14வது மதுரை புத்தகத் திருவிழா

Posted: செப்ரெம்பர் 22, 2019 in பார்வைகள், பகிர்வுகள்

சலங்கை கட்டிய கால்களைப் போல, அரிதாரம் பூசிய கலைஞரைப் போல, வாசிப்பின் நெடியேறியவர்களால் புத்தகங்களை ஒருபோதும் கைவிட முடியாது. புத்தகம்தான் இந்த உலகின் பெரும் ரசவாதி.

அ.முத்துக்கிருஷ்ணன்

2006இல் மதுரை புத்தகத் திருவிழா தொடங்கியதிலிருந்து 2019 வரை ஒவ்வொரு ஆண்டும் மறக்க முடியாத பல அற்புத நினைவுகளைக் கொடுத்துக் கொண்டிருக்கிறது. இந்த ஆண்டும் மறக்க முடியாததே.

‘திருவிழாக்களின் தலைநகரம் – மதுரை’ நூல் மதுரை புத்தகத் திருவிழாவில் நூறுக்கும் மேலான பிரதிகள் விற்று பெருமகிழ்ச்சியை கொடுத்துள்ளது. நூலை வாங்கிய சிலர் என்னிடம் கையொப்பம் கேட்டும், என்னோடு நிழற்படம் எடுத்தும் தங்கள் அன்பால் என்னை நெகிழ வைத்துவிட்டார்கள்.

எழுத்தாளருக்கும் வாசகருக்கும் உறவு ஆத்மார்த்தமானது. இந்தாண்டு மதுரை புத்தகத் திருவிழாவிற்கு வரும் எஸ்.ரா.விடம் திருவிழாக்களின் தலைநகரம் நூலிற்கு அவரது இணையதளத்தில் கொடுத்த வாழ்த்துரைக்கு நன்றி சொல்லவும், கேட்டி வில்காக்ஸ் அம்மையார் குறித்து எழுதிய சிறுகதை குறித்து அவரது கருத்து கேட்கவும் எண்ணியிருந்தேன். மதுரை புத்தகத்திருவிழாவில் தேசாந்திரி அரங்கில் எஸ்.ரா.வைப் பார்த்ததும் அன்போடு நல்லாருக்கீங்களா என கேட்டதோடு, திருவிழா நூல் நன்றாகயிருந்தது என்றார். அதைவிட ஆச்சர்யம் தரக்கூடிய செய்தி கேட்டி வில்காக்ஸ் குறித்து எழுதிய சிறுகதை நன்றாக வந்துள்ளதெனச் சொன்னார். இதைக் குறித்து அவரிடம் நான் ஒரு வார்த்தை கூட சொல்லாத போதும். ஆச்சர்யங்கள் நிறைந்ததுதானே வாழ்க்கை.

மதுரை புத்தகத் திருவிழாவில் மதுர வரலாறு மற்றும் திருவிழாக்களின் தலைநகரம் மதுரை நூல்கள் தமிழினி, கருத்து = பட்டறை, டிஸ்கவரி புக் பேலஸ், யாவரும் அரங்குகளில் கிடைத்தது. டிஸ்கவரி புக் பேலஸில் வைத்து திருவிழாக்களின் தலைநகரம் குறித்து கார்த்திக் புகழேந்தியுடன் உரையாடிய வீடியோ ஷ்ருதி டிவியின் முகநூல் பக்கத்தில் வந்துள்ளது. மதுரை புத்தகத் திருவிழா, பண்பாட்டு ஆய்வாளர் தொ.பரமசிவனின் அழகர் கோயில், பசுமை நடை குறித்தெல்லாம் பேச முடிந்தது. ஷ்ருதி டிவி கபிலனுக்கும், சுரேஷ் அவர்களுக்கும் நன்றி.

தமிழினி அரங்கில் தமிழினியின் புதிய வெளியீடுகளும், வாசல் பதிப்பகத்தின் புதிய வெளியீடுகளும் வெளியிடப்பட்டு அறிமுகம் செய்யப்பட்டன. இந்நிகழ்வை எழுத்தாளர் அ.முத்துக்கிருஷ்ணன் ஒருங்கிணைத்தார். இந்நிகழ்வில் டி.பத்மநாபன் எழுதிய ‘சுடரும் சிறுமி’ சிறுகதைத் தொகுப்பை பசுமைநடை நண்பர் சரவணன் வெளியிட நான் பெற்றுக் கொண்டேன். இந்த வாய்ப்பை வழங்கிய தமிழினிக்கு நன்றி. மதுரை இலக்கிய நண்பர்களும், பசுமை நடை நண்பர்களும் கலந்துகொண்டனர்.

2019இல் 14வது மதுரை புத்தகத் திருவிழாவில் வாங்க வேண்டிய புத்தகங்கள் பட்டியல் ஒன்றை வைத்திருந்தேன். ஆனால், வாங்கிய புத்தகங்கள் எல்லாமே வேறு. பப்ளிகேஷன்ஸ் டிவிஷன் அரங்கில் 1992இல் வந்த புத்தகங்கள் இரண்டு ரூபாய்க்கு கதைகள், கட்டுரைகள் விற்க அதில் ஆறேழு தலைப்புகளில் 75 புத்தகங்கள் வாங்கி பத்துக்கும் மேலானவர்களுக்கு கொடுத்தேன். குறைந்த செலவில் வாசிப்பின் மீது மற்றவர்களுக்கு ஒரு தூண்டுதலை ஏற்படுத்த கிட்டிய வாய்ப்பு. மேலும், ஆசிரியர் தினத்தன்று என்னுடைய மகளுடைய ஆசிரியர்கள் நால்வருக்கு புத்தகங்களை கொஞ்சம் வாங்கி பரிசளிக்க கொடுத்துவிட்டேன். எஸ்.ராமகிருஷ்ணனின் ‘ஒரு சிறிய விடுமுறைக்கால காதல் கதை’ நாவலும், ‘இலக்கற்ற பயணி’ கட்டுரைத் தொகுப்பும் வாங்கினேன். எஸ்.ரா.வின் உரை தந்த ஈர்ப்பால் அந்த்வான் து செந்த் – எக்ஸ்பெரி எழுதிய, க்ரியா பதிப்பகம் வெளியிட்ட  குட்டி இளவரசன் நாவலையும் வாங்கினேன். இரா.நடராஜனின் 10 எளிய இயற்பியல், வேதியியல், உயிரியல் சோதனைகள் நூலை வாங்கினேன். குழந்தை வளர்ப்பு குறித்து வெளிவரும் ‘செல்லமே’ மாத இதழுக்கு சந்தாதாரர் ஆனதும், அங்கிருந்த பழைய இதழ் தொகுப்புகளை கொஞ்சம் எடுத்து வந்ததும் இந்தாண்டுதான்.

பரமக்குடியிலிருந்து புத்தகத் திருவிழாவிற்கு வந்திருந்தவர் என்னை சந்தித்து மதுரை வாசகன் வலைப்பூவைத் தொடர்ந்து வாசித்து வருவதாக குறிப்பிட்டார். ரொம்ப மகிழ்ச்சியாக இருந்தது. சமீபமாக அதிகம் எழுதாத குற்றவுணர்ச்சியும் மறுபுறம் ஏற்பட்டது.

ஆகஸ்ட் 30 முதல் செப்டம்பர் 9 வரை 11 நாட்கள் நடந்த புத்தகத் திருவிழாவில் 10 நாட்கள் புத்தகத் திருவிழாவிற்கு சென்றேன். விடுமுறை நாட்களில் நல்ல கூட்டமிருந்தது. மற்ற நாட்களில் சுமாரான கூட்டமே. பள்ளி, கல்லூரி மாணவர்களுக்கு வாசிப்பின் மீதான காதலை ஆசிரியர்களும், பெற்றோர்களும் ஏற்படுத்தவில்லை. ஊடகங்களும் புத்தகத் திருவிழாவிற்கு அதிக முக்கியத்துவம் கொடுப்பதில்லை.

மதுரை புத்தகத் திருவிழா எனக்கு குலதெய்வத் திருவிழா போல. மதுரை புத்தகத்திருவிழாவில்தான் என் வாழ்வை மாற்றிய பல ஆளுமைகளை சந்திக்கும் வாய்ப்பு கிட்டியது. அதிலும் குறிப்பாக 2007இல் நடந்த இரண்டாவது மதுரை புத்தகத் திருவிழாவில் பண்பாட்டு ஆய்வாளர் தொ.பரமசிவன் அய்யா அவர்களின் உரையையும், தேசாந்திரி எஸ்.ராமகிருஷ்ணன் கதைசொல்லியதையும் கேட்கும் வாய்ப்பை தந்தது. அதோடு அந்தாண்டு மனோகர் தேவதாஸ் வரைந்து எழுதிய மை மதுரை புத்தகம் வாங்கினேன். இன்றுவரை அதிக விலையில் வாங்கிய புத்தகம் அதுதான்.

புத்தகத்திருவிழாவில் நண்பர்களோடு புத்தகங்கள் குறித்து, வாசிப்பு குறித்து உரையாட முடிந்தது. நிறைய புத்தகங்கள் வாங்க முடியவில்லையே என்று வருந்தியபோது நண்பரொருவர் “எல்லாப் புத்தகங்களையும் வாங்க வேண்டும் என்று யோசிக்காதீர்கள். நண்பர்களிடம் வாங்கிப் படியுங்கள். நூலகங்களுக்குச் செல்லுங்கள்” என்ற யோசனையைச் சொன்னார்.  ஆனாலும், வாசிப்பகம் ஒன்றைத் தொடங்கும் எண்ணமிருப்பதால் நிறைய புத்தகங்கள் வாங்க வேண்டும். அடுத்தாண்டு இலக்குகள் நிறைவேறும்.

பேராசிரியர் சுந்தர்காளி – பரிமளம் சுந்தர் தம்பதியர் மொழிபெயர்ப்பில் வந்த ‘காஹா சத்தசஈ’யிலுள்ள இந்தக் கவிதையில், நல்ல புத்தகங்கள் என்ற வார்த்தையையும் சேர்த்துக் கொள்ளுங்கள்.

காஹாக்கள்
பாடல்கள்
யாழிசை
அணுக்கமான பெண்
சிலர் இவற்றைச் சுவைத்ததேயில்லை.
அதுவே அவர்தம் தண்டனை.

காஹா சத்தசஈ

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s