வாசிப்பை நேசிப்போம் போட்டி # 10, 2019

Posted: நவம்பர் 9, 2019 in பார்வைகள், பகிர்வுகள்

யாரும் யாரையும் தாண்டட்டும்
நான் யாரையும் தாண்ட முயல்வதில்லை.
என்னையே நான் கூட.

வண்ணதாசன்

முகநூலில் உள்ள நல்ல குழுக்களில் வாசிப்பை நேசிப்போம் குழுவும் ஒன்று. இந்த குழுவிலுள்ளவர்கள் தாங்கள் வாசித்த புத்தகங்கள் குறித்து அறிமுகம் செய்கின்றனர். இந்த குழுவின் ஒருங்கிணைப்பாளர்கள் ஆண்டிற்கு இரண்டு, மூன்றுமுறை வாசிப்பு போட்டியை நடத்துகிறார்கள். 30 நாள், 50 நாள், 100 நாள் என போட்டிகளை நடத்தியதில் நான் நான்கு முறை கலந்துகொண்டிருக்கிறேன். இதில் பங்குபெறுபவர்கள் அவர்கள் தினமும் வாசிக்கும் புத்தகங்களின் விபரங்களை கூகுள் டாக்குமென்ட்ஸ் பகுதியில் ஏற்றுவதற்கான இணைய இணைப்பையும் வழங்கிவிடுகிறார்கள். மறுநாள், போட்டியில் கலந்துகொள்ளும் நபர்கள் வாசித்த பக்கங்களின் அடிப்படையில் தரவரிசைப்பட்டியல், வரைபடம் என போட்டு வாசிப்பு மீதான ஆர்வத்தை உண்டாக்குகிறார்கள். மேலும், இதில் அதிகப்பக்கங்களையும், அதிகநாட்களும் வாசித்தவர்களைத் தேர்ந்தெடுத்து முதல் பத்திலிருந்து முப்பது நபர்களுக்கு புத்தகப்பரிசு வழங்குகிறார்கள். வாசித்த புத்தகம் குறித்து வாசிப்பை நேசிப்போம் முகநூல் குழுவில் சிறுபதிவு எழுதினால்தான் பரிசுபெறுவதற்கு தகுதியுடைய நபர்களாகத் தேர்தெடுக்கிறார்கள் என்பது சிறப்பு.

நானும் இதில் பங்கெடுத்து வாசிக்கத்தொடங்கினேன். அதன் வாயிலாக 8 புத்தகங்களை வாசிக்க முடிந்தது. அந்த நூல்கள் குறித்த சிறிய அறிமுகப்பதிவு.

செந்நிற விடுதி – பால்ஸாக் ஹொனேரே

டி பால்ஸாக், பிரான்ஸ் நாட்டில் 1799ல் பிறந்த எழுத்தாளர். இவர் கிட்டத்தட்ட நூறு நாவல்களையும், பல நாடகங்களையும் எழுதியுள்ளார். இவரது சிறுகதைகளும் குறிப்பிடத்தக்கவை. தமிழினி வெளியீடாக வந்துள்ள ‘செந்நிற விடுதி’ என்ற தொகுப்பை குறித்த சிறு அறிமுகம்.

பாலைவனத்தில், செந்நிற விடுதி, லா க்ராண்ட் பெர்தெஷே, நாத்திகரின் பூசை என்ற நாலு சிறுகதைகளில் என்னை மிகவும் ஈர்த்தது நாத்திகரின் பூசை என்ற கதைதான். இந்தக் கதை குறித்து சுருக்கமாக சொல்லிவிடுகிறேன். டெஸ்ப்ளேன் என்ற புகழ்பெற்ற மருத்துவர், நாத்திகர். இவரிடம் மருத்துவப் பயிற்சி பெற வந்த பியான்கன் என்ற இளம் மருத்துவரை தன்னருகிலேயே வைத்து நன்கு பயிற்சியளிக்கிறார். பியான்கன் ஒருமுறை நாத்திகரான டெஸ்ப்ளேன் தேவாலயத்திலிருந்து வருவதைப் பார்த்துவிடுகிறார். ஒருமுறை அவரிடம் கேட்ட பொழுது தான் நாத்திகராக இருந்தாலும், தான் மருத்துவம் படித்த காலத்தில் தனக்கு உதவிய மனிதருக்காக தேவாலயத்தில் பூசை செய்து வருவதைச் சொல்கிறார். வாசிக்கும் நாமும் அவரோடு சேர்ந்து நெகிழ்ந்து போகிறோம்.

அதேபோல இன்னொரு கதை பாலைவனத்தில். இதில் பாலைவனத்தில் தனியாக மாட்டிக்கொண்ட வீரனிடம் ஒரு சிறுத்தை வருகிறது. அன்பாக அவனுடன் விளையாடும் அதை எதிர்பாராதவிதமாக அந்த வீரன் கொன்றுவிடுகிறான். கொன்றபின் தன் வாழ்வில் கிடைத்த எல்லா விருதுகளையும் கொடுத்தாலும் அந்த சிறுத்தை கொடுத்த அன்பை பெற முடியாது என்பதை உணர்கிறான். மற்ற இருகதைகளும் குறிப்பிடத்தக்கவை. வாசித்துப்பாருங்கள்.


சிலுவைராஜ் சரித்திரம் – ராஜ்கௌதமன்

சிலுவைராஜ் சரித்திரம் ஒரு தன்வரலாற்று நாவல். இந்நாவல் 1950-இலிருந்து 1975 வரையிலான தன் வாழ்க்கையை சிலுவை என்ற கதாபாத்திரத்தின் வாயிலாக ராஜ்கௌதமன் எழுதியிருக்கிறார்.

கிராமத்தில் இளம்பிராயத்தில் அவரது வாழ்க்கை அல்லது அப்போது வாங்கிய அடிகள், அதன்பிறகு மதுரை சென்மேரீஸ் பள்ளியில் படித்த நாட்கள் மற்றும் விடுதியில் தங்கிப்பட்ட பாடுகள், பின் பாளையங்கோட்டை சேவியர் கல்லூரியில் விலங்கியல் படித்த நாட்கள் பின் தமிழ் டியூட்டராகி பின் தமிழ் எம்.ஏ படித்து வேலை கிடைக்காமல் வீட்டில் இருந்தபோது பட்ட துயரங்கள்தான் இந்நாவலின் கதை. ஆனால், அக்காலகட்ட வாழ்க்கை, சாதியின் வன்மை, மதத்தின் மறுபக்கம் எல்லாம் இந்நாவலின் வாயிலாகப் பதிவாகியுள்ளது. சிலுவை என்ற கதாபாத்திரம் நாவல் வாசித்ததும் நமக்கு மிகவும் நெருக்கமானவராகிவிடுகிறார்.

கணிதம் மட்டுமே இவருக்கு கடினம். மற்றபடி தமிழ், ஆங்கிலம், அறிவியல் எல்லாவற்றையும் விரும்பி படிக்கிறார். இவர் படிக்கும் முறையே அலாதியானது. இந்நாவலில் சிலுவை வாசிக்கும் எழுத்தாளர்கள், புத்தகங்கள் பற்றிய குறிப்புகளை வாசிக்கையில் தமிழிலக்கிய அறிமுகம் நமக்கு கிடைக்கிறது. தமிழினி வெளியீடாக இந்நாவல் வந்துள்ளது.


காஹா சத்தசஈ

சங்க அகப்பாடல்களைப் போல மஹாராஷ்டிரப் பகுதியில் வழங்கப்பட்ட பிராகிருத மொழியில் எழுதப்பட்ட பாடல்கள். இதைத் தொகுத்தவர் ஹால என்ற அரசன். நிறைய பாடல்கள் இவரே எழுதியது என்றும் சொல்கின்றனர்.

எழுநூறுக்கும் மேலான பாடல்களிலிருந்து 251 பாடல்களை பேராசிரியர்கள் சுந்தர் காளி, பரிமளம் சுந்தர் மொழிபெயர்த்துள்ளனர். இக்கவிதைகள் காமத்தை இலைமறைகாயாக மட்டுமல்லாமல் வெளிப்படையாகவே பேசுகின்றன.

இத்தொகுப்பிலுள்ள ஓரிரு கவிதைகள் உங்கள் பார்வைக்கு

  • வேலிப்புதர்களின் பின்னோ
    காற்றில் வளைந்தசையும்
    நாணற்புதர்களின் உள்ளோ
    தொந்தரவின்றிக் கலவிசெய்யும்
    மலைக்கிராமத்தில் வாழ்வோர்
    பாக்கியசாலிகள்
  • பூக்காரியிடம்
    விலையைக் கேட்பதைச் சாக்கிட்டுச்
    சுற்றிச் சுற்றி வருகிறான் அந்தப் போக்கிரி

    அவள் அழகிய தோள்களைக் கண்குளிரக் காண.
  • பார்,
    திருமணப் பாடல்களை
    அந்தப் பெண்கள் பாடத்தொடங்குகையில்
    மணப்பெண்ணுக்கு மயிர்க்கூச்செறிகிறது
    மணமகனின் பெயரை
    அவையும் கேட்கவிரும்புவது போல்.

நூறு ரூபாயில் மிக நேர்த்தியான தரத்துடன் இந்நூலை அன்னம் பதிப்பகம் வெளியிட்டிருக்கிறது. இந்நூலுக்காக ஒரு கட்டுரையைத் தட்டச்சு செய்து கொடுத்ததற்காக நூலில் பேராசிரியர் சுந்தர்காளி அவர்கள் என்னுடைய பெயரையும் நன்றி பட்டியலில் சேர்த்திருப்பதற்கு நன்றி.


வெக்கை – பூமணி

தலைப்பு வெக்கை என்றிருந்தாலும் நாவல் முழுக்க நீர்மையைப் பேசுகிறது. அரிவாள்வெட்டில் ஆரம்பமானாலும் அன்பையே மையஇழையாகக் கொண்டு ஓடுகிறது. இந்நாவலில் தந்தைக்கும் மகனுக்குமான அன்பு, அண்ணன் –தம்பி- தங்கையிடேயான அன்பு, தாய்மாமாவும் அத்தையும் தன் தங்கை குடும்பத்தின் மீது கொண்டுள்ள அன்பு, சகலைகளுக்கும், மைத்துனர்களுக்கிடையேயான அன்பும் புரிதலும், வீட்டில் வளர்க்கும் நாய்க்கும் அந்த சிறுவனுக்குமான அன்பு என நாவலின் எல்லாப் பக்கங்களிலும் அன்பே கொப்பளித்துப் பொங்குகிறது.

தந்தையும் மகனும் தனித்து ஒரு வாரம் வாழும் காலத்தில் மகன் சமைக்க அப்பா உண்ணும் காட்சி, மலைகளில் கிடைக்கும் விதவிதமான பழங்கள், மரங்களில் கிடைக்கும் பிசின், இருளில் தனிமையில் நட்சத்திரங்கள் மின்னும் வானம் என எல்லாமே அற்புதம்தான். திருவிழாக்களில் அலைந்து திரியும் எனக்கு இந்நாவலில் பதிவாகியுள்ள சுடுகாட்டில் நடக்கும் திருவிழாவையும் பதிவு செய்ய வேண்டுமென்ற ஆவல் உருவாகியுள்ளது. வெற்றிமாறன் இயக்கத்தில் தனுஷ் நடிப்பில் வந்துள்ள அசுரனில் தனுஷ் ஒவ்வொரு கனத்திலும் வன்முறையை தவிர்க்கத் துடிப்பது தன் குடும்பத்தின் மீதான அன்பினால்தான். அதனால்தான், தன் மகனுக்காக ஊரார் காலில் விழுகிறார். படத்தில் வன்முறைக் காட்சிகள் இருந்தாலும் அதன் பின்னால் ஓடுவது நீர்மைதான். வெக்கை பூமணியின் நல்ல படைப்பு. இன்று பரவலாகப் பேசப்படுவது பெருமகிழ்ச்சியளிக்கிறது.


தேவமலர் – ஸெல்மா லாகர்லெவ்

ஸெல்மா லாகர்லெவ் எழுதிய தேவமலர் நாற்பதுபக்க அளவு கொண்ட சிறிய கதைதான். ஐரோப்பிய இலக்கியத்தின் சிகரமாகத் திகழும் ஸ்காண்டிநேவிய இலக்கியம் திகழ்கிறது. ஸெல்மா லாகர்லெவ் நோபல்பரிசு பெற்ற எழுத்தாளர். ஸ்காண்டிநேவியர்கள் இறை நம்பிக்கை கொண்டவர்கள். க.நா.சு. அவர்களால் தமிழில் தேவமலர் மொழிபெயர்க்கப்பட்ட பதிப்பை வாசித்தேன். கீயிங்கே வனத்தில் ஊரினால் ஒதுக்கிவைக்கப்பட்ட திருடன் அவன் மனைவி மற்றும் ஐந்து குழந்தைகளுடன் வசித்துவருகிறான். அந்தக் காட்டில் கிறிஸ்துமஸ்க்கு முதல்நாள் இரவு கீயிங்கே வனம் விழித்துக்கொள்ளும் காட்சியை திருடனின் மனைவி மதத்தலைவர் ஹான்ஸிடம் சொல்கிறார். அவருக்கு அதைக்காணும் ஆவலில் தன் சீடனுடன் வருகிறார். வனம் விழித்துக்கொள்ளும் வேலையில் சீடனின் மடத்தனத்தால் அந்த அற்புதம் அதோடு நின்றுபோகிறது. எஸ்.ராமகிருஷ்ணனின் உரையிலிருந்து இந்தக் கதை மீதான ஈர்ப்பு ஏற்பட்டு வாசித்தேன்.


குட்டி இளவரசன் – அந்துவான்த் செந்த் எக்ச்பெரி

அந்துவான்த் செந்த் எக்ச்பெரி என்ற பிரெஞ்சு எழுத்தாளரால் 1943ல் எழுதப்பட்ட இந்த நாவல் தமிழில் 1981ல் மொழிபெயர்க்கப்பட்டது. இந்தநாவல் 173 மொழிகளில் மொழிபெயர்க்கப்பட்டுள்ளது. 80 மில்லியன் பிரதிகள் விற்பனையாகியிருக்கிறது. இதை வாசிக்கையில் தமிழிலும் இதுபோன்ற தரமான படைப்புகள் உலக மொழிகளில் வெளியாகி பல ஆயிரம் விற்கும் காலம் என்று வருமோ? குட்டி இளவரசன் நாவல் குறித்து எஸ்.ராமகிருஷ்ணனின் எழுத்தாலும், உரையாலும் ஈர்க்கப்பட்டு 2019 மதுரை புத்தகத்திருவிழாவில் க்ரியா பதிப்பக வெளியீடாக வந்த குட்டி இளவரசன் வாங்கினேன். பாலைவனத்தில் விமானம் பழுதடைந்து நிற்கும் வேளையில் குட்டி இளவரசனை சந்தித்த அனுபவத்தை விவரிக்கும் கதைதான் இந்நாவல்.  பேராசை இல்லாத மனது, தான் வரையும் பெட்டியைக் கூட வீடாக நினைக்கும் மனோபாவம் என நாம் தொலைத்த இளம்பிராயத்தை நினைவூட்டுகிறது இந்நாவல்.


அனல்ஹக் – வைக்கம் முகம்மது பஷீர்

பஷீரின் எழுத்துக்கள் எனக்கு மிகவும் பிடிக்கும். அவரது பால்யகாலசகி, பாத்திமாவின் ஆடு, எங்க உப்பப்பாவிற்கொரு ஆனையிருந்தது, மதில்கள் போன்ற நாவல்கள் வாசித்திருக்கிறேன். காலச்சுவடு வெளியிட்ட இந்திய கிளாசிக் சிறுகதைகள் வரிசையில் வெளியான பஷீரின் அனல் ஹக் என்ற சிறுகதைத்தொகுப்பை தல்லாகுளம் கிளைநூலகத்திலிருந்து எடுத்துட்டு வந்தேன். அதில் நிறைய கதைகளில் போலிஸ் ஸ்டேசனில் நடக்கும் லாக்கப் கொடுமைகளை எழுதியிருக்கிறார். நூறு ரூபாய் நோட்டு, போலீஸ்காரனின் மகள், நோட்டு இரட்டிப்பு, தங்க மாலை, ஏழைகளின் விலைமாது போன்ற கதைகள் மிகவும் பிடித்திருந்தன. கதைகளைச் சொல்லும்போது மெல்லிய நகைச்சுவையோடு சொல்லுவது அவரது பாணி. தங்க மாலை, நோட்டு இரட்டிப்பு எல்லாம் அந்த வகையில் சொல்லலாம்.


சில இறகுகள் சில பறவைகள் – வண்ணதாசன்

வண்ணதாசனின் கடிதத்தொகுப்புகளின் தொகுப்பு இந்நூல். அந்நியமற்ற நதி-50 வண்ணதாசன் எழுதவந்து 50 ஆண்டுகளை நிறைவடைந்ததை அமெரிக்கன் கல்லூரியும் சந்தியா பதிப்பகமும் இணைந்து கொண்டாடியபோது மதுரை புத்தகத்திருவிழாவில் இந்த நூலை வாங்கினேன். அவருடைய கடிதங்களின் வாயிலாக நமக்கும் கொஞ்சம் இறகுகள் கொடுத்து பறக்கவைத்துவிடுகிறார். 35பேருக்கு அவர் எழுதிய கடிதங்களிலிருந்து தேர்ந்தெடுக்கப்பட்ட சில கடிதங்களின் தொகுப்பு. இந்தப் புத்தகத்தில் ஏராளமான முக்கியமான வரிகளை குறித்து வைத்திருக்கிறேன். அதில் முன்னுரையிலிருந்து எனக்குப் பிடித்த வரிகள்

“மனிதர்கள் தவித்துக் கொண்டிருக்கும்படியே வாழ்க்கை இருக்கிறது. துடிப்பும் உயிர்ப்பும் மிக்கதாகவே அவர்கள் மனம் இருக்கிறது. தூண்டப்பட்ட மனமும், சிறகொடிக்கும் வாழ்வும் உடையவர்களையே நான் அதிகம் அறிந்திருக்கிறேன்.”

பொங்கல் விடுமுறையில் எஸ்.ராமகிருஷ்ணனின் துயில் நாவலை அவரது மகன் வீட்டிலிருந்தபோது வாசித்ததை நான் படித்ததும் எனக்கு நானும் அச்சமயத்தில் சகோதரர் பொங்கல் விடுமுறைக்கு வந்தபோது கொடுத்த துயில் வாசித்த நினைவு வந்தது. இருவரும் ஒரே காலத்தில் வாசித்திருக்கிறோம். இத்தொகுப்பிலுள்ள கே.கே.ராஜன் அவர்களை சந்தித்து உரையாடியபோது வண்ணதாசன் அவர்களுடனான அவரது பழக்கம் குறித்து அறிய முடிந்தது. வண்ணதாசனிடமிருந்து மின்னஞ்சல் ஒன்று வராதா என்று ஏங்கிய வேளையில் மதுரையில் வாசகசாலை கூட்டத்தில் அவரை சந்தித்து, பேசியதும், அவரது கரம்பற்றி நிழற்படமெடுத்ததும் மறக்கமுடியாதது. அதன்பின் அவரிடமிருந்து வந்த மின்னஞ்சல் எனக்குப் பொக்கிஷம்.


இந்தப் போட்டியில் என்னுடைய எண் VN154. இந்தப் போட்டிகள் நடத்துவதில் பெரும் முனைப்புடன் செயல்படும் கதிரவனுக்கு நன்றி.

நீங்களும் வாசிப்பை நேசிப்போம் குழுவில் இணையுங்கள்!

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s