Archive for the ‘தமிழும் கமலும்’ Category

ஒரே பக்கத்தில் 2016-இன் அனைத்து மாதங்களுக்குமான நாட்காட்டி. தமிழக அரசு விடுமுறை நாட்கள் கட்டமிட்டுக் காட்டப்பட்டுள்ளன. தேவைப்பட்டால் பிடிஎப் கோப்புகளைத் தரவிறக்கி விரும்பியதை அச்செடுத்து ஒட்டிக்கொள்ளவும்.

தொ. பரமசிவன் அய்யாவின் கருத்து ஒன்றுடன்.

2016 Calendar Tho.pa

தொ. ப நாட்காட்டியின் பிடிஎப் வடிவம்

அசோகமித்திரன் அவர்களின் கருத்து ஒன்றுடன்:

2016 Calendar A.Mi

அ.மி நாட்காட்டியின் பிடிஎப் வடிவம்

என் போன்ற கமல் ரசிகர்களுக்கென்றே:

2016 Calendar Kamalகமல் நாட்காட்டியின் பிடிஎப் வடிவம்

இனிய புத்தாண்டு வாழ்த்துக்கள்

சித்திரவீதிக்காரன்

எனக்குள் ஒருவன், தசாவதாரம் – விஸ்வரூபம் எடுத்த உயர்ந்த உள்ளம், நம்மவர், கலைஞன், அன்பால் ஆளவந்த வெற்றிவிழா நாயகன், அபூர்வசகோதரர் கமல்ஹாசன் பிறந்து 60 ஆண்டுகள் ஆகிவிட்டதாம். ஆச்சர்யமாக இருக்கிறது. புதிய விசயங்களைத் தேடித்தேடிக் கற்று என்றும் இளமையாக இருக்கும் சகலகலாவல்லவருக்கு வயது என்றும் பதினாறுதான்.

1989ல் அபூர்வ சகோதரர்கள் வெளியானது. நான் ஓரளவு விவரம் தெரிந்து பார்த்த படம். அப்பு கதாபாத்திரமும், சர்க்கஸ் காட்சிகளும், பாடல்களும் மனதைக் கவர்ந்தன. குள்ளமாக வந்து நெஞ்சில் வெள்ளமாக நிறைந்து விட்டார் கமல்ஹாசன். அந்தப் படம் வெளியானபோது நாங்கள் அண்ணாநகரில் குடியிருந்தோம். சுந்தரம் தியேட்டரில்தான் கமல்ஹாசன் படங்கள் பெரும்பாலும் வெளியாகும்.

பள்ளிநாட்களில் பாட்டுப்புத்தகங்கள் வாங்கி வகுப்பறைகளில் புத்தகங்களுக்கிடையில் வைத்துப்படிப்பது, அங்கேயே பாடுவது என எல்லாம் நடக்கும். சிலநேரங்களில் ஆசிரியர்களால் பறிக்கப்பட்டு கிழிக்கப்படுவதும் உண்டு. கமல்ஹாசன் பாடல்களின் மொத்த தொகுப்பு புத்தகம் வாங்கி வைத்திருந்தேன். இப்போதெல்லாம் தொலைக்காட்சியில் யார் யாரோ பாட குடும்பத்தோடு பார்த்துக்கொண்டிருக்கிறார்கள். அந்தக் காலத்தில் எல்லோருமே சூப்பர் ஸிங்கர்ஸ்தான். எங்கள் வகுப்பில் பெரும்பாலான பேர் கமல் ரசிகர்களாக இருந்ததால் கமல்ஹாசன் பாடல்களை மனப்பாடப்பகுதிக்கு குறித்து கொடுத்ததுபோல படித்துக்கொண்டிருந்தோம்.

எட்டாம் வகுப்பிற்கு பிறகு நண்பர்கள் எல்லோரும் வேறுவேறு பள்ளிகளில் சேர்ந்துவிட்டாலும் வெள்ளிக்கிழமை மாலை வேளையில் பேசிக்கிட்டே கண்மாய்கரையோரம் உள்ள சோனையா கோயிலுக்கு போய்ட்டு வந்து மந்தையில் ஒளியும் ஒளியும் பார்க்க அமர்வோம். கமல்ஹாசன் பாடல் எப்போது போடுவார்கள் என்று காத்திருந்த அந்தக் காலம் திரும்ப வருமா?

Kamal Haasan's Uthama Villain First Look Wallpapers

தேவர்மகன் வெளியான போது ஒரு கம்பை எடுத்து கொண்டு குண்டு பல்பு வெளிச்சத்தில் என் நிழலைப் பார்த்து சாந்துப்பொட்டு பாடலை பாடிக்கொண்டே கம்பு சுற்றிப் பழகியதையெல்லாம் மறக்க மனங்கூடுதில்லையே. தனிமை கிட்டும்போது கணினியில் கமல்ஹாசன் பாடலைப் போட்டு ஆடுவது பெருங்கொண்டாட்டமான விசயம். சமீபத்தில் அப்படி ஆடத்தூண்டிய பாடல் ‘உன்னைக் காணாமல் நானிங்கு நானில்லையே’.

பாலிடெக்னிக் படிக்கும்போது எங்கள் ஆசிரியர் உட்பட அனைவருக்கும் நான் கமல்ஹாசன் ரசிகனென்று தெரியும். அன்பே சிவம் வெளியான சமயம் மீசையை எப்போதும் முறுக்கிக் கொண்டு திரிந்த காலம். விருமாண்டி வந்த போது தினமலரில் ஒருபக்க ப்ளோஅப் கொடுத்தார்கள். அதை எனக்கு எடுத்துவர வேண்டுமென்று ஒரு ஆசிரியர் நினைக்குமளவிற்கு பிரபலமாக இருந்தேன்.

2004ல் விருமாண்டி பார்த்துத் தொடங்கினேன். கல்லூரி காலமென்பதால் அந்த வருடம் மட்டும் 24 படங்கள் பார்த்துவிட்டேன். இறுதியாக டிசம்பர் 28 அன்று மீனாட்சி தியேட்டரில் விருமாண்டி பார்க்க ஆசிரியரிடம் அனுமதி கேட்டு சென்று 25வது படமாக விருமாண்டி பார்த்தேன். படித்து முடித்தபின் இருசக்கர வாகன விற்பனை பிரதிநிதியாக இருந்தபோது அங்குள்ளவர்கள் என்னை கமல் என்றே அழைப்பார்கள்.

Actor Kamal Haasan in Papanasam Movie Stills

உரையாடலின் போது கமல்ஹாசன் பட வசனங்களை அடிக்கடி சொல்வேன். அதிலும் வசூல்ராஜா பட வசனங்களைத்தான் மேற்கோளாக பெரும்பாலும் கூறுவேன். வசூல்ராஜாவை திரையரங்குகளில் மட்டும் ஆறுமுறை பார்த்தேன். கமல்ஹாசன் குறித்த செய்தியோ, பேட்டியோ நாளிதழ்களில் வந்திருந்தால் அதை அப்போதே வாங்கிவிடுவேன். இல்லாவிட்டால் அந்தப் பக்கத்தை மட்டும் எப்படியாவது எடுத்துருவேன். அப்படி தொகுத்தவை இரண்டு பெட்டி நிறைய இன்னமும் இருக்கிறது. இப்போது கணினியில் கமல்ஹாசனின் நேர்காணல்கள், பாடல்கள், படங்கள் எல்லாவற்றையும் சேமித்து வைத்துக் கொண்டிருக்கிறேன்.

விஸ்வரூபம்2

திருமணம் முடிந்தபிறகு கமல்ஹாசன் படம்தான் முதலில் பார்க்க வேண்டுமென்று இன்னும் ஒரு படமும் பார்க்கவில்லை. விஸ்வரூபம் 2, உத்தமவில்லன், பாபநாசம் என ஹாட்ரிக் ஹிட் கொடுக்க வருகிறார். என்னுடைய திருமண ஆல்பத்தில் ஒருபக்கம் எங்க படமும் மறுபக்கம் கமல் பியானோ வாசிப்பது போல் உள்ள படத்தையும் சேர்த்திருந்தோம். பார்த்தவர்கள் வியப்பில் ஆழ்ந்தார்கள்.

கமல்ஹாசன்

எங்க வீட்டில் இன்னமும் கமல்ஹாசன் படங்களைப் பார்க்கும் இடங்களில் ஒட்டி வைத்திருக்கிறேன். மழைக்கால மேகமொன்று மடி ஊஞ்சலாடும் நவம்பர் மாதத்தில் கமல்ஹாசனைப் போல வைகையெனும் மகாநதிக்கரையில் நானும் பிறந்தவன் என்ற பெருமை எனக்குண்டு. கமல்ஹாசனை நினைத்தாலே இனிக்கும். பார்த்தால் பசி தீரும். அன்பே சிவம், அன்பே கமல்.

மய்யம்

வாசகா – ஓ – வாசகா…
என் சமகால சகவாசி
வாசி…

புரிந்தால் புன்னகை செய்
புதிர் என்றால் புருவம் உயர்த்து
பிதற்றல் எனத் தோன்றின்
பிழையும் திருத்து…

எனது கவி உனதும்தான்
ஆம்…
நாளை உன்வரியில்
நான் தெரிவேன்.  

– கமல்ஹாசன்

திரைப்படங்களும், தொலைக்காட்சிகளும், அலைபேசிகளும் வாசிப்பை நாசம் செய்யும் வேளையில் நம்மை ஆச்சர்யமூட்டும் விசயமாக தன்னுடைய திரைப்படப் பணிகளினூடே தமிழின் உன்னதமான படைப்புகளை வாசிக்கும் கமல்ஹாசனைப் பார்க்கும்போது பொறாமையாகயிருக்கிறது. வாசிக்க நேரமில்லை என்று சொல்ல வெட்கமாகயிருக்கிறது. புத்தகம் பேசுது  மாத இதழுக்காக கமல்ஹாசனோடு எழுத்தாளர் வெண்ணிலா மற்றும் முருகேஷ் எடுத்த நேர்காணலிலிருந்து ஒரு சிறுபகுதி:

கலையுலக இலக்கியவாதியான உங்களின் இலக்கிய அனுபவத்தைச் சொல்லுங்கள்?

கலையுலகத்திலிருந்து இலக்கியவாதியின் அனுபவத்தைப் பேசணும்னா, அது ரொம்ப சோகம்தான். ஜே.கே.வினுடைய கலை உலக அனுபவங்கள் மிகப் பெரிய தாக்கத்தை உண்டுபண்ணும். இன்றைக்கு வாழும் ஹீரோக்களில் முதன்மையானவராக நான் நினைப்பது ஜே.கே.வைத்தான். ஆனால், நான் அவரை வாழ்நாளில் நான்கைந்து முறைகளுக்குமேல் பார்த்ததில்லை. காரணம், அதீதமான வியப்பும் பெருமிதமும். அது மட்டுமில்லாம கிட்ட பார்க்கிறதுல சின்ன தயக்கமும் இருக்கு. நரைச்ச மீசை, உயரம் இதெல்லாம் தொந்தரவு பண்ணிடுமோன்னு தள்ளியே இருக்கேன். குழம்பிடுமோன்னு தோணும். ‘வாழும் ஹீரோ’ அவர் காதுபட சொல்றதுல எனக்கு சந்தோஷம். அந்த மாதிரி நெறய பேர் இருக்காங்க.

Writers

தன்னோட ஆசிரியரை எனக்கு அறிமுகப்படுத்தி வச்சாரு கு.ஞானசம்பந்தன். தொ.பரமசிவன். தொ.ப.வைப் பார்த்து எனக்கு ஆச்சர்யம். ஆனா, உடம்பு முடியாம ஒரு வயோதிகரா தொ.ப.வைப் பார்க்கிறதுல ஒரு சின்ன வருத்தம். இளைஞரா இருந்தப்ப எங்க அப்பாவையெல்லாம் பார்க்க வந்திருக்காரு. அப்ப தெரிஞ்சுக்காம போயிட்டமேன்னு தோணும். கோபமான தொ.ப.வைப் பார்த்திருக்கலாம். ஞானசம்பந்தனையே சொல்லலாம். அவர் வெளியே கோமாளி மாதிரி வேஷம் போட்டுக்கிட்டாலும் ரொம்ப ஆழமான, கோபமான ஆளு. கோமாளி தொப்பி ஒரு யுக்தி. ஞானக்கூத்தன், புவியரசு இவங்கள்லாம் எனக்குக் கிடைச்ச பரிசு. நட்புன்றது நானா தேடிக்கிட்டதுதான். அதனால் அது பரிசா, நான் சம்பாதித்தான்னு தெரியல. இதே இடத்தில் உட்கார்ந்து சுந்தர ராமசாமியோட ரெண்டு மணி நேரம் பேசிக்கிட்டிருந்தேன். ஞானக்கூத்தன்தான் ஏற்பாடு செஞ்சாரு. முக்கியமான ஒரு வேலையை செஞ்ச மாதிரி ஞானக்கூத்தன் அன்னைக்கு நெகிழ்ச்சியா பக்கத்தில் நின்னுக்கிட்டுருந்தார். எனக்கு ரொம்ப நெகிழ்வான அனுபவம். அதே மாதிரி சமீபத்துல படிச்சது ப.சிங்காரத்தை. அவரு செத்துப்போனப்புறம்தான் அவர படிச்சேன். அவரோட புத்தகம் இருக்கிறதால அவர் இல்லாம போனதைப் பத்தி எனக்கு வருத்தமில்ல. சமீபத்தில் தூக்கி வாரிப்போட்ட புத்தகம் கொற்றவை. மிரண்டுட்டேன். சொல்லியே ஆகணும். ஜெயமோகன் சினிமாவுக்கு வந்ததால சொல்லலை. ஒருவேளை அவர் என் சினிமாவில் வேலை செஞ்சு என் புஸ்தகம் படிங்கன்னு குடுத்திருந்தார்னா நான் படிச்சிருக்கமாட்டேன்னு நினைக்கிறேன். நானா தேடி படிச்சதால என்னை வியப்பில் ஆழ்த்தியது. நான் படிக்கிறது பத்தலன்றது மட்டும் எனக்குத் தெரிஞ்சது.

Books

‘ஆழி சூழ் உலகு’ன்னு ஒரு புஸ்தகம். நண்பர்கள் பரிந்துரை பண்ணாங்க. ஜி.நாகராஜனையே நான் அவர் இறந்து போனதுக்குப் பின்னாடிதான் படிச்சேன். ‘குறத்திமுடுக்கு’, ‘நாளை மற்றொரு நாளே’ எல்லாம் அப்புறம்தான் படிச்சேன். ஜெயகாந்தனைத் தெரிஞ்சுகிட்டது மாதிரி அவரைத் தெரிஞ்சுக்கிட்டிருந்தா அவர் கூட கைகுலுக்கியிருக்கலாமேன்னு தோணுச்சு. கு.ப.ரா.ல்லாம் காலதாமதமாக வாங்கிப் படிக்கிறேன். நான்தான் சொல்றேனே, 15 வருசமாத்தான் தெளிவு வர ஆரம்பிச்சுருக்கு.

(நன்றி – வெண்ணிலா, முருகேஷ் – புத்தகம் பேசுது, ஜனவரி 2008 இதழ்)

கமல்ஹாசன் தமிழில் சங்க இலக்கியம் தொடங்கி ஜெயகாந்தன், தி.ஜானகிராமன், லா.சா.ரா, கு.ப.ரா, பிரமிள், புவியரசு, ஞானக்கூத்தன், ப.சிங்காரம், ஜி.நாகராஜன், தொ.பரமசிவன், சுந்தர ராமசாமி, சுஜாதா, வண்ணதாசன், ஜெயமோகன், கோணங்கி என இன்னும் பல எழுத்தாளர்களின் நூல்களை தேடி வாசித்துக்கொண்டிருக்கிறார். கமல்ஹாசன் மிகச் சிறந்த வாசிப்பாளர் என தொ.பரமசிவன் சொல்கிறார். கமல்ஹாசன் மய்யம் என்ற இலக்கிய மாத இதழை முன்பு நடத்தியிருக்கிறார். நாமும் நல்ல நூல்களை வாங்கி வாசிப்போம்.

ஜி. நாகராஜன் பிறந்த நாள்  & மதுரை புத்தகத் திருவிழா சிறப்புப் பதிவு

கமல்ஹாசன்அந்தக் காலம் மாதிரி வராது. அது வரம். இடுப்புல ஜாலியா உட்கார்ந்துகிட்டு சாப்டுக்கிட்டேயிருப்பேன். இப்ப எதுக்கெடுத்தாலும் வேலை.

–   கமல்ஹாசன் (மும்பை எக்ஸ்பிரஸ்)

என் நினைவில் பதிந்த வசனமிது. சிக்னல் நிறுத்தத்தில் கார் நிற்கும்போது குழந்தையை கையில் வைத்துகொண்டு பிச்சையெடுத்துக் கொண்டிருக்கும் சிறுமியைப் பார்த்ததும் கண்ணில் நீர் துளிர்க்க தனக்கு பழைய நினைவு வந்ததாகச் சொல்லி கமல்ஹாசன் சொல்லும் வசனமே மேலே உள்ளது. அந்தப் படத்தில் நிலையான வேலையில்லாமல் மரணக்கிணற்றில் உயிரைப் பணயம் வைத்து வண்டி ஓட்டும் காதுகேளாத நாயகனாக கமல்ஹாசன் நடித்திருப்பார். அந்தப் படத்தில் அவரது காதுகேளாமையைப் பலரும் கேலி செய்வார்கள். எஸ்.ராமகிருஷ்ணனின் நிமித்தம் நாவல் வாசித்ததும் மும்பை எக்ஸ்பிரஸ்தான் நினைவிற்கு வந்தது.  இந்நாவலின் நாயகனான தேவராஜூம் காதுகேளாமல் உருப்படியான வேலையில்லாமல் சிரமப்படுபவர்தான்.

47 வயதில் தேவராஜ் திருமணத்திற்கு முதல்நாள் தன் வாழ்வைத் திரும்பிப் பார்க்கும்போது அவரோடு பயணிக்கும் நாமும் நிசப்தமாக நிராகரிப்பின் வலியை உணர முடிகிறது. தேவராஜிற்கு சிறுவயதில் ஏற்படும் காய்ச்சலால் காதுகேளாமல் போய்விடுகிறது. அதனால் உண்டாகக்கூடிய பிரச்சனைகள் அவனது வாழ்க்கையையே மாற்றி விடுகிறது. காதுகேளாததால் பள்ளிப் படிப்பை ஒழுங்காக முடிக்க முடியாமல், நிரந்தரமான வேலையில்லாமல், உரிய வயதில் திருமணம் செய்யாமல் தேவராஜ் படும் அவமானமும், புறக்கணிப்பும் நம்மையும் பாதிக்கிறது. அந்தளவிற்கு தேவராஜ் நமக்கு நெருக்கமான நண்பராகிவிடுகிறார்.

பிரிண்டிங் பிரஸ், கர்நாடக மாநிலம் ஹூப்ளியில் சோப்பு கம்பெனி, மிளகாய்ப் பொடி அரைக்கும் மில், லாட்டரிச் சீட்டுக்கடை, டாக்டர் வீட்டில் எடுபிடி, ஊட்டியில் கடையில் விற்பனை பிரதிநிதி, காசிக்கு போகும் பாட்டிக்கு துணையாளாக சம்பளத்திற்கு போவது, சீட்டுக்கம்பெனியில் என பல வேலைகள் பார்க்கிறான். ஒரிடத்திலும் நிலையான வேலையில்லாமல தேவராஜ் படும் சிரமங்கள் என் வாழ்க்கையை திரும்பிப் பார்க்க வைத்தது.

நிமித்தம்டிப்ளமோ முடித்து விட்டு நிரந்தர வேலையில்லாமல் அலைந்த நாட்களில் நானும் தேவராஜ் போலத்தான் திரிந்தேன். அதிலும் தேவராஜ் மிளகாய் மில்லில் வேலையை விடுவது போல மதுரையில் இரண்டு பெரிய நிறுவனங்களில் கார்பன் வாடை பிடிக்காமல் கொஞ்ச நாட்களில் வேலையை விட்டிருக்கிறேன். டாக்டர் வீட்டில் தேவராஜ் வேலை பார்த்ததை படித்தபோது நான் ஓரிடத்தில் வேலை பார்த்தபோது பட்ட அசிங்கமும் ஞாபகத்திற்கு வந்தது. இருபது வயதிற்கு மேலாகியும் மனவளர்ச்சி இல்லாத டாக்டர் மகனை தூக்கி சாப்பிட வைக்க, குளிப்பாட்ட உதவியாக தேவராஜ் வேலைக்கு போகிறான். அப்போது அந்தப் பையன் மலம்கழித்து உலப்பிவிட டாக்டர் தேவராஜை திட்டும் இடங்களில் மனது மிகவும் சங்கடமாகிவிட்டது.

டிப்ளமோ படிப்புக்கு ஏற்ற வேலையென ஓரிடத்தில் வேலைக்கு சேர அங்கு நான் சேர்ந்த நேரத்தில் ஒரு நாயையும் புதிதாக வாங்கினார்கள். எனக்கு சிறுவயதிலிருந்தே நாயைக் கண்டாலே கொல நடுங்கிரும். இதில் நாயை சில நேரங்களில் இடம் மாற்றி என்னைக் கட்டச் சொல்வார்கள். பயந்து பயந்து செய்வேன். இடையிடையே அதற்கு சாப்பாடு வாங்கிப் போடும் பணிவேறு. இரவில் உடன் வேலைப்பார்ப்பவர் அதற்கு புரோட்டா வாங்கி சாப்பிடப் போட அது கக்கி வைத்து விட்டது. மறுநாள் காலை அது கக்கி வைத்த இடத்தை கழுவினால் வாடை குடலைப் புடுங்கி எடுத்துவிட்டது. அச்சமயம் சொந்தக்கார பாட்டி செத்துட்டாங்கன்னு ஒரு தகவல் வந்ததும் அப்படியே அந்த வேலைய விட்டுட்டேன். அதுபோல ஏ/சி சர்வீஸ் வேலைக்கு போக உதிரி பாகங்களைக் கழுவ எந்நேரமும் கழிப்பறை போன்ற இடங்களையே நோக்கி போக வேண்டியிருந்தது. மூன்று நாட்களில் வேலையை விட்டு ஓடி வந்துவிட்டேன். இப்படி நான் பல இடங்களில் பட்டபாட்டை நிமித்தம் திரும்பவும் நினைவூட்டிவிட்டது.

தேவராஜிற்கும் அவனது அப்பாவிற்கும் ஏழாம் பொருத்தம். தண்டமாகத்திரிவது, காதுகேளாமையைச் சுட்டிக் காட்டி எப்போதும் தேவராஜைத் திட்டிக் கொண்டேதானிருப்பார். அவங்கப்பா இறந்தபோதுகூட தேவராஜ் சாமியாராக ஒரு மடத்திலிருப்பார். மற்றவர்கள் வற்புறுத்தலால்தான் இறுதிச் சடங்கிற்கே செல்வார். அந்தளவிற்கு அப்பாவின்மீது தேவராஜிற்கு வெறுப்பு.

தேவராஜிற்கு காதுகேட்க வைப்பதற்காக மருத்துவமனைக்கும், கோயிலுக்கும் அழைத்துச் செல்லும் அம்மா, ஆறுதலாகப் பேசி உதவும் அக்கா, இக்கட்டான சூழல்களிலெல்லாம் உறுதுணையாக உடன்வரும் நண்பனான இராமசுப்பு, ஓவியத்தின் மீதும், புத்தகவாசிப்பின் மீதும் ஆர்வத்தை ஏற்படுத்திய சுதர்சனம் வாத்தியாரும் அவரது மனைவியான அங்கயற்கண்ணி டீச்சரும், தம் வாழ்க்கை அனுபவங்களின் மூலம் கதைகளைப் பகிரும் தாய்வழித்தாத்தாவும் வண்டிப்பேட்டையிலிருக்கும் தம்பையாத் தாத்தாவும், தொழிற்பயிற்சி படிக்கும் நாட்களில் சேட்டைக்காரனாக வரும் ஜோசப்பும்தான் தேவராஜ் வாழ்க்கையில் நம்பிக்கையூட்டும் விதமாக வருபவர்கள்.

நிலையான அன்பிற்கு ஏங்கும் தேவராஜ் பிரிண்டிங் பிரஸில் வேலை பார்க்கும் போது ஜோஸ்லினுடன் வரும் காதலை தேவராஜின் அப்பா பிரித்துவிடுகிறார். அதன்பின் ஊட்டியில் சவீதாவுடன் வரும் காதலும் அவளது கல்யாணத்தால் முடிந்து போகிறது. நிரந்தரமான வேலையில்லை, காதுகேளாமை போன்ற காரணங்களால் திருமணம் தள்ளிக் கொண்டே போகிறது. இறுதியில் வீடு விற்ற பங்கையும் தேவராஜின் அண்ணன் கொழுந்தியாவைக் கட்டி வைக்கிறேன் என்று பொய் சொல்லி ஏமாற்றி விடுகிறான். இராமசுப்பு தன்னுடன் இணைத்து தொழில் செய்ய வைத்து ஒரு பெண்ணையும் பார்த்து திருமணம் செய்து வைக்கிறான். தன் எதிர்காலம் குறித்த அச்சத்தோடு காத்திருக்கும் தேவராஜ் நம்மையும் சலனப்படுத்தி விடுகிறார்.

மண்குதிரைதேவராஜின் தாய்வழித்தாத்தா குயவர். மிக அழகாக குதிரை, மண்பாண்டங்கள் செய்பவர். சேவல் சண்டைக்கு நடுவராகச் செல்பவர். அவர் ஓரிடத்தில் சொல்வார். குதிரை செய்யும்போது மனதில் கோபமோ, கவலையோ இல்லாமல் இருக்க வேண்டும். இல்லாவிட்டால் சிலை ஒழுங்காக வராது என்று. அதை நானும் பலமுறை குதிரையை வரையும் போது உணர்ந்திருக்கிறேன். குதிரையை கொஞ்சம் கவனமில்லாமல் வரைந்தாலும் கழுதை போலாகிவிடும். தாத்தா வீட்டில் இருந்த நாட்களில் தேவராஜ் அந்த ஊர் கதைகள், மண் சிலைகள் என மகிழ்ச்சியாக இருப்பான். அப்பகுதி நம் எல்லோருடைய தாத்தா-பாட்டி வீட்டு நினைவுகளையும் மீட்டெடுக்கக் கூடியது.

கங்கைக் கரையில் ஹேமாவதி பட்டு நூல் நெய்யும் கதை, வண்டிப்பேட்டைக்கு வருபவர்கள் சொல்லும் திருடன் கதை, குயவரான தாத்தாவின் உதவியாளர் சொல்லும் வைரவன் செட்டியார் கதை, தம்பையாத் தாத்தா சொன்ன ஆண்கிணறு பெண்கிணறு உருவான கதை, ஜோசப்பின் கடற்கரை கிராமத்தில் கிரேசம்மாள் கிழவி சொல்லும் காற்றடிக்காலக்கதையென நாவலில் கிளைக்கதைகளாக வரும் ஒவ்வொன்றும் நம்மை ஈர்க்கிறது.

nimithambooklaunch2நாவலில் காந்தி விருதுநகருக்கு வருவது, நேரு காலத்தில் ஏற்பட்ட பஞ்சம், இந்திரா காந்தி காலத்திலிருந்த மிசா தடைச்சட்ட காலம், விருதுநகரில் வண்டிப்பேட்டை உருவான கதை, நாத்திகம் பேசிய திராவிடக் கட்சிக்காரர்கள் என அந்தக் கால நிகழ்வுகளையும்  கதையினூடாக அற்புதமாகப் பதிவு செய்திருக்கிறார் எஸ்.ராமகிருஷ்ணன். நாவலினூடாக சில கணங்களே வந்துபோகும் உணவகம் நடத்தும் காந்தி மீது பற்றுக் கொண்டவரான இராஜாமணி இறக்கும்போது நமக்கும் வலிக்கிறது.

நாவலின் களம் விருதுநகர். மதுரையையொட்டிய பகுதியென்பதால் இன்னும் நெருக்கமாகிறது. மதுரையில் நான் பணிபுரியும் பகுதியில் தேவராஜ் கொஞ்சகாலம் சீட்டுக் கம்பெனியில் வேலை பார்ப்பதை வாசித்தபோது மகிழ்வாகயிருந்தது. இந்நாவலை எனக்கு வாசிக்கத் தந்த அண்ணனும் நெருக்கமான நிறைய பகுதிகளைச் சொல்லி சிலாகித்தார். எஸ்.ராமகிருஷ்ணனின் ஆறுநாவல்களையும் வாசித்துவிட்டேன்ற திருப்தி நிமித்தம் வாசித்ததும் மனதில் அப்பிக் கொண்டது தனிக்கதை. கதைசொல்லியான எஸ்.ராமகிருஷ்ணன் நிமித்தத்தினூடாக நம்மை அவரது எழுத்தில் கிறங்க வைத்து விடுகிறார். வாசிக்க வேண்டிய அற்புதமான நாவல்.

kamalhaasan
தமிழுக்கு நிகரான மொழியுமில்லை!
கமலுக்கு நிகரான கலைஞனுமில்லை!

vasoolraja kamal

வானில் ஆயிரம் நட்சத்திரங்கள் இருந்தாலும் எனக்கு மிகவும் நெருக்கமான நட்சத்திரம் சூரியன்தான். அதேபோல, திரையுலகில் ஆயிரம்பேர் வந்துபோனாலும் எனக்கு பிடித்த அபூர்வ நட்சத்திரம் கலைஞானி கமல்ஹாசன்தான்.

kamal flims

மானுடத்தின் மீது தீராதகாதலும், சமூக அக்கறையும் கொண்ட நல்ல மனிதர். பன்முகத்தன்மைகொண்ட தம் படைப்பாற்றலால் உலகையே தமிழகத்தை நோக்கி திரும்ப வைத்த மகாகலைஞன். வாசிப்பிலும் எழுத்திலும் தேர்ந்த இலக்கியவாதி. தடைகளை வென்று புதிய முயற்சிகளின் மூலம் தமிழ்திரையுலகை மாற்றத்துடிக்கும் போராளி நம்மவர் கமல்ஹாசன்.

maduraiyum kamalum

வாசிக்கும் வார மாத இதழ்களில் கமல்ஹாசன் குறித்து வந்தவைகளையெல்லாம் எடுத்து தனியே தொகுத்து ஒரு பெட்டி நிறைய வைத்திருக்கிறேன். என்னுடைய கட்டற்ற கமல் கலைக்களஞ்சியத்திலிருந்து சில படங்களை தொகுத்திருக்கிறேன். கமல்ஹாசனைப் பார்த்தால் பசி தீரும்.

kamalin dasavadharam

நடிப்பு, வாசிப்பு, பாடும்திறன், மனிதநேயம் என கமல்ஹாசனின் பன்முகத்தன்மையை பற்றி எழுதிய முந்தைய பதிவுகளான அபூர்வசகோதரர் கமல்ஹாசன், கமல்ஹாசனின் கானமழை கட்டுரைகளை வாசியுங்கள். பகிர்ந்து கொள்ளுங்கள். நவம்பர் 7 நம்மவர் தினம்.

mumbaiexpress

kamal

தமிழ்திரைப்படப்பாடல்கள்

திரையிசைப் பாடல்கள் வெறும் பொழுதுபோக்கிற்கானவை மட்டுமில்லை. அவை, எளிய மனிதர்களின் சுக துக்கங்களை, சந்தோஷங்களைப் பகிர்ந்துகொள்ளும் கலைவடிவமாகும். வேறு எந்த இலக்கிய வடிவத்தை விடவும் மக்களால் அதிகம் பயன்படுத்தப்படும் கலை வெளிப்பாடு திரையிசைப்பாடல்களே. காரணம், சினிமா பாடல்களைக் கேட்கும் ஒவ்வொருவரும் அதைத் தனது மனதின் பாடலாக உருமாற்றிக்கொண்டு விடுகிறார்கள்.      

– எஸ்.ராமகிருஷ்ணன்

இளம்பிராயத்தில் கேட்ட பாடல்கள், பள்ளி நாட்களில் பாடப்புத்தகங்களுக்கு நடுவே வைத்துப் படித்த பாட்டுப்புத்தகங்களும், கல்லூரிக்காலங்களில் பாடவேளைகளுக்கு ஊடாக வைத்த பாட்டுப்போட்டிகளும், விழாக்காலங்களில் ஒலிபெருக்கியின் வாயிலாக இதயந்தொட்ட பாடல்களும், இன்றும் பயணங்களில் கூட வரும் பாடல்கள் என தினசரி அன்றாடப்பாடுகளுடன் பாடல்களும் கலந்துவிட்டது.


சில பாடல்கள் காதலிக்கத் தூண்டும்; சில பாடல்கள் உற்சாகங் கொள்ள வைக்கும்; சில பாடல்கள் அழ வைக்கும்; சில பாடல்கள் அமைதிப்படுத்தும்; சில பாடல்கள் நமக்காகவே எழுதப்பட்டது போலத் தோன்றும். திரைப்படங்களை விடப் திரைப்படப்பாடல்கள் நம் வாழ்வோடு இரண்டறக் கலந்துவிட்டது எனலாம்.

பறவைக்கோணம்எழுத்தாளர் எஸ்.ராமகிருஷ்ணன் உயிர்மை இதழில் திரைப்படப்பாடல்கள், அவை இடம் பெற்ற படங்கள், திரைத்துறை சார்ந்த நூல்களைக் குறித்து எழுதிய கட்டுரைகளைத் தொகுத்து பறவைக்கோணம் என்ற தலைப்பில் நூலாக வந்துள்ளது. இந்தாண்டு நடந்த சென்னைப் புத்தகக்கண்காட்சியில் இந்தப் புத்தகத்தை வாங்கி வந்த சகோதரி மதுரை வந்தபோது எனக்கு வாசிக்கத் தந்தார். பறவைக்கோணம் புத்தகத்தை ஒரே நாளில் வாசித்து விட்டேன். நூலில் குறிப்பிடப்பட்டுள்ள பாடல்களும் படங்களும் ஏற்படுத்திய நினைவுகளைக் குறித்த அடியேனின் சிறுபதிவு.

 பறவைக்கோணம் தொடரில் இடம்பெற்ற அழகே அழகு பாடல் குறித்த கட்டுரையை எஸ்.ராமகிருஷ்ணனின் தளத்தில் வாசித்திருக்கிறேன். அழகே அழகு

ராஜபார்வையில் எனக்கு மிகவும் பிடித்த பாடல் அந்திமழை பொழிகிறதுதான். எஸ்.ராமகிருஷ்ணனின் கட்டுரை அழகே அழகு பாடல் மீதான பித்தத்தோடு ராஜபார்வையைப் பார்க்க வேண்டுமென்ற ஆவலையும் தூண்டி விட்டது. அழகே அழகு பாடலை யூடியூப்பில் தரவிறக்கி பார்த்தேன்.

அழகே அழகு தேவதை

ஆயிரம் பாவலர் எழுதும் காவியம்


கமல்பாடல் எடுக்கப்பட்ட விதம், கமல்ஹாசனின் நடிப்பு, மாதவியின் அழகான கண்கள், ஜேசுதாஸின் குரல், இளையராஜாவின் இசை, கண்ணதாசனின் வரிகள் என அடுக்கிக்கொண்டே போகலாம். வண்ணநிலவன் கதை வசனத்தில் வந்த அவள் அப்படித்தான் படத்தில் உறவுகள் தொடர்கதை பாடலில் வரும் ‘வேதனை தீரலாம், வெறும்பனி விலகலாம்’ என்ற எஸ்.ராமகிருஷ்ணனுக்கு பிடித்த வரிகள் இப்போது எனக்கும் நெருக்கமாகி விட்டது.

முகல்-ஏ-ஆசம் படம் குறித்து வாசித்து அந்தப்படத்தை வாங்கிப் பார்க்க வேண்டுமென்ற ஆசை அதிகரித்துவிட்டது. சமீபத்தில் விஸ்வரூபம் குறித்த நேர்காணலொன்றில் கமல்ஹாசன் ‘உன்னைக் காணாது நானில்லையே’ பாடலை முகல்-ஏ-ஆசம் படத்தில் வரும் ஒரு பாடலின் ராகத்தின் சாயலில் எடுத்ததாக சொன்னார்.

இந்தப் புத்தகத்தை வாசித்ததும் ராஜபார்வை, அவள் அப்படித்தான், அழியாத கோலங்கள், இரத்தக்கண்ணீர், முகல்-ஏ-ஆசம் என இந்த வருடம் பார்க்க வேண்டிய படங்களின் பட்டியல் உருவாகிவிட்டது. எல்லாம் பழைய படங்கள் என்பதால் கடைகளில் கிடைக்கும் என நினைக்கிறேன்.

பறவைக்கோணம் வாசித்த பிறகு நான் அறியாத பல அரிய தகவல்களை அறிந்து கொண்டேன். ‘சந்தனத்தில் நல்ல வாசம் எடுத்து என்னை தழுவிக் கொண்டோடுது தென்னங்காற்று’ என்ற பாடலை ஒலிபெருக்கிகளில் நிறையமுறை கேட்டிருக்கிறேன். அந்தப் பாடல் இடம் பெற்ற படம் ‘பிராப்தம்’ என்றும் அதை இயக்கியது நடிகையர் திலகம் சாவித்திரி என்றறிந்த போது ஆச்சர்யம் அதிகமாகியது. ‘குழந்தை உள்ளம்’ என்ற படத்தையும் சாவித்திரி இயக்கியிருக்கிறார்.

நீயும் பொம்மை நானும் பொம்மை என்ற பாடல் ஜேசுதாஸின் முதல் பாடல் என்று தெரியும். அந்தப் படத்தை இயக்கியது வீணை எஸ்.பாலசந்தர் என்றும் அவர் தமிழில் திரில்லர் படங்களை வித்தியாசமாக எடுத்தவர் என்றும் தெரிந்து கொண்டேன். வீணை எஸ்.பாலசந்தர் இசைக்கலைஞர், எடிட்டர், இயக்குனர், நடிகர் என பன்முகத்திறமைகள் கொண்டவர்.

பனிரென்டாம் வகுப்பு படிக்கும் போது தமிழாசிரியை குண்டலகேசி கதையை சொன்னபோது இந்தக் கதையை ‘வாராய் நீ வாராய்’ என்ற பாடல் இடம்பெற்ற மந்திரிகுமாரி கதை மாதிரி உள்ளதென்று நான் சொன்னபோது எல்லோரும் சிரித்தார்கள். இந்தப் படம் குறித்து பறவைக்கோணத்தில் வாசித்த போது பள்ளி ஞாபகம் வந்தது. மாடர்ன் தியேட்டர்ஸ் எடுத்த படமிது.

நெஞ்சில் ஓர் ஆலயம் படத்தில் சொன்னது நீதானா பாடல் ஒரே அறையில் குறைந்த செலவில் அற்புதமான பாடலை இயக்கிய ஸ்ரீதரின் ஆளுமையைச் சொல்லும் பகிர்வு. செந்தாளம் பூவில் வந்தாடும் தென்றல் பாடலை எஸ்.ரா. மலைப்பாடல் என்கிறார்.

எஸ்.ராமகிருஷ்ணன்இரயில் பயணத்தின் போது வாழ்வில் காணா சமரசம் உலாவும் இடமே என்ற பாடலைக் வண்டியில் வந்தவர் பாடியதைக் கேட்ட போது அது ஏற்படுத்திய தாக்கத்தையும் தங்கவேலுவின் நடிப்பையும் புகழ்கிறார். அத்தோடு அடுத்த வீட்டு பெண் படத்தில் இடம் பெற்ற கண்ணாலே பேசிப்பேசி கொல்லாதே என்ற பாடலை குறித்த வரிகளை வாசித்த போது சமீபத்தில் மறைந்த பி.பி.ஸ்ரீனிவாஸ் ஞாபகம் வந்துவிட்டது. எனக்கு மிகவும் பிடித்த பாடகர் அவர். பாடலின் முதல் ஹம்மிங்கை எனது தம்பி அழைப்பு ஓசையாக பதிவு செய்து வைத்திருந்தான். கேட்க அவ்வளவு இனிமையாக இருக்கும்.

எழுத்தாளர் ஜெயகாந்தன் எடுத்த படங்களையும் அதில் ‘சில நேரங்களில் சில மனிதர்கள்’ படத்தையும் குறித்த வரிகளையும் வாசித்த போது அந்த நாவலைப் படித்துவிட்டு அந்தப் படத்தைப் பார்க்க வேண்டுமென்ற ஆவல் உண்டாகியது. சமீபத்தில் எம்.எஸ்.விஸ்வநாதன், வாலி போன்ற ஆளுமைகளை வைத்து அவர்களோடு பாடல்கள் உருவான நிகழ்வுகளை பகிர்ந்து கொள்ளும் நிகழ்ச்சி தொலைக்காட்சிகளில் வரத் தொடங்கியுள்ளது. ஆரோக்கியமான விசயம்.

பறவைக்கோணம் வாசித்ததும் எனக்குப் பிடித்த பாடல்கள், பிடித்த பாடல்வரிகள், அது பிடிக்கக் காரணம் போன்ற காரணங்களை எழுதித் தொகுத்து வைக்க வேண்டுமென்ற ஆர்வம் உண்டாகியுள்ளது. இந்நூல் வாசிக்கும் போது உங்களுக்கு பிடித்த பாடல்களும், நினைவுகளும் கட்டாயம் மேலெழும். என் நினைவுகளை மீட்டெடுத்த எஸ்.ராமகிருஷ்ணனுக்கு நன்றிகள் பல.

பறவைக்கோணம் புத்தகம் வாசியுங்கள்.

நண்பர் இளஞ்செழியன் எடுத்த பறவைத்தாகம் தணிக்க கோரும் குறும்படத்தைக் காணுங்கள்: http://www.kathirvalaipoo.blogspot.in/2013/04/blog-post_29.html

காலச்சக்கரம் – திரையிசைப்பாடல்கள்

kamal

மூச்சு ஆராய்ச்சி நிறுவனம் (ரெஸ்பிரேட்டரி ரிசர்ச் ஃபவுண்டேஷன்) சென்னை வடகிழக்கு ரோட்டரி சங்கத்துடன் இணைந்து ஏற்பாடு செய்திருந்த கூட்டத்தில் டாக்டர் நரசிம்மன்(C.O.P.D) க்ரானிக் அப்ஸ்ட்ரக்டிவ் பல்மனரி டிசீஸ் (பிடிவாதமான சுவாசத்தடை வியாதி) மனிதனைக் கொல்வதில் மூன்றாவது இடத்துக்கு வந்திருக்கிறது என்று சொன்னார். இதயநோய், புற்றுநோய் போன்றவை மெள்ள மெள்ளக் குறைந்து வரும்போது ஸி.ஓ.பி.டி முதலிடத்தை நோக்கி விரைந்து கொண்டிருக்கிறதாம்.

இந்தக் கூட்டத்தில் புகைப்பதைக் கைவிடுவது எப்படி என்கிற தலைப்பில் உரையாற்ற அழைத்திருந்தார்கள். இதற்கு நான் தகுதியான ஆள்தான். 1986 வரை ஒரு நாளைக்கு பாக்கெட் சிகரெட் – ப்ளேயர்ஸ், பிறகு கோல்டு ப்ளேக், இறுதியாக வில்ஸ் ஃபில்டர் பிடித்தவன். அதை ஒரே நாளில் கைவிட்டவன்.

சிகரெட் பழக்கம் தற்செயலாகத்தான் ஏற்படுகிறது. குறிப்பாக வீட்டில் கட்டுப்பாடாக வளர்ந்த இளைஞர்கள் அதை ஒருவிதமான defiance ஆகப் பழகிக் கொள்கிறார்கள். ஸ்ரீரங்கத்தில் குடுமி வைத்துக்கொண்டு பிரபந்தம் சொல்லிக் கொண்டிருந்த நண்பன் வேலை கிடைத்து டெல்லி வந்து குடுமியை நறுக்கிய கையோடு மகாவிஷ்ணு சங்கு சக்கரம் போல் அந்தக் கையில் ஒன்று, அந்தக் கையில் பனாமா பற்றவைத்துக் கொண்டான். ரிட்டயர் ஆனப்புறம்தான் நிறுத்தினான்.

இக்கால இளைஞர்கள் பெண் சிநேகிதிகள் முன்னால் ஸ்டைலாக சிகரெட் பற்றவைத்து ஒரு இழுப்பு இழுத்து விட்டுப் பேசிக்கொண்டே வார்த்தை வார்த்தையாக புகை வெளியிடுவது ரொம்ப ஸ்டைலாக இருக்கும். சில காதலிகளும் இதைக் கல்யாணம் வரை விரும்புவார்கள். பிள்ளை பிறந்ததும் அதன் தலைமேல் சிகரெட் புகை வாசனை வரும்போது பழக்கத்தைக் கைவிட்டே ஆகவேண்டும். இல்லையேல் சுளுக்கு.

என் சிகரெட் பழக்கம்… எம்.ஐ.டி.ஹாஸ்டலில் வெள்ளிக்கிழமை மெஸ்ஸில் டின்னர் கொடுக்கும் போது ஒரு 555 சிகரெட் தருவார்கள். அப்போதெல்லாம் அதன் விலை நாலணா. அதை நண்பனிடம் கொடுத்து அவன் புகை வளையம் விடுவதை வேடிக்கை பார்ப்பேன். ஒரு நாள் நாமே குடித்துப் பார்க்கலாமே என்று தோன்றியதில் பழக்கம் பச்சக் என்று ஒட்டிக் கொண்டது.

சிகரெட் பழக்கம் ஒரு சனியன். லேசில் நம்மை விடாது. ஏறத்தாழ முப்பது ஆண்டுகள் என்னுடன் அது இருந்தது. சில சமயம் சிகரெட் பிடிப்பதற்காகவே எதையாவது சாப்பிடுவேன். கொல்லைப்புறம் போவதற்கு சிகரெட் பிடித்தாக வேண்டும்.

சாப்பிட்டவுடன் கட்டாயம் பிடிப்பேன். சிந்தனா சக்தி வேண்டும் என்று வெத்துக் காரணம் சொல்லி பற்றவைத்து விரலிடுக்கில் வைத்துச் சாம்பலை சொடுக்குவேன். இதனால் பல சுவைகளை, வாசனைகளை இழந்தேன். இவ்வாறு அது என்னைக் கெட்டியாகப் பிடித்துக் கொண்டிருந்த போது அவ்வப்போது சே என்று தோன்றி நிறுத்திவிடத் தீர்மானிப்பேன். ஒவ்வொரு புதுவருஷமும் தவறாத வைராக்கியமாக சிகரெட்டை நிறுத்துவேன். அது சிலசமயம் பிப்ரவரி வரை நீடிக்கும். சில சமயம் ஜனவரி 2ம் தேதிவரை.

பெங்களூரில் ஒரு முறை செக்கப்புக்கு போனபோது டாக்டர் பரமேஸ்வரன் ‘ரங்கராஜன், நீ சிகரெட் பழக்கத்தை கைவிட வேண்டும்’ என்றார்.

‘ஏன்?’ என்றேன். ‘உன் ஹார்ட் சரியில்லை’ என்றார்.

‘எப்போதிலிருந்து விட வேண்டும்?’ என்று கேட்டதற்கு நேற்றிலிருந்து’ என்றார். ‘கைவிடாவிட்டால் என்ன ஆகும்?’ என்றேன். ஹார்ட் அட்டாக்… லங் கேன்சர்.. யு சூஸ்.. நீதான் எத்தனையோ படிக்கிறாயே… உனக்கு சொல்ல வேண்டுமா?’

இந்த முறை பயம் வந்துவிட்டது. ஞாபகம் வைத்துக் கொள்வதற்குத் தோதாக ஆகஸ்ட் பதினைந்தைத் தோதாக தேர்ந்தெடுத்து பெல்காலனி தெருநாய் ஜிம்மி உள்பட அனைத்து நண்பர்களிடமும் ‘நான் சிகரெட்டை நிறுத்திவிட்டேன்’ என்று அறிவித்தேன். இது முக்கியம். யாராவது நான் புகைபிடிப்பதை பார்த்தால் உடனே உலகத்துக்கும் மனைவி மக்களுக்கும் தகவல் சொல்லிவிடும் தர்மசங்கடத்தை ஏற்படுத்தினேன். சிகரெட் பழக்கம் என்பது பைனரி இதைத் தெளிவாக உணரவேண்டும்.

ஜாதி இரண்டொழிய வேறில்லை… சிகரெட் பிடிப்பவர், பிடிக்காதவர். குறைவாக பிடிப்பவர்… எப்போதாவது பிடிப்பவர்… இதெல்லாம் ஏமாற்று கைவிடுவதாக இருந்தால் முழுவதும் கைவிட வேண்டும். இருபது சிகரெட்டிலிருந்து பத்து, பத்திலிருந்து எட்டு என்று குறைப்பதெல்லாம் தன்னைத்தானே ஏமாற்றிக்கொள்வது. முதல் தினம் நரகம். முதல் வாரம் உபநரகம்… சிகரெட் இல்லாமல் உலகமே பாழாகி இருக்கும்… இந்த இம்சை தேவையா என்ற ஏக்கத்தைச் சமாளிக்க நிறைய ஐஸ்வாட்டர் குடிக்க வேண்டும். சிகரெட்டுக்குப் பதிலாக பாக்கு, பான்பராக் என்று புகையிலையின் எந்த வடிவமும் கூடாது. வேறு எதாவது வேலையில் கவனம் செலுத்துவது உத்தம்மானது. நீங்கள் விட்டுவைத்த புல்புல்தாரா வாசிப்பது, இயற்கை காட்சிகளை வரைவது, கவிதை எழுதுவது போன்ற பயனுள்ள பொழுது போக்குகளைத் தொடரலாம்.

உதடுகளில் லேசாக நடுக்கம் ஏற்படும் போதெல்லாம் குளிர்ந்த தண்ணீர் குடித்துவிட்டு ‘யார் தெச்ச சட்டை.. எங்க தாத்தா தெச்ச சட்டை… தாத்தா தெச்ச சட்டைப்பைல பாத்தா ரெண்டு முட்டை’ என்று தொடர்ந்து சொல்ல வேண்டும். பக்கத்தில் இருப்பவர்கள் புகார் செய்தால் ‘ஒரு வாரம் அப்படித்தான் இருக்கும்’ என்று அவர்கள் மேல் பாயலாம். யாரையாவது அடிக்க வேண்டும் போல இருக்கும். அதற்கு வசதியில்லையென்றால் ஒரு மேளம் வாங்கிக் கொள்ளுங்கள்… கூடவே உதைப்பதற்கு ஒரு கால்பந்தும், சுழற்ற ஒரு சாவிச் சங்கிலியும் வைத்துக் கொள்ளலாம்.(கண் ஜாக்கிரதை) ஒரு வாரமானதும் பழக்கம் லேசாக வாலைச் சுருட்டிக் கொள்ளும். நாட்களை எண்ணத் துவங்கலாம். தமிழ்ப் படங்கள் போல வெற்றிகரமான பத்தாவது நாள்… இன்று பதினைந்தாவது நாள்… சூப்பர்ஹிட் ஐந்தாவது வாரம்… இப்படி! மெள்ள மெள்ள நண்பர்களிடம் மனைவியிடமும் பீற்றிக் கொள்ளத் துவங்கலாம்… போஸ்டர்கூட ஒட்டலாம். ஆனால், இந்தக் கட்டத்தில் சிகரெட் குடிக்கும் நண்பர்கள் அருகே செல்வதும் மிதப்புக்காகப் பையில் குடிக்காமல் சிகரெட் வைத்துக் கொள்வதும் விஷப் பரீட்சைகள்.

பழக்கத்தை விட்ட நாற்பத்தெட்டாவது நாள் முதல் மைல்கல் தாண்டிவிட்டீர்கள். ஒரு சிகரெட்டை எடுத்து அதைப் பற்றவைக்காமல் மூக்கில் ஒட்டிப்பார்த்து விட்டு ‘சீ நாயே’ என்று சொல்ல முடிந்து, அழுகை வராவிட்டால் பரீட்சை பாஸ். இனியெல்லாம் சுகமே. சிகரெட் பழக்கம் நம்முடன் அஞ்சு வருஷம் தேங்குகிறது என்று டைம் பத்திரிக்கையில் படித்தேன். அதாவது சிகரெட்டை நிறுத்தின அஞ்சு வருஷத்துக்குள் ஒரு சிகரெட் பிடித்தாலும் மறுதினமே பழைய ஞாபகம் உசுப்பப்பட்டு பத்தோ, இருபதோ வழக்கமான கோட்டாவுக்குப் போய்விடூவீர்கள். அஞ்சு வருஷம் தாண்டி விட்டால் பழக்கம் போய்விடுகிறது.

இப்போதெல்லாம் அமெரிக்காவில் சிகரெட்டை நிறுத்த பலவிதமான patch டம்மி சிகரெட் எல்லாம் கொடுக்கிறார்கள். இந்தியாவிலும் கிடைக்கலாம். எல்லாவற்றிலும் சிறந்தது லங் கேன்சர் பயம்தான். 90 விழுக்காடு சிகரெட் குடிப்பதால் இது வருகிறது. வகுத்துப் பார்த்தால் இன்றைய தினம் இந்தியாவில் ஒவ்வொரு குடிமகனும் வருஷத்துக்கு 130 சிகரெட் குடிக்கிறார் என்று ஒரு புள்ளி விவரம் சொல்கிறது. சுமார் ஐந்து கோடி மக்கள். பெரும்பாலும் ஆண்கள் புகைபிடிக்கிறார்கள். 50 லட்சம் பேர் அதைக் கைவிட்டிருக்கலாம். அந்நியச் செலாவணி நிறைய சம்பாதிக்கிறது. நம் மக்கள் தொலையில் ஐந்து விழுக்காடாவது இந்த வியாதியின் அபாயத்தில் இருக்கிறார்கள். இதனுடன் சேர்ந்து புகையிலை சார்ந்த வாய், நாக்கு, தொண்டை, உணவுக்குழல் கேன்சர்கள்… கிட்னிகாரானரி ஆர்ட்டரிகளைப் பாதிக்கும் வியாதிகளுக்குக் கணக்கில்லை. இதை அறிந்து கொண்டால் பாட்ச் தேவையில்லை.

பற்ற வைப்பதற்கு முன் ஒரு நிமிஷம்..!

நன்றி : சுஜாதா – கற்றதும் பெற்றதும் – ஆனந்தவிகடன் (29.12.2002)

பிப்ரவரி 27 சுஜாதா நினைவு நாள்

பள்ளிநாட்களில் ஒருமுறை தாத்தா வாங்கி வைத்திருந்த பீடியை ஒருமுறை பற்ற வைத்து இழுத்துப் பார்த்தேன். பிறகு தொழில்நுட்பவியல் படிப்பின் இறுதிநாளன்று நண்பனுக்காக சிகரெட்டை இரண்டு இழு இழுத்தேன். இந்த இரண்டுமுறை தவிர வேறெந்த நாளும் புகைபிடித்ததில்லை. பீடி, சிகரெட் என்னை இன்றுவரை ஈர்க்கவில்லை. நீங்கள் புகைப்பவராக இருந்தால் சிகரெட்டை நிறுத்த இந்தப் பதிவு உதவினால் ரொம்ப மகிழ்ச்சி.