பொதும்பில் சங்கப் புலவர்கள்

Posted: ஜனவரி 12, 2020 in பார்வைகள், பகிர்வுகள்

பொதும்பு எங்கள் ஊரை அடுத்துள்ள ஊர். திரைப்படத் தயாரிப்பாளர் சங்கிலி முருகனின் சொந்த ஊர் என்பதால் எங்க ஊருப் பாட்டுக்காரன் உள்ளிட்ட பல்வேறு திரைப்படங்களில் பதிவாகி உள்ளது.

அவ்வூரின் பெருஞ்சிறப்பு பெண் கவிஞர் உள்பட மூன்று சங்கப் புலவர்கள் வாழ்ந்திருப்பது. ஆனால் அது பலருக்கும் தெரியாது. எனவே பொதும்பில் புலவர்கள் என்ற தலைப்பில் ஒரு சிறுநூலை வெளியிட்டோம்.

11 ஜனவரி 2020 அன்று பொதும்பு அரசு மேல்நிலைப் பள்ளியின் முந்நூற்றுச் சொச்சம் மாணவர்களுக்கும் காலை வழிபாடு முடிந்ததும் இந்நூலை வழங்கினோம்.

அப்பள்ளியின் தலைமை ஆசிரியர் அமலராணி அவர்கள், உதவி தலைமை ஆசிரியர் சசிகலா அவர்கள், சுரேஷ் உள்ளிட்ட பிற ஆசிரிய பெருமக்கள் எங்களுக்கு ஊக்கமும், ஒத்துழைப்பும் நல்கினார்கள். அவர்களுக்கு நன்றிகள்.

அந்நூலின் முன்னுரை வருமாறு:

பொதும்பு என்ற சொல்லுக்கு இளஞ்சோலை என்றும் பொருள்.  சோலைகள் சூழ்ந்த பொதும்பு அந்நாளில் ‘பொதும்பில்’ என்ற பெயருடன் திகழ்ந்திருக்கிறது. குறைந்தது மூன்று சங்கத் தமிழ்ப் புலவர்கள் பொதும்பைச் சேர்ந்தவர்களாக அறியப்படுகிறார்கள். நற்றிணை உரையாசிரியர் பின்னத்தூர் அ. நாராயணசாமி ஐயர் “பொதும்பில் பாண்டியநாட்டிலுள்ளதோர் ஊர்; மதுரைத் தாலூகாவில் உளது; இப்பொழுது பொதும்பு என வழங்குகிறது” என்கிறார். தமிழகம் – ஊரும் பெயரும் என்ற நூலில் ரா. பி. சேதுப்பிள்ளையும் இதைக் குறிப்பிடுகிறார்.

பொதும்பில்கிழார் நற்றிணை 57-ஆம் பாடலைப் பாடியவர். அகநானூற்றில் உள்ள 192-ஆம் பாடலைப் பாடிய பொதும்பில்கிழார் வெண்கண்ணனார் என்பாரும் இவர்தானா வேறொருவரா எனத் தெரியவில்லை. பொதும்பில்கிழாரின் புதல்வரான பொதும்பில்கிழார் மகனார் வெண்கண்ணியார் நற்றிணையில் உள்ள இரு பாடல்களைப் (375, 387) பாடியவர். அந்நாளிலேயே நம் நிலத்தில் பெண்கல்வி சிறந்து விளங்கியதை பொதும்பில் புல்லாளங்கண்ணியார் என்ற பெண்புலவர் இருந்ததைக் கொண்டு அறியமுடிகிறது. புல்லாளங்கண்ணியார் அகநானூற்றில் உள்ள 154-வது பாடலைப் பாடியவர்.

இப்பாடல்கள் யாவும் அகத்துறை சார்ந்தவை என்பதால் இயற்கை விவரிப்புகளை மட்டும் கொடுத்துள்ளோம். அகவையும், ஆர்வமும் உள்ளவர்கள் முழுப்பாடல்களையும், அவற்றில் உள்ள உள்ளுறை முதலான இலக்கிய நயங்களையும் சுவைக்கலாம்.

தோராயமாக ஈராயிரம் ஆண்டுகளுக்கு முன்பே இயற்கையும், இலக்கியமும் செழித்திருந்த இப்பகுதியைச் சேர்ந்த நாம் இவ்விரண்டையும் கண்ணெனப் பேணலாம்தானே!

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s