்பதால் எந்த விலங்கும் நீரருந்தக்கூட வருவதில்லை. ஒருமுறை மதங்கொண்ட யானை இந்தப்புறம் வந்து குளத்திலிருந்த பூவை பெருமாளுக்கு பறிக்க, முதலை யானை காலைக்கவ்வ, வலியில் ஆதிமூலமே என யானைப் பிளிற, திருமால் ஓடோடி வருகிறார். கருடன் வந்து திருமாலை சுமக்க சக்கரத்தை ஏவி முதலையைக் கொள்கிறார். யானையும், முதலையும் மோட்சம் அடையும் இந்த திருலீலை கஜேந்திர மோட்சம் என்றழைக்கப்படுகிறது. இதை கேட்பவர்கள், படிப்பவர்களுக்கு இறுதிக்காலத்தில் இடர் வராது என்பது நம்பிக்கை. நல்லதுதானே.

Advertisements
பின்னூட்டங்கள்
  1. cheenakay சொல்கிறார்:

    *​அன்பின் சித்திர வீதிக்கார, *

    *கண்டு நீண்ட நாட்களாகி விட்டன.*

    *மலையரசனைக் காண வந்த மாலழகன் -பதிவும் பதிவில் உள்ள புகைப் படங்களூம் அருமை.
    பதிவிற்குப் பாராட்டுகள். *

    *சித்திர வீதிக்காரனுக்கும் பாராட்டுகள்*

    *நல்வாழ்த்துகள்*
    *நட்புடன் சீனா*

    *நல்வாழ்த்துகள்*
    *நட்புடன் சீனா *

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s