மனம் கவர்ந்த மாணவர் பதிவுகள்

Posted: ஜூலை 27, 2019 in பார்வைகள், பகிர்வுகள்

ஒரு எளிய, இனிய நிகழ்வு

நாங்கள் தொடுத்த வினாக்கள் (குமிழி மடை உள்ளிட்டவை)

எனது கண்மாய் வினா-விடைப் போட்டியில் மாணவர்கள் எழுதியிருந்தவற்றில் இருந்து சில குறிப்பிடத்தக்க அம்சங்கள் இதோ:

  • தமிழின் இயல்பான ஒலிநயம் தோன்ற அடுத்தடுத்த சொற்களை இயல்பாகவே அமைத்திருந்தார்கள். எடுத்துக்காட்டாக, பட்டாம்பூச்சிக்கு அடுத்து தும்பி என்றோ வெறும் தட்டான் என்றோ எழுதாமல் ‘பட்டாம்பூச்சி, தட்டான்பூச்சி’ என்று எழுதியிருந்தார்கள். இதுபோலவே ‘மழை விட்டில், மர விட்டில்’;  ‘வண்டுகள், நண்டுகள்’; ‘பொறி வண்டு, பொன் வண்டு’ என்று சொற்றொடர்கள் சந்த நயத்தோடு இருந்தன. ஆங்கிலச் சொற்கள் கலந்து உடைந்து உடைந்து நொறுங்கிச் சிதைந்த மொழியை அன்றாடம் கேட்டு, பார்த்து வருகிற சூழலில் இது மாறுபாடாக இருந்தது.
  • உயிரினங்களைக் குறிக்க இவர்கள் பயன்படுத்தும் பல சொற்கள் இன்னும் பறவையியல் மொழிபெயர்ப்பாளர்களைச் சென்றடையவில்லை. எருமைச்சீயான், முகவண்டு, நட்டுவாக்காலி, ராமக்கோழி, அரிப்பூச்சி, அனாதைப்பூ போன்றவை.
  • மின்மினிப் பூச்சியை எழுதுவது இயல்புதான். கம்பளிப்பூச்சியையும் எழுதியிருந்தார்கள். கொசுவும், தோசிக்கொக்கும் இடம்பெற்றிருந்தன. மஞ்சணத்தி, கனகாம்பரம் இவற்றோடு மழுமட்டைக் குச்சி எனப்படும் காட்டாமணக்குச் செடியின் ரேடியோப் பூவான அனாதைப் பூவுக்கும் இடமிருந்தது.
  • முக்குளிப்பானுக்கு ‘நீர்மூழ்கி வாத்து’ என்று பெயர்சூட்டி இருந்தான் ஒருவன். ‘நீண்ட அலகுகளுடனும், நீண்ட கால்கள், அகலமான இறக்கைகள் கொண்ட வினோதப் பறவை’ என்று நீர்ப்பறவையொன்றை ஒருவன் சுட்டியிருந்தான். ஒரு சிறுமி சித்தெறும்பைச் ‘சிற்றெறும்பு’ என்றெழுதாமல் சிட்டு+எறும்பு= சிட்டெறும்பாகக் கற்பனை செய்து பறக்கவிட்டிருந்தார்.
  • அதிபுனைவில் ஈடுபட்ட ஓரிருவர், நாய்கள் மட்டுமே உலவும் – அதுவும் கார்த்திகையில் மட்டுமே சுறுசுறுப்பாக உலவும் – ஊரில் ‘வெருகு என்னும் காட்டுப்பூனை, நடுநிசியில் ஊளையிடும் நரிகள், ஓநாய்கள், முதலை எல்லாம் இருப்பதாக எழுதியிருந்தார்கள்.
  • கழிவுநீர் என்றால் சாக்கடை என்று பொதுவாக மனதில் பதிவாகிவிட்டது. ஆனால், ஒரு ஊரின் கண்மாய் நிரம்பிய பிறகு மிகையாக உள்ள நீர் என்பதற்கு கழிவுநீர் என்ற சொல்லைத்தான் பயன்படுத்துவது வழக்கம். இதை உள்வாங்கவே சற்று நேரம்பிடித்தது. கழிவுநீர் என்ற சொல்லை சரியாகப் புரிந்துகொள்வதே நீர்மேலாண்மையின் ஒரு பாடம்தான் என்று மாணவர்கள் கற்றுக்கொடுத்ததாகவே எடுத்துக்கொள்கிறோம்.
  • ஊரில் இடப்பெயர்கள் எப்படி மாறியிருக்கின்றன என்பது தெளிவாகப் பதிவாகியிருந்தது. மடைகள், நீர்வழிகளின் பெயர்களைச் சொல்லும்போது பழைய பெயர்களான இலுப்பையடி, செம்மங்குளம், சுத்து மருதவள்ளி, தாழம்பூ முனியாண்டி, செட்டிவயல், பூசாரி மானியம் போன்றவற்றோடு புதிதாக முளைத்த பெயர்களான சத்தியா நகர், காய்கறி வணிக வளாகம் போன்றவை சேர்வது ஒரு கால வரைபடத்தை அளிக்கிறது.
  • விடை எழுதி வழங்கிய மாணவர்களின் 37 பெயர்களில் 21 பெயர்களை வடமொழி எழுத்துகள் இல்லாமல் எழுதிவிட முடிந்தது.
  • கவிதைப் பரப்பு பயமூட்டுவதாகத்தான் இருக்கிறது. ‘நீயின்றி ஒரு நொடிகூட வாழாது என் சுவாசம்’ என்று எழுதுவதுதான் கவிதை என்று பலரிடமும் பதிவாகி இருக்கிறது. ‘அன்பே அன்பே எனக்கே யாரும் இல்லையே’ என்றெல்லாம் ஒரு சிறுவன் எழுதியிருந்தான். ‘ஏரிக்கரைப் பூங்காற்றே நீ போறவழி தென்கிழக்கோ’ என்ற திரைப்பாடலை எழுதிவைத்தவனைப் பாராட்டலாம். ‘இறைச்ச கிணறுதான் ஊறும்; இது எங்க ஊரு சொலவடை ஆகும்’ என்று எழுதியவனைக் கோயில்கட்டியே கும்பிடலாம். கைபேசியில் கூகிளைத் திறந்து கவிதை என்று தட்டி வருவதை அப்படியே எழுதிவைக்கிறவர்களை முட்டிக்கு முட்டி தட்டவேண்டும்.
  • காலாங்கரை, வரத்துக்கால், மறுகால், கலிங்கு, மடை, சுழிசு (sluice), சட்ரசு (shutters) என்றெல்லாம் பாசனம் சார்ந்து சொற்கள் புழக்கத்தில் இருக்கவே செய்கின்றன.
  • நீரிடங்களின் பண்பாட்டு முக்கியத்துவம் பதிவாகி இருந்தது. முளைப்பாரி கரைக்கவும், வினாயகர் சிலையைக் கரைக்கவும் ஊரணி உதவுகிறது என்று எழுதியிருந்தார்கள். ஐப்பசி, கார்த்திகை என்று பெரும்பாலும் தமிழ் மாதப் பெயர்களையே எழுதியிருந்தார்கள்.
  • சில நேர்மையான பதிவுகள் நெகிழ்ச்சியூட்டுவதாக இருந்தன. ‘இந்தக் கண்மாயில்தான் கீரை, பாகற்காய், வெள்ளரிச் செடிகள் போட்டு விற்பனை செய்கிறோம். அது தாய்போல எங்களுக்கு உதவுகிறது’ என்று ஒரு விடை. ‘எங்கள் கிணற்று நீர் சற்று உவர்ப்பாக இருப்பதால் எதுவும் சரியாக விளைவதில்லை’ என்று ஒரு ஆதங்கம். அணையிலிருந்து வருகிறது, மலையிலிருந்து வருகிறது என்றெல்லாம் புழுகாமல் தான் பார்த்தவரை குடிநீர்த் திட்ட ‘ஆனைக்குழாய்’ கசிவில்தான் நீர் வருகிறது என்றொரு வெளிப்படையான பதில். எந்த மாதம் நீரற்றுப் போகும் என்ற கேள்விக்கு ‘அதுவாக வற்றுவதில்லை. ஏலம் எடுத்தவர்கள் குட்டை குட்டையாக நீரை இறைத்து மீன்களையும் நீரையும் காலிசெய்து விடுவார்கள்’ என்று பளிச்சென்று எழுதியிருந்தார் ஒரு மாணவர்.
  • கரிசனம் இயல்பாக வெளிப்பட்டிருந்தது. ‘மரம் வெட்டுவதாக இருந்தால் சீமைக் கருவேல மரத்தை வெட்டுங்கள், பிளீஸ்’ என்றது ஒரு பிள்ளை. ‘சம்பை ஊரணி கெட்டுப் போய்க்கிடக்கிறது, அதை எப்படியாவது சரிசெய்யவேண்டும்’ என்கிறான் ஒரு பையன்.

அசர் அறிக்கை, அது இதுவென்று ஒரேயடியாகப் பயப்படும் அளவுக்கு எல்லாம் இல்லை கல்வித்தரம், நாம் படித்ததைவிட நன்றாகத்தான் படிக்கிறார்கள் என்று சிற்றறிவுக்குப்படுகிறது.

பகல்வீடு

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s