நாங்கள் தொடுத்த வினாக்கள் (குமிழி மடை உள்ளிட்டவை)

Posted: ஜூலை 27, 2019 in பார்வைகள், பகிர்வுகள்

ஒரு எளிய, இனிய நிகழ்வு

மண்ணும் நீருமாய் பல்லாயிரம் கால்களும் கணுக்களும் கொண்டு நமது நிலமெங்கும் பரந்த பேருடலி ஒன்று மழைநீர் சேகரித்து உயிர்ப்பால் சுரக்கிறது.  அத்தகைய சங்கிலித்தொடர் கண்மாய், கால்களின் உள்ளூர் நிலை பற்றியே எனது கண்மாய் வினா-விடைப் போட்டிவைத்தோம். உள்ளூரின் நீரிடங்கள் சார்ந்து கேள்விகள் கேட்டிருந்தோம். விடைகளை எழுதுவதற்காக தாள்களும் வழங்கியிருந்தோம்.

இலக்கியம் கூறுவதுபோல எட்டாம் நாள் பிறை வடிவில் அமைந்தது எங்கள் கண்மாய். பெரிய மடைக்குப் பின்னே H வடிவில் இரு பெரும்தூண்களும், குறுக்குக் கற்களும் கொண்ட அமைப்பு ஒன்று உள்ளது. அதை அளவுக்கல் என்றே சொல்லக் கேட்டிருக்கிறோம்.

அதில் குறிப்பிட்ட மட்டத்துக்குக் கீழே போனால் மடைவழியே நீர் திறப்பதைக் குறைக்கவேண்டும், அதிகமானால் மிகைநீரை வெளியேற்ற வேண்டும். இவ்வளவுதான் அதன் பயன்பாடு என்று அறிந்திருந்தோம். பின்பு தஞ்சை ஆ. மாதவனின் தொடர் டிவீட்டு ஒன்றின் வழியே அது குமிழி மடை என்று அறிந்தோம்.

ஏரியில் சேரும் வண்டலையும் சகதியையும் ஏரியிலிருந்து வெளியேற்றும் அமைப்புதான் குமிழி என்னும் தொழில்நுட்பம். மடையில் இருந்து கண்மாயின் உட்புறமாக சுமார் 300 அடி தொலைவில் இருக்கும். பெரிய தொட்டி போன்ற அமைப்பில் இயங்கும் குமிழியில் சுரங்கப்பாதை போல ஒன்று இருக்கும். இதன் நுழைவாயில் கண்மாய்க்குள்ளும், வெளிவாயில் கரைக்கு வெளியே பாசனக்கால்வாயிலும் இருக்கும். அதிகமான வண்டல் சேர்ந்தபின் இதைத் திறந்துவிடுவார்கள். குறுக்குக் கல் நடுவே உள்ள துளைகள் வழி செருகப் பட்ட அடைப்புக்கல்லை நீக்கியவுடன் சேறோடித் துளை வழியாக வண்டலும் சேறும் கண்மாய்க்கு வெளியே போய் விழுந்து வயலுக்கு உரமாகும். இது நாளடைவில் வழக்கொழிந்துவிட்டது என்று தெரிந்துகொண்டோம்.

இதுபோலவே எங்கள் ஊரில் உள்ள கலிங்கு தரை மட்டத்தில் வரத்துக்காலில் இருக்கிறது. அடுத்துள்ள கண்மாய்களுக்குத் தேவைப்பட்டால் எங்கள் கண்மாயில் நீர்நிரம்பும் முன்பே திறந்துவிட முடியும். அடுத்துப்போனால் ஆறுதான் என்னுமளவுக்கு கிட்டத்தட்ட கடைப்பகுதியாகவும், ரயில் தண்டவாளத்தை ஒட்டியும் உள்ள விளாங்குடி கண்மாயில் உள்ள கலிங்கானது கண்மாய் நிறைந்தபிறகு மேல்வழிந்தோடி மறுகால் செல்லும்வகையில் அமைந்துள்ளது.

பெரிய கண்மாய் தவிர்த்து, சின்னக் கண்மாய், ஊருணி போன்றவையும், ஓடைகள், வாய்க்கால்கள், கிணறுகளுமாய் செழிப்புற இருந்த ஊர்தான் என்பதால் இன்றளவும் நீரைச் சிறுகப் புழங்கும் பழக்கம் கைவராத ஊர். கரண்டு போனால் கடைசியாக மிஞ்சியிருக்கும் நிலத்தடிநீர் தொட்டியேறாது என்ற இன்றைய நிலையில் இந்த நுட்பங்களைப் பேசத்தான் இதுபோன்ற போட்டிவைத்தோம்.

6 முதல் 8 ஆம் வகுப்புவரை படிக்கும் 43 பேரில் 36 மாணவர்கள் விடையளித்தார்கள். அவர்கள் தந்த பதில்களில் இருந்து நிறையக் கற்றுக்கொண்டோம். அவை அடுத்த பதிவில்.

மனம் கவர்ந்த மாணவர் பதிவுகள்

பகல்வீடு

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s