கமலுக்கு நேரமிருக்கிறது; நமக்கேன் இருக்காது?

வாசகா – ஓ – வாசகா…
என் சமகால சகவாசி
வாசி…

புரிந்தால் புன்னகை செய்
புதிர் என்றால் புருவம் உயர்த்து
பிதற்றல் எனத் தோன்றின்
பிழையும் திருத்து…

எனது கவி உனதும்தான்
ஆம்…
நாளை உன்வரியில்
நான் தெரிவேன்.  

– கமல்ஹாசன்

திரைப்படங்களும், தொலைக்காட்சிகளும், அலைபேசிகளும் வாசிப்பை நாசம் செய்யும் வேளையில் நம்மை ஆச்சர்யமூட்டும் விசயமாக தன்னுடைய திரைப்படப் பணிகளினூடே தமிழின் உன்னதமான படைப்புகளை வாசிக்கும் கமல்ஹாசனைப் பார்க்கும்போது பொறாமையாகயிருக்கிறது. வாசிக்க நேரமில்லை என்று சொல்ல வெட்கமாகயிருக்கிறது. புத்தகம் பேசுது  மாத இதழுக்காக கமல்ஹாசனோடு எழுத்தாளர் வெண்ணிலா மற்றும் முருகேஷ் எடுத்த நேர்காணலிலிருந்து ஒரு சிறுபகுதி:

கலையுலக இலக்கியவாதியான உங்களின் இலக்கிய அனுபவத்தைச் சொல்லுங்கள்?

கலையுலகத்திலிருந்து இலக்கியவாதியின் அனுபவத்தைப் பேசணும்னா, அது ரொம்ப சோகம்தான். ஜே.கே.வினுடைய கலை உலக அனுபவங்கள் மிகப் பெரிய தாக்கத்தை உண்டுபண்ணும். இன்றைக்கு வாழும் ஹீரோக்களில் முதன்மையானவராக நான் நினைப்பது ஜே.கே.வைத்தான். ஆனால், நான் அவரை வாழ்நாளில் நான்கைந்து முறைகளுக்குமேல் பார்த்ததில்லை. காரணம், அதீதமான வியப்பும் பெருமிதமும். அது மட்டுமில்லாம கிட்ட பார்க்கிறதுல சின்ன தயக்கமும் இருக்கு. நரைச்ச மீசை, உயரம் இதெல்லாம் தொந்தரவு பண்ணிடுமோன்னு தள்ளியே இருக்கேன். குழம்பிடுமோன்னு தோணும். ‘வாழும் ஹீரோ’ அவர் காதுபட சொல்றதுல எனக்கு சந்தோஷம். அந்த மாதிரி நெறய பேர் இருக்காங்க.

தன்னோட ஆசிரியரை எனக்கு அறிமுகப்படுத்தி வச்சாரு கு.ஞானசம்பந்தன். தொ.பரமசிவன். தொ.ப.வைப் பார்த்து எனக்கு ஆச்சர்யம். ஆனா, உடம்பு முடியாம ஒரு வயோதிகரா தொ.ப.வைப் பார்க்கிறதுல ஒரு சின்ன வருத்தம். இளைஞரா இருந்தப்ப எங்க அப்பாவையெல்லாம் பார்க்க வந்திருக்காரு. அப்ப தெரிஞ்சுக்காம போயிட்டமேன்னு தோணும். கோபமான தொ.ப.வைப் பார்த்திருக்கலாம். ஞானசம்பந்தனையே சொல்லலாம். அவர் வெளியே கோமாளி மாதிரி வேஷம் போட்டுக்கிட்டாலும் ரொம்ப ஆழமான, கோபமான ஆளு. கோமாளி தொப்பி ஒரு யுக்தி. ஞானக்கூத்தன், புவியரசு இவங்கள்லாம் எனக்குக் கிடைச்ச பரிசு. நட்புன்றது நானா தேடிக்கிட்டதுதான். அதனால் அது பரிசா, நான் சம்பாதித்தான்னு தெரியல. இதே இடத்தில் உட்கார்ந்து சுந்தர ராமசாமியோட ரெண்டு மணி நேரம் பேசிக்கிட்டிருந்தேன். ஞானக்கூத்தன்தான் ஏற்பாடு செஞ்சாரு. முக்கியமான ஒரு வேலையை செஞ்ச மாதிரி ஞானக்கூத்தன் அன்னைக்கு நெகிழ்ச்சியா பக்கத்தில் நின்னுக்கிட்டுருந்தார். எனக்கு ரொம்ப நெகிழ்வான அனுபவம். அதே மாதிரி சமீபத்துல படிச்சது ப.சிங்காரத்தை. அவரு செத்துப்போனப்புறம்தான் அவர படிச்சேன். அவரோட புத்தகம் இருக்கிறதால அவர் இல்லாம போனதைப் பத்தி எனக்கு வருத்தமில்ல. சமீபத்தில் தூக்கி வாரிப்போட்ட புத்தகம் கொற்றவை. மிரண்டுட்டேன். சொல்லியே ஆகணும். ஜெயமோகன் சினிமாவுக்கு வந்ததால சொல்லலை. ஒருவேளை அவர் என் சினிமாவில் வேலை செஞ்சு என் புஸ்தகம் படிங்கன்னு குடுத்திருந்தார்னா நான் படிச்சிருக்கமாட்டேன்னு நினைக்கிறேன். நானா தேடி படிச்சதால என்னை வியப்பில் ஆழ்த்தியது. நான் படிக்கிறது பத்தலன்றது மட்டும் எனக்குத் தெரிஞ்சது.

‘ஆழி சூழ் உலகு’ன்னு ஒரு புஸ்தகம். நண்பர்கள் பரிந்துரை பண்ணாங்க. ஜி.நாகராஜனையே நான் அவர் இறந்து போனதுக்குப் பின்னாடிதான் படிச்சேன். ‘குறத்திமுடுக்கு’, ‘நாளை மற்றொரு நாளே’ எல்லாம் அப்புறம்தான் படிச்சேன். ஜெயகாந்தனைத் தெரிஞ்சுகிட்டது மாதிரி அவரைத் தெரிஞ்சுக்கிட்டிருந்தா அவர் கூட கைகுலுக்கியிருக்கலாமேன்னு தோணுச்சு. கு.ப.ரா.ல்லாம் காலதாமதமாக வாங்கிப் படிக்கிறேன். நான்தான் சொல்றேனே, 15 வருசமாத்தான் தெளிவு வர ஆரம்பிச்சுருக்கு.

(நன்றி – வெண்ணிலா, முருகேஷ் – புத்தகம் பேசுது, ஜனவரி 2008 இதழ்)

கமல்ஹாசன் தமிழில் சங்க இலக்கியம் தொடங்கி ஜெயகாந்தன், தி.ஜானகிராமன், லா.சா.ரா, கு.ப.ரா, பிரமிள், புவியரசு, ஞானக்கூத்தன், ப.சிங்காரம், ஜி.நாகராஜன், தொ.பரமசிவன், சுந்தர ராமசாமி, சுஜாதா, வண்ணதாசன், ஜெயமோகன், கோணங்கி என இன்னும் பல எழுத்தாளர்களின் நூல்களை தேடி வாசித்துக்கொண்டிருக்கிறார். கமல்ஹாசன் மிகச் சிறந்த வாசிப்பாளர் என தொ.பரமசிவன் சொல்கிறார். கமல்ஹாசன் மய்யம் என்ற இலக்கிய மாத இதழை முன்பு நடத்தியிருக்கிறார். நாமும் நல்ல நூல்களை வாங்கி வாசிப்போம்.

ஜி. நாகராஜன் பிறந்த நாள்  & மதுரை புத்தகத் திருவிழா சிறப்புப் பதிவு

வாசிப்பது தியானம்

அலைபாயும் மனதை அடக்குவது கடினம். மனதை ஒருமுகப்படுத்த தியானம் செய்வது அதைவிடக் கடினம். மனதை அடக்க முயலாமல் எண்ண ஓட்டங்களை ஒருநிலைப்படுத்த எளிய வழி வாசிப்பது. வாசிக்க வாசிக்க புத்தகத்தோடு மனம் ஒன்றிவிடுகிறது. வாசிப்பது தியானம்.

வாசிக்கத் தெரிந்த எல்லோரும் நல்ல வாசகர்களாக இல்லை என்பது வருத்தமான விசயம். வாசிப்பின் பயன், எதை வாசிப்பது, வாசிப்பை மேம்படுத்த என்ன செய்யலாம், வாசிப்பதற்கு உள்ள தடைகள் என்னவெல்லாம் என்பது குறித்து பார்ப்போம்.

நம் நாட்டில் நடைபெறும் பெரும்பாலான குற்றங்களுக்கு மனச்சிக்கல்களே காரணம். பலவிதமான மனிதர்கள், இடங்கள், சூழல்கள் குறித்து வாசிக்கும் போது எது சரியான வாழ்க்கை என்பதை நாமே உணர்ந்து நம்மைத் திருத்திக் கொள்ள நல்லதொரு வழிகாட்டியாக புத்தகங்கள் திகழ்கின்றன. வாசிப்பது வாழ்க்கைக்காக என்ற இலக்கோடு வாசிக்கத் தொடங்கினால் புத்தகங்கள் நம் வாழ்வின் ஒவ்வொரு கணத்தையும் உன்னதமாக்கும். நம்மை சாதி, மதங்கடந்த நல்லதொரு மனிதனாக்கும்.

முதலில் எதை வாசிப்பது என்ற தயக்கம் நம் எல்லோருக்கும் இருக்கும். நமக்கு பிடித்தமான விசயங்களைக் குறித்த தேடல் நம்மை சரியான வாசிப்புத் தளத்திற்குள் கொண்டு சேர்க்கும். மதுரையை உங்களுக்குப் மிகவும் பிடிக்குமென்றால் மதுரையை மையமாகக் கொண்டு வந்துள்ள கதைகள், கட்டுரைகள், கவிதைகள் மற்றும் ஆய்வு நூல்களை தேடிப்படிக்கலாம். அரவிந்தன் – பூரணி என்ற அற்புதக் கதாமாந்தர்களை கொண்டு நா.பார்த்தசாரதி எழுதிய குறிஞ்சிமலர், மதுரையின் 600 ஆண்டு கால வரலாற்றைச் சொல்லும் சு.வெங்கடேசனின் காவல்கோட்டம் போன்ற நாவல்களை வாசிக்கும்போது மனதுக்கு நெருக்கமாகத் தோன்றும்.

மனோகர் தேவதாஸ் மதுரையில் தன் இளமைக்கால நினைவுகளை கோட்டோவியங்களோடு வரைந்து எழுதிய எனது மதுரை நினைவுகள் உங்களையும் ஒரு புத்தகம் எழுதத்தூண்டும். தொ.பரமசிவனின் அழகர்கோயில் என்ற ஆய்வு நூல் கோயில்வரலாறு தொடங்கி சித்திரைத் திருவிழா வரையிலான பல தளங்களில் வாசிக்கச் சுவாரசியமான நூல். ஆறுமுகம் எழுதிய மதுரைக் கோயில்களும் திருவிழாக்களும், குன்றில் குமார் எழுதிய மதுரை அன்றும் இன்றும், பசுமைநடை வெளியீடான மதுர வரலாறு, தொல்லியல் அறிஞர் சாந்தலிங்கம் எழுதிய மதுரையில் சமணம், தொல்லியல் துறை வெளியீடான மதுரை மாவட்டத் தொல்லியல் கையேடு போன்ற நூல்கள் மதுரையின் வரலாற்றை அறிந்து கொள்ள உதவும்.

இயற்கையை நேசிப்பவர்கள் நம்மாழ்வாரின் உழவுக்கும் உண்டு வரலாறு, மா.கிருஷ்ணனின் பறவைகளும் வேடந்தாங்கலும், தியோடர் பாஸ்கரனின் இன்னும் பிறக்காத தலைமுறைக்காக போன்ற நூல்களை வாசிக்கலாம். சங்க இலக்கியங்களில் பாடாத சூழலியலையா ஆங்கிலத்தில் எழுதிவிடப் போகிறார்கள்? பயணங்களில் விருப்பமானவர்கள் எஸ்.ராமகிருஷ்ணனின் தேசாந்திரி வாசித்தால் உங்கள் பயணங்கள் இன்னும் அற்புதமாகும். திரைப்படங்கள் உங்களுக்கு பிடித்தவிசயமென்றால் தியோடர் பாஸ்கரன் தொகுத்த சித்திரம் பேசுதடி, செழியனின் உலக சினிமா போன்ற கட்டுரைத்தொகுப்புகளை வாசிக்கலாம். திரைப்படங்கள் மீதான புதிய பார்வையை இந்நூல்கள் உங்களுக்கு ஏற்படுத்தும்.

நெய்தல்நில மக்களின் வாழ்வை அறிய விரும்பினால் வண்ணநிலவனின் கடல்புரத்தில், ஜோ டி குருஸூன் ஆழி சூழ் உலகு, கொற்கை, ராஜம் கிருஷ்ணனின் அலைவாய்கரையில், ஜெயமோகனின் கொற்றவை, ஆ.சிவசுப்பிரமணியனின் உப்பிட்டவரை வாசிக்கலாம். இந்நூல்கள் கடல்சார்ந்த மக்களின் வாழ்க்கைப் பாடுகளை உங்களுக்கு கற்றுத்தரும். நம் பண்பாட்டின் வேர்களை அறிய தொ.பரமசிவனின் பண்பாட்டு அசைவுகள், பக்தவத்சலபாரதி தொகுத்த தமிழர் உணவு போன்ற நூல்கள் உதவும். வாசிப்பே எல்லாவற்றிற்கும் மையப்புள்ளியாக விளங்குகிறது.

இளையதலைமுறையிடம் வாசிப்பை பழக்கமாக்க பள்ளி, கல்லூரிகளில் வாசகர் மன்றங்களை உருவாக்கலாம். தினம் ஒரு சிறுகதை வாசித்து அதைக் குறித்த உரையாடல்கள் மூலம் வாழ்க்கையை கதைகளின் வாயிலாக புரிந்து கொள்ளலாம். விடுமுறை நாட்களில் நாவல்கள், கட்டுரைத் தொகுப்புகள் வாசிக்கலாம். இதன்மூலம் வருடத்திற்கு குறைந்த பட்சம் 200 சிறுகதைகள் வாசிக்க முடிவதுடன் ஐம்பதுக்கும் மேற்பட்ட நல்ல புத்தகங்களையும் வாசிக்க முடியும். இப்பழக்கத்தை வீடுகளிலும் கடைபிடிக்கலாம். ஒருவருக்கொருவர் உரையாடும் போது குடும்பத்தில் இணக்கம் ஏற்பட்டு மகிழ்ச்சி உண்டாகும். புத்தகத்திருவிழாக்களுக்குச் செல்வதும், எழுத்தாளுமைகளை சந்தித்து உரையாடுவதும் வாசிப்பை அடுத்த தளத்திற்கு கொண்டு செல்ல உதவும்.

வாசிப்பின் முதல்தடையே வாசிப்பு பழக்கத்தை மதிப்பெண்களோடு போட்டுக் குழப்பிக் கொண்டதுதான். அதனால்தான் பலர் பள்ளி, கல்லூரிப் படிப்பை முடித்ததும் புத்தகங்களைத் தொடுவதில்லை. அதற்குப் பின் வாசிப்பவர்களும் அதிக சம்பளமுள்ள பணிகளை நோக்கி போட்டித் தேர்வுகளுக்காக பல்லாயிரக்கணக்கான தகவல்களை படித்து தகவல் களஞ்சியமாக தங்களை மாற்றிக் கொள்கிறார்கள். இன்னொரு புறம் வாசிப்பு ஜோதிடம், சுயமுன்னேற்றம், சமையல், திரைப்படத்துணுக்குகள் என குறுகிப்போனது மற்றொரு சோகம்.

ஒருநாள் முழுவதும் இடைவிடாமல் தொலைக்காட்சி முன் தவமிருக்கும் நாம் ஒருமணிநேரங்கூட நல்ல புத்தகங்களை வாசிக்க நேரம் செலவளிப்பதில்லை. ஆயிரக்கணக்கில் வீட்டு உபயோகப் பொருட்கள் வாங்கும் நாம் நூறு ரூபாய் செலவளித்து நல்ல புத்தகம் வாங்கத் தயங்குகிறோம். வாரந்தவறாமல் வழிபாட்டுத் தலங்களுக்கும், பொழுதுபோக்கிடங்களுக்கும் செல்லும் நாம் நூலகங்கள், புத்தகநிலையங்களுக்குள் காலடியெடுத்து வைக்கத் தயங்குகிறோம். இந்நிலை மாற வேண்டும்.

ஐந்து ரூபாயிலிருந்து நல்ல புத்தகங்கள் கிடைக்கின்றன. நூலகங்களில் உறுப்பினர் ஆவதற்கு நூறு ரூபாய்க்கும் குறைவான கட்டணமே வசூலிக்கப்படுகிறது. இந்த வாய்ப்பை பயன்படுத்தி வாசிப்புப் பழக்கத்தை அதிகமாக்குவோம். நாம் மற்றவர்க்கு வழங்குவதற்கான அற்புதப் பரிசு புத்தகங்களே.வாசிப்பை நேசிப்போம். புத்தகங்களே நம்முடைய நல்ல தோழன் என்பதை உணர்வோம். நம் அகத்தையே வாசிப்பகமாக்குவோம். வாசிப்பது தியானம்.

மதுரையில் வாழ்ந்த ரோசாப்பூ துரை

மதுரையின் மறக்கப்பட்ட மனிதர்களுள் ரோசாப்பூ துரை என்று அறியப்படும் ஜார்ஜ் ஜோசப் முக்கியமானவர். ஆனால், பிரமலைக்கள்ளர் சமூகக் குழந்தைகளுக்கு ‘ரோசாப்பூ’, ரோசாப்பூ துரை என்று பெயரிடும் வழக்கம் இன்றும் நிலவி வருகிறது. குற்றப் பரம்பரைச் சட்டத்தை அந்தச் சமூகத்தைச் சேர்ந்த பலரும் எதிர்த்துக் கிளம்பாத சூழலில் அதை எதிர்த்த முன்னோடி உணர்வாளர் ஜார்ஜ் ஜோசப். அறிவுலகமோ அவரை முற்றாக மறந்துவிட்டது என்றே சொல்ல வேண்டும்.

– தேவேந்திர பூபதி

ஐந்து ஆண்டுகளுக்கு முன்பு என்னுடன் படித்த நண்பனொருவன் அலைபேசியில் அழைத்து அவனுக்கு சுதந்திரப் போராட்டத்தில் ஈடுபட்ட கிறிஸ்துவ தியாகி குறித்து கட்டுரை வேண்டுமெனக் கேட்டான். நான் அச்சமயத்தில் எங்கண்ணனிடமிருந்து வாங்கி வாசித்த பழ.அதியமான் அவர்கள் எழுதிய ‘அறியப்படாத ஆளுமை – ஜார்ஜ் ஜோசப்’ குறித்து ஞாபகம் வர சரியென ஒத்துக்கொண்டேன். இந்நூலில் உள்ள ஜார்ஜ் ஜோசப் அவர்களின் வாழ்க்கை குறிப்பை பார்த்து எழுதியதை இப்போது வாசித்துப் பார்க்கும்போது பள்ளி மாணவர்களுக்கானது போல இருக்கிறது. அதை அப்படியே பதிவு செய்கிறேன்:

சுதந்திர போராட்டத்தில் மொழி, இனம், மதம் கடந்து போராடியவர்கள் பலர். அவர்களுள் இப்பொழுது நாம் காணப்போகும் தலைவர் “ரோசாப்பூத்துரை” என்று மக்களால் அழைக்கப்பட்ட ஜார்ஜ் ஜோசப் ஆவார்.   இவர் கேரள மாநிலத்தில் உள்ள செங்கண்ணூரில் 1887 ஜூன் 5ல் பிறந்தார். நல்ல வசதியான குடும்பம் இவருடையது. சென்னை கிறிஸ்தவ கல்லூரியில் இன்டர்மீடியட் படிப்பை முடித்தார்.

 1904 ல் மேல்படிப்புக்காக பிரிட்டன் சென்றார். எடின்பரோவில் எம்.ஏ.யும் லண்டனில் பாரிஸ்டர் பட்டமும் பெற்றார். அந்த சமயம் இந்திய விடுதலைப்போர் 50 வது ஆண்டை எட்டியிருந்தது. லண்டன் இந்தியா ஹவுசில் தங்கிருந்த இளைஞர்கள் 1908 மே 10ல் இதற்கு விழா எடுத்து கொண்டாடினர். இந்நிகழ்ச்சி ஜார்ஜ் ஜோசப்க்கு ஏகாதிபத்தியத்திற்கு எதிரான மனநிலையை இளமையில் ஊட்டியது. லண்டனில் இருந்து சொந்த ஊருக்கு 1909 ல் திரும்பினார். சூசன்னாவுடன் 1909 ல் இவருக்கு திருமணம் நடந்தது. பின் தனது நண்பரின் ஆலோசனைப்படி மதுரையில் வழக்கறிஞர் தொழிலை தொடங்க வந்தார். மதுரையில் கிரிமினல் வழக்கு விசாரணைகளை ஜோசப் செய்தார். இதன் மூலம் நல்ல வசதி பெருகியது. இந்த சமயத்தில் தேசிய அரசியலில் ஆர்வம் பிறந்தது. தொழிலை வருவாய்க்காக செய்திருப்பினும் நலிந்தோர்க்கு உதவுவதற்காக செயல்படுத்தினார்.

 1915ல் குற்றப் பரம்பரைச் சட்டத்தினால் பாதிக்கப்பட்ட சமூகத்தினரை காக்க கடுமையாக உழைத்தார். இதன் மூலம் அரசிற்கெதிரான அவரின் போராட்டம் தொடங்கியது.   1916ல் அன்னிபெசன்ட் அம்மையாரை மதுரையில் சந்தித்தார். இதன் மூலம் ஹோம்ரூல் இயக்கத்தில் ஈடுபட்டு தீவிரமாக உழைத்தார்.

 1918ல் மதுரையில் தொழிலாளர் சம்பள உயர்வுக்காக போராடி அவர்களுக்கு சம்பள உயர்வை பெற்றுத்தந்தார். இராஜாஜி மற்றும் வரதராஜூலுவுடன் அச்சமயம் ஜார்ஜ்க்கு பழக்கம் ஏற்பட்டது. 1919 ல் பிப்ரவரி மாதம் மகாத்மா காந்தியை சந்திக்கும் வாய்ப்பு கிட்டியது. இதன் மூலம் காந்தியுடன் நெருக்கமாக பழகும் வாய்ப்பு கிட்டியது. ரௌலட் சட்டத்திற்கு எதிரான மாநாட்டில் கலந்து கொண்டார். 1920ல் கிலாபத் இயக்கத்தில் பங்கு எடுத்தார். தேசபக்தன் இதழின் ஏழு இயக்குனர்களில் ஒருவராக இருந்துள்ளார். இதன் மூலம் தமிழக அளவில் பிரபலமானார். மதுரையில் காந்தி அரைஆடை உடுத்திய சமயம் இவர் வழக்கறிஞர் தொழிலை விட்டு எளிய வாழ்க்கை நடத்தினார்.

 1920ல் நேரு குடும்பத் தொடர்பால் வட இந்தியா சென்று ‘தி இன்டிபென்டென்ட்’ இதழின் ஆசிரியரானார். இவரது கூரிய எழுத்தால் பிரிட்டிஷ் அரசு விழிப்புற்று நடவடிக்கை எடுத்தது. இதனால் கைதாகி 24 மாதம் தண்டனை அனுபவித்தார். இவருடன் நேரு அவர்களும் சிறையிலிருந்தார்.       சிறையிலிருந்து வந்து தீவிரமாக காங்கிரஸில் ஈடுபட்டார். காந்தியின் ‘யங் இந்தியா’வின் பொறுப்பாசிரியர் ஆனார். அச்சமயம் இவரது மனைவியின் உடல்நிலை சரியில்லாமல் போக தென்னாடு திரும்பினார். “மரங்கள் ஓய்வை விரும்பினாலும் காற்று விடுவதில்லை” என்பது போல 1924 ல் வைக்கம் பிரச்சனை வர மனைவியைக் கவனிக்க முடியாமல் வைக்கம் சென்று கேசவ மேனனுக்குப் பிறகு தலைமை ஏற்று நடத்தினார். பின் இதனால் கைதாகி ஆறுமாத சிறை தண்டனை அடைந்தார்.

 1925ல் மீண்டும் மதுரை வந்தார். அச்சமயம் அவர் வீட்டுக்கு காந்தி விருந்தினராக வந்திருந்தார். 1927ல் சென்னையில் காங்கிரஸ் மாநாட்டில் கலந்து கொண்டார். சைமன் குழுவுக்கு எதிர்ப்பு காட்டினார். பின் காங்கிரஸில் இருந்து விலகி இருந்தார். அச்சமயம் கிறிஸ்துவத்திலும், கேரள அரசியலிலும் ஈடுபாடு காட்டினார். 1936 ல் மீண்டும் காங்கிரஸில் இணைந்தார். 1937ல் மத்திய சட்டசபை உறுப்பினரானார். அச்சமயம் சிறுநீரக பாதிப்பு ஏற்பட்டு மிகவும் கஷ்டப்பட்டார். சிறுநீரக பாதிப்பும் ரத்த அழுத்தமும் அதிகமானதால் மதுரை அமெரிக்க மிஷன் மருத்துவமனையில் சேர்க்கப்பட்டார். மருத்துவமனையிலேயே 1938 மார்ச் 5 ஆம் தேதி காலமானார். மதுரை கீழவாசலில் அவரது உடல் கிறிஸ்துவ முறைப்படி அடக்கம் செய்யப்பட்டது.

 பாரதியார், சுப்ரமணிய சிவா, வ.உ.சி போல சுதந்திரம் அடையும் முன்னரே இறந்து போனார். ஆனாலும் குற்றப் பரம்பரை சட்டத்தை நீக்க இவர் போராடியதால் கள்ளர், மறவர் சமூகத்தினர் ஜார்ஜ் ஜோசப் நினைவாக தங்கள் குழந்தைகளுக்கு ரோசாப்பூத்துரை என்ற பெயரை வைக்கின்றனர். இவரது பிள்ளைகள் இவரைப் பற்றி நூல் வெளியிட்டு உள்ளனர்.

 அறியப்படாத ஆளுமை: ஜார்ஜ் ஜோசப் – பழ.அதியமான், காலச்சுவடு பதிப்பகம்

2007 மதுரை புத்தகத்திருவிழாவில் வெளியீடுவதற்காக இந்நூலை எழுதியதாக நூலாசிரியர் பழ.அதியமான் முன்னுரையில் குறிப்பிடுகிறார். ஆகஸ்ட் 29ம் தேதியிலிருந்து செப்டம்பர் 7 வரை மதுரை தமுக்கம் மைதானத்தில் 9வது மதுரை புத்தகத்திருவிழா நடைபெறுகிறது. மதுரைக்காரர்கள் இந்நூலை வாங்கி நம்ம ஊரில் வாழ்ந்த அந்தத் தியாகியை பற்றி அறிந்து கொள்வோம். நல்ல தகவல்களை நாலு பேரிடம் பகிர்ந்து கொள்வோம்.

மதுர வரலாறு

தமிழின் தாய்வீடான மதுரைக்கு உலகத்தின் எந்த மூலையிலிருந்து நீங்கள் வந்தாலும் உங்களை வரவேற்பது மதுரையைச் சூழ்ந்த மலைகளே. யானைமலை, நாகமலை, அழகர்மலை, சமணமலை, திருப்பரங்குன்றமலை, பசுமலை போன்ற மலைகளைக் காணாமல் மதுரைக்குள் பயணிக்க இயலாது.

நாலாபக்கமும் நான்மாடக்கூடலைச் சூழ்ந்த இம்மலைகள் மதுரைக்கு அழகாகவும், அரணாகவும்  திகழ்கின்றன. தொல்குடிகளின் பாறைஓவியங்களும், ஈராயிரம் ஆண்டுகளுக்கு முந்தைய தமிழிக் கல்வெட்டுகளும், சமணத்துறவிகளின் காலடித்தடங்களும்  இம்மலையில் உறைந்திருக்கிறது.

அனைவருக்கும் கல்வியையும், மருத்துவத்தையும் கொடையாய் வழங்குவதை தம் பணியாகக் கொண்ட சமணத்துறவிகளின் அன்புதான் இம்மலைகளிலுள்ள பாறையிடுக்குகளில் ஊற்றாய் இன்றும் கசிந்து கொண்டிருக்கிறது.

மலைகள் சூழ்ந்த மதுரையின் தொல்லியல் தலங்களை நோக்கி மாதந்தோறும் ஒரு ஞாயிற்றுக்கிழமை பயணித்த பசுமைநடைக்குழு அந்த பயண அனுபவங்களைத் தொகுத்து ‘மதுர வரலாறு – சமணப் பெருவெளியின் ஊடே…’ என்ற நூலாக வெளியிட்டுள்ளனர். ‘மதுர வரலாறு’ எனும் போதே தித்திப்பாயிருக்கிறது. மதுர என்றாலே இனிமைதானே.

பசுமைநடையின் 25வது நடையைக் சிறப்பிக்கும் விதமாக கீழக்குயில்குடி சமணமலை அடிவாரத்தில் உள்ள ஆலமரத்தோப்பில் கொண்டாடிய விருட்சத் திருவிழாவில் மதுர வரலாறு நூலை பண்பாட்டு ஆய்வாளர் தொ.பரமசிவன் அய்யா வெளியிட சமணமலை அடிவாரத்தில் பருத்திபால் விற்கும் ஜெயமணி அம்மா பெற்றுக் கொண்டார். அற்புதமான நிகழ்வு.

அழகர்மலை, யானைமலை, கீழக்குயில்குடி சமணமலை, கொங்கர்புளியங்குளம், முத்துப்பட்டி, விக்கிரமங்கலம், நடுமுதலைக்குளம், மேட்டுப்பட்டி சித்தர்மலை, திருப்பரங்குன்றம், வரிச்சூர் குன்னத்தூர், மாங்குளம் மீனாட்சிபுரம், அரிட்டாபட்டி, கீழவளவு, கருங்காலக்குடி, திருவாதவூர், குப்பல்நத்தம், மாடக்குளம் என மதுரையின் வரலாற்றுத்தலங்களைக் குறித்து கல்வெட்டுத் தகவல்களோடும், பேருந்து வழித்தட எண்களோடும் இந்நூல் வந்துள்ளது.

இந்நூலில் சமணமதத்தின் தோற்றமும், தென்னகப் பரவலும் குறித்த தொல்லியல் அறிஞர் சாந்தலிங்கம் அய்யாவின் கட்டுரை மதுரையில் சமண வரலாறை எளிமையாக எல்லோருக்கும் எடுத்துரைக்கிறது. பசுமைநடை உருவான விதம் மற்றும் பசுமைநடைப் பயணக்குறிப்புகளை வாசிக்கும் போது மகிழ்ச்சியாகயிருக்கிறது. பசுமைநடைக்குழுவினருடன் இந்த இடங்களுக்கெல்லாம் பயணித்ததால் இந்நூல் இன்னும் எனக்கு நெருக்கமாகிறது.

மதுர வரலாறு நூலை புதிதாக வாசிப்பவர்கள் பசுமைநடையில் இணைந்து பயணிக்க வேண்டும் என்ற ஆவலை ஏற்படுத்தும். பசுமைநடையில் இணைய 97897 30105 என்ற அலைபேசி எண் அல்லது greenwalkmdu@gmail.com மின்னஞ்சல் முகவரியைத் தொடர்பு கொள்ளவும். இந்நூல் வெளிவர காரணமாக இருந்த அனைவருக்கும், விளம்பரங்கள் தந்துதவிய நிறுவனங்களுக்கும், பசுமைநடையை தொடங்கிய எழுத்தாளர் அ.முத்துக்கிருஷ்ணனுக்கும் நன்றிகள் பல.

மதுர வரலாறு – சமணப்பெருவழியின் ஊடே…

விலை – 100 ரூபாய், பசுமைநடை வெளியீடு

கிடைக்குமிடம்

சர்வோதய இலக்கியப் பண்ணை, மல்லிகை புக் சென்டர்

மேலவெளிவீதி, மதுரை.

மதுரையில் 8-வது புத்தகத் திருவிழா

சங்க இலக்கியங்கள் பல இயற்றப்பட்ட ஊர் மதுரை. சங்க காலப் புலவர்களில் பலரும் வசித்த ஊர் மதுரை. தமிழகத்திலேயே தமிழிக்கல்வெட்டுகள் அதிகம் காணப்படும் ஊர் மதுரை. மதுரையும் தமிழும் என்றாலே கொண்டாட்டந்தான்.

மதுரையில் புத்தகத்திருவிழா வருகிற ஆகஸ்ட் 30 முதல் செப்டம்பர் 9 வரை மதுரை தமுக்கம் மைதானத்தில் நடக்கிறது. காலை 11 மணி முதல் இரவு 9 மணி வரை நடைபெறுகிறது. நூற்றுக்கணக்கான புத்தக அரங்குகள். கோடிக்கணக்கான புத்தகங்கள். தினந்தோறும் மாலை ஆளுமைகளின் உரைகள்.

அட்சயதிருதியைக்கு நகை வாங்குவது போன்ற கதைகளை நம்புவதை விடுத்து புத்தகத்திருவிழாவிற்கு வந்து நல்ல கதைப்புத்தகங்களை வாங்குங்கள். வாழ்க்கையை கொண்டாடுங்கள்.

வீட்டு உபயோகப் பொருள் கண்காட்சி நடந்தால் குடும்பத்தோடு வருபவர்கள் புத்தகத்திருவிழாவிற்கும் வாங்க. வீட்டில் இருக்கிற எல்லா உபயோகப் பொருட்களைக் காட்டிலும் புத்தகந்தான் முக்கியமானது என உணருங்கள்.

வாரம் ஒருமுறை குடும்பத்தோடு உணவகங்கள் சென்று வயிற்றுப்பசியைத் தீர்ப்பவர்கள் புத்தகத்திருவிழாவிற்கு வந்து அறிவுப்பசியையும் கொஞ்சம் தீர்த்துக்கொள்ளுங்கள்.

குழந்தைகளை பெரிய பெரிய ஷாப்பிங்மால்களுக்கு அழைத்துச் செல்வதைவிட புத்தகத்திருவிழாவிற்கு அழைத்துவாருங்கள். நல்ல புத்தகங்கள் உங்கள் குழந்தைகளை நல்ல மனிதர்களாக உருவாக்கும்.

புத்தகங்களின் மேன்மை குறித்து ‘ஊருக்கு நல்லது சொல்வேன்’ என உரத்து தமிழருவி மணியன் சொல்வதை வாசியுங்கள். மதுரைப் புத்தகத்திருவிழாவிற்கு வந்து நிறைய புத்தகங்களை வாங்கி உங்கள் வீட்டு நூலகத்தை நிரப்புங்கள்.

ஒரு புத்தகத்தைப் படிப்பது, ஒரு புதிய நண்பனைப் பெறுவது போன்ற இனிய அனுபவம். அதே புத்தகத்தை மீண்டும் படிப்பது, நெடுநாள் பிரிந்த நெருங்கிய நண்பனைத் திரும்பவும் சந்திப்பது போன்ற சுகமான அனுபவம்.

‘எழுதுகோல் தெய்வம், இந்த எழுத்தும் தெய்வம்’ என்ற பாரதியின் பாதையில் நல்ல லட்சிய வேட்கையுள்ள படைப்பாளிகள் பல்கிப் பெருகினால், இந்தச் சமுதாயத்தைச் சுத்தமாகச் சலவை செய்துவிட முடியும். நல்ல புத்தகங்களைத் தேடிப் படிக்கும் மனோபாவம் மக்களிடையே மலர வேண்டும். புத்தகம் இல்லாத வீடு ஜன்னல் அறை போன்றது. புத்தகங்களின் நடுவில்தான் குழந்தைகள் வளர்க்கப்பட வேண்டும். படிப்பதன் மூலம்தான் அறிவுக்கண் திறக்கும்.

நம்மைச் சிந்திக்கச் செய்யும் புத்தகங்களே நல்ல புத்தகங்கள். இசையின் இனிமை இசையமைப்பவரின் இசைக்குறிப்பில் இல்லை; அதைக் கேட்டுச் சிலிர்க்கும் இதயத்தில் இருக்கிறது. அதே போன்று, புத்தகத்தின் பெருமை அதன் உள்ளடக்கத்தில் இல்லை; அது நமக்குள் உருவாக்கும் உந்துதலில் இருக்கிறது.

புத்தகங்கள் புனிதமானவை. அவை எதிர்பார்ப்புகளுக்காக முகத்துக்கு நேரே எவரையும் முகமலர் செய்வதில்லை. முதுகுக்குப் பின்னால் புறம் பேசுவதும் இல்லை. ஆனால், புத்தகங்களைத் தேர்ந்தெடுப்பதில் நாம் விழிப்புடன் இருக்க வேண்டும். மோசமான புத்தகத்தைவிட நம் நேரத்தைக் களவாடும் தீய திருடன் வேறு ஒருவரும் இல்லை.

ஆங்கில அறிஞர் பேகன் சொல்கிறார்; ‘சில புத்தகங்களைச் சுவைக்க வேண்டும். சிலவற்றை அப்படியே விழுங்கிவிட வேண்டும். சில புத்தகங்களை மட்டும் கொஞ்சம் கொஞ்சமாக அசைபோட்டு ஜீரணிக்க வேண்டும்.

–    தமிழருவி மணியன் ஆனந்தவிகடன், 16.10.2005

புத்தக அலமாரி  தளத்தில் புத்தகங்கள் குறித்து கேசவமணி அவர்கள் தொடர்ந்து சிறப்பாகப் பதிவு செய்து வருகிறார். அவர் படித்த புத்தகங்களைக் குறித்த பதிவை வாசிக்கும்போது நமக்கும் அந்நூல்களின் மீதான ஆர்வம் அதிகமாகிவிடுகிறது. சிறுகதைகள், நாவல்கள், கட்டுரைகள், கவிதைகள், படித்ததில் பிடித்த வரிகள் என ஒவ்வொன்றையும் அவர் சொற்களில் வாசிப்பது அலாதி சுகம் தருவது. புத்தக அலமாரியில் புத்தகங்கள் குறித்து வாசித்துப் பாருங்கள். நல்ல புத்தகங்களை வாங்கி வாசியுங்கள்.

எழுத்தாளர் எஸ்.ராமகிருஷ்ணன் தேர்ந்தெடுத்த சிறந்த 100 புத்தகங்கள், 100 நாவல்கள் பட்டியலை ஐந்தாவது மதுரை புத்தகத்திருவிழாவில் ஆயிரம் பிரதிகள் எடுத்து வழங்கினோம். இது போன்ற பட்டியல்கள் நாம் வாங்க வேண்டிய புத்தகங்களைத் தேர்ந்தெடுக்க உதவும்.

மதுரை புத்தகத்திருவிழா நாட்குறிப்புகள்

வாசிப்புத்திருவிழா

எனக்கு புத்தகம் பிடிக்கும் – உதயசந்திரன்

என்னைச் செதுக்கிய புத்தகங்கள்

நான்மாடக்கூடலில்…

உலகம் ஒரு நிறையாத் தான் ஓர் நிறையாப்  

புலவர் புலக் கோலால் தூக்க, உலகு அனைத்தும்

தான் வாட, வாடாத தன்மைத்தே-தென்னவன் 

நான்மாடக் கூடல் நகர்.   

 – பரிபாடல்

 

நான்மாடக்கூடலில் ஒரு நாடறி நன்மணம்

மதுரை புத்தகத்திருவிழா என்றால் எனக்கு பெருங்கொண்டாட்டமாகயிருக்கும். இம்முறை மதுரை புத்தகத்திருவிழா தொடங்கிய 30.8.2012 அன்று எனது சகோதரருக்குத் திருமணம். இந்த இருநிகழ்வுகளையும் சிறப்பிக்கும் வகையில் திருமணத்தன்று புத்தகம் மற்றும் விதைகள் கொடுக்கலாமென்று மற்ற சகோதரர்கள் எல்லோரும் சேர்ந்து பேசி முடிவெடுத்தோம். மதுரை மற்றும் தமிழின் முக்கிய ஆளுமைகளின் கவிதைகள் & கொஞ்சம் பத்திகளை தேர்ந்தெடுத்து புத்தகமாக போட திட்டமிட்டோம் – “உரிமையுடன் எடுத்தாண்டுள்ளோம். படைத்தவர்களுக்கு நன்றி” என்ற வாசகங்களுடனும், பின்னட்டையில் புத்தகத் திருவிழா குறித்த விளம்பரத்துடனும். மின்தடை & நாட்கள் குறைவு என்பதால் புத்தக வடிவமைப்பு நாங்கள் நினைத்தளவு வரவில்லை. இருந்தாலும் இறுதியில் புத்தகமாக வாங்கி பார்த்தபோது திருப்தியாக இருந்தது. இருபது பக்கத்தில் எல்லோருடைய கவிதை & பத்திகளை தொகுக்க முடியாவிட்டாலும் ஓரளவு வாசிப்பின்  மீதான ஆர்வத்தை எல்லோருக்கும் அந்தப் புத்தகம் கொடுக்கும் என்று நம்புகிறோம். திருமணநாளன்று புத்தகத்தையும் மரம், செடிகளின் விதைகளடங்கிய காகித பையையும் வந்தவர்களுக்கு கொடுத்தோம். நாங்கள் வெளியிட்ட அந்தப் புத்தகத்தை பார்த்து உங்கள் கருத்துகளைச் சொல்லுங்கள்.

View this document on Scribd

தூங்காநகரம்

மதுரையை அல்லும் பகலும் இடைவிடாமல் அங்கயற்கண் அம்மையின் கயல்விழிகள் காத்துக்கொண்டிருக்கின்றன. தாய்வழிச்சமூகத்திலிருந்து மனிதர்கள் வந்ததை மதுரை இன்றும் நிரூபித்துக்கொண்டிருக்கிறது. மதுரைக்கு நான்மாடக்கூடல், கடம்பவனம், திருஆலவாய், விழாமலிமூதூர், கோயில்மாநகரம், தூங்காநகரம், கிழக்கிந்தியநாடுகளின் ஏதென்ஸ் எனப் பல பெயர்கள் உண்டு. தூங்காநகரமான  மதுரையை குறித்த ஒரு நிகழ்வை பகிர்ந்து கொள்கிறேன். ஒருமுறை அலுவல் விசயமாக கோயம்புத்தூரிலிருந்து மதுரை வந்தவரை அழைத்து கொண்டுபோய் தங்கும்விடுதியில் சேர்க்கும் பணியை எனக்கு கொடுத்திருந்தார்கள். நானும் நண்பரும் அவர் வரும்வரை ஆரப்பாளையம் பேருந்துநிலையத்தை சுற்றிக்கொண்டிருந்தோம். அவர் கோவையிலிருந்து இரவு பதினொரு மணியளவில் வந்தார். அங்கிருந்து தங்கும் விடுதி அழைத்து செல்லும் வழியில் அவரிடம் சாப்டீங்களா என்று கேட்டேன். அவர் இல்லையென்றதும் இரவு உணவு வாங்கி கொடுத்து கொண்டு போய்விடலாமென்று நானும் நண்பரும் முடிவு செய்தோம். சாலையோர இட்லிக்கடைக்கு போனால் நள்ளிரவிலும் நல்ல கூட்டம். அந்நேரமும் சூடாக பொடி தோசை, முட்டைதோசை என்று கேட்டு கேட்டு வாங்கி சாப்பிட்டுக் கொண்டிருந்தார்கள். அவருக்கு இட்லி வாங்கினோம். அவர் அந்தக்கடையை ஆச்சர்யமாக பார்த்தது இன்னும் நினைவிலிருக்கிறது. இப்படி மதுரையின் பெருமை சொல்லும் ஒரு நீண்ட கட்டுரை ஏழாம் வகுப்பு இரண்டாம் பருவ  தமிழ்ப்பாட நூலில் வந்துள்ளது. அந்தக் கட்டுரையை வாசித்துப் பாருங்கள்.

View this document on Scribd

அழகுமதுரை என்ற ஒலிஒளிக்காட்சியையும் பாருங்கள்.

http://www.youtube.com/watch?v=FJWkRVy0v_4

THE MULTIPLE FACETS OF MY MADURAI – MANOHAR DEVADOSS

மதுரையை சித்திரமாக பதிவு செய்ய வேண்டுமென்ற ஆவலை என்னுள் விதைத்தது மனோகர் தேவதாஸ் வரைந்த கோட்டோவியங்களே. மதுரை இரண்டாவது புத்தகத்திருவிழா அரங்கின் முகப்பில் மனோகர் தேவதாஸ் வரைந்த கோட்டோவியங்களே இடம்பெற்றிருந்தன. மதுரையின் முக்கியமான இடங்களை அவர் கோட்டோவியமாக வரைந்த THE MULTIPLE FACETS OF MY MADURAI புத்தகத்தை அந்தாண்டு புத்தகத்திருவிழாவில் வாங்கினேன். விலை நானூறு ரூபாய்க்குமேல். அப்போதைய என்னுடைய ஒரு மாதச் செலவுக்கான தொகை. ஒருபக்கம் கோட்டோவியமும் மறுபக்கம் ஆங்கிலத்தில் அந்த இடம் குறித்தும் இடம்பெற்றிருந்தது. படங்களைப் பலமுறை வரைந்து பார்த்தளவு ஆங்கிலத்தில் இருந்ததை வாசிக்கவில்லை. (எனக்கு ஆங்கிலத்தில் கொஞ்சம் வேகமாக & மெதுவாக வாசிப்பது சிரமம்). மதுரை யானைமலை குறித்து மனோகர் தேவதாஸ் எழுதியிருந்த பக்கத்தை ஏழாம் வகுப்பிற்கு பாடமாக வைத்துள்ளார்கள். யானைமலை குறித்து மனோகர்தேவதாஸ் சொன்ன நெஞ்சை அள்ளும் வரிகள். 

View this document on Scribd

அவரது கோட்டோவியத்தை பார்த்து நான் வரைந்த சித்திரத்தை காண்க.

 

மதுரையின் பெருமையை மாணவர்களுக்கு கொண்டு சேர்த்த சமச்சீர் பாடநூல் குழுவிற்கு நன்றி. எனையாளும் மதுரைக்கும் தமிழுக்கும் நன்றி.

வாசிப்புத்திருவிழா

மதுரை திருவிழாக்களின் பூமி. திருவிழா என்றாலே கொண்டாட்டந்தான். மதுரை மீனாட்சியம்மன் கோயிலில் ஆவணித்திருவிழா முடிய தமுக்கத்தில் அறிவுத்திருவிழா தொடங்கியது. ஆகஸ்ட் 30 முதல் செப்டம்பர் 9 முடிய பதினொரு நாட்கள் மதுரை தமுக்கம் மைதானம்  விழாக்கோலம் பூண்டிருந்தது.

புத்தகத்திருவிழாவைக் காணச் செல்வது எனக்கு மிகவும் பிடித்தமான விசயம். தமுக்கத்தினுள் நுழைந்ததும் வரவேற்கும் பதாகைகள், மாலை வேளையில் எழுத்தாளுமைகளின் உரையை கேட்கக் காத்திருக்கும் புதிதாக அமைக்கப்பட்ட மேடை, பெரும்வீதிகளைப் போலமைந்த புத்தகத்திருவிழா அரங்கு, வீதிகளின் இருபுறமும் புத்தகக்கடைகள், அடுக்கிவைத்திருக்கும் லட்சக்கணக்கான புத்தகங்கள், சிறியவர் முதல் பெரியவர்வரை பால்வேறுபாடின்றி புத்தகங்களைப் பார்த்துக் கொண்டிருப்பவர்களையெல்லாம் காணும்போது உற்சாகமாயிருக்கும்.

இதுவரை பார்த்திராத புதிய புத்தகங்கள், பலநாள் தேடியும் கிடைக்காத புத்தகங்கள், வாசித்த புத்தகங்கள், வாசிக்காத புத்தகங்கள் என அங்கிருக்கும் புத்தகங்களைக் காணக் கண்கோடி வேண்டும். இம்முறை எந்த புத்தகத்தை வாங்கலாம் என நமக்குள் ஒரு போராட்டமே நடக்கும். புத்தகத்திருவிழாவில் நமக்கு பிடித்த எழுத்தாளுமைகளைப் பார்க்கும்போது என்ன பேசுவது எனத் தெரியாமல் புன்னகையுடன் கடந்து போவது அல்லது வாங்கிய புத்தகங்களில் அவர்களின் கையொப்பம் வாங்குவது எல்லாம் மகிழ்ச்சியான விசயங்கள்.

புத்தகத்திருவிழா தொடங்கிய அன்று சகோதரனின் திருமணம். அதை முன்னிட்டு நாங்கள் ஒரு புத்தகம் அடித்திருந்தோம். ‘நான்மாடக்கூடலில் ஒரு நாடறி நன்மணம்’ என்ற தலைப்பில் மதுரை, ஆளுமைகளின் பொன்னான வரிகள், கொஞ்சம் கவிதைகள் என பலவற்றையும் தொகுத்து இருபது பக்கத்தில் புத்தகம் அடித்திருந்தோம். பின்னட்டையில் புத்தகத்திருவிழா குறித்தும் விளம்பரம் செய்திருந்தோம். (அந்த புத்தகம் குறித்து தனியொரு பதிவு இடுகிறேன்.)

ஆகஸ்ட் 31 அன்று மதுரை ஏழாவது புத்தகத்திருவிழாவிற்கு முதன்முதலாக சென்றேன். மகிழ்ச்சியாக இருந்தது. ஒவ்வொரு கடையையும் பார்த்துக்கொண்டே நடந்தேன். எதுவும் வாங்கவில்லை. எதேச்சையாக சகோதரனும் வந்திருந்தார். தினமும் மாலை நடக்கும் நிகழ்வுகளை குறித்து வைத்துக்கொண்டு கிளம்பினோம்.

செப்டம்பர் 1 அன்று புதுமணத்தம்பதியருடன் சேர்ந்து பத்துப்பேர் புத்தகத்திருவிழா சென்றோம். நாலு குழுவாக பிரித்து, ஒரு குழுவிற்கு ஐநூறு ரூபாய் புத்தகம் வாங்க சகோதரன் கொடுத்து அனுப்பினார். அன்று நல்ல கூட்டம். நிறைய புத்தகங்கள் வாங்கினோம். அன்று நான் வெகுநாட்களாய் வாங்க நினைத்திருந்த ஜெயமோகனின் ‘காடு’ நாவலை வாங்கினேன்.

செப்டம்பர் 2 அன்று நானும், சகோதரனும் சென்றோம். ஜோ மல்லூரி உரையாற்றிக்கொண்டிருந்தார். மறுநாள் ஒரு திருமணத்திற்கு பரிசளிப்பதற்காக எஸ்.ராமகிருஷ்ணன் எழுதிய ‘வாசகபர்வம்’ நூல் வாங்கினேன். எழுத்தாளர் அ.முத்துக்கிருஷ்ணனையும், தொல்லியல் அறிஞர் சாந்தலிங்கம் அய்யாவையும் உயிர்மை அரங்கில் பார்த்தேன். ஆனந்தவிகடனில் வட்டியும் முதலுமாய் வெளுத்து வாங்கிக் கொண்டிருக்கும் ராஜூமுருகனின் உரையைக் கேட்க அரங்கில் போய் அமர்ந்தோம். கிளப்பிட்டாப்ல.

செப்டம்பர் 4 அன்று நானும் உடன்பணிபுரியும் நண்பரும் சென்றோம். நேஷனல் புக் டிரஸ்டில் சிறுவர்களுக்கான புத்தகங்களான ராஜஸ்தான், முதல் ரயில் பயணம் புத்தகங்கள் வாங்கினேன். அந்த புத்தகத்திலிருந்த படங்கள் மிக அருமையாக வரையப்பட்டிருந்தன.

செப்டம்பர் 5 அன்று ஓவியர் ட்ராட்ஸ்கி மருது, காவல்கோட்டநாயகன் சு.வெங்கடேசன் உரையை கேட்பதற்காக நானும் உடன்பணிபுரியும் நண்பனும் சென்றோம். மிக அற்புதமான உரை. இருவரும் மதுரைக்காரர்கள் என்பதால் மதுரை குறித்த அவர்களது அனுபவங்களை கேட்கும் வாய்ப்பு கிட்டியது.

வண்ணதாசன் சிறுகதை(1962-2012) எழுத வந்து ஐம்பது ஆண்டுகள் ஆனதையொட்டி சந்தியா பதிப்பகமும், மதுரை அமெரிக்கன் கல்லூரியும் இணைந்து வண்ணதாசன் 50 – அந்நியமற்ற நதி என்ற நிகழ்வை செப்டம்பர் 7 அன்று மாலை அமெரிக்கன் கல்லூரியில் நடத்தினர். அருமையான அந்நிகழ்வில் கலந்துகொள்ளும் வாய்ப்பு கிட்டியது.

செப்டம்பர் 9 அன்று நானும் சகோதரனும் சென்றோம். புத்தகத்திருவிழா இறுதிநாள் மற்றும் விடுமுறை நாள் என்பதால் காலையிலேயே நல்ல கூட்டம். ரொம்ப நேரம் சுத்திக் கொண்டிருந்தோம். நேஷனல் புக் டிரஸ்டில் போதிசத்வ மைத்ரேய எழுதிய ‘சிப்பியின் வயிற்றில் முத்து’, ரஷ்கின் பான்ட் எழுதிய ‘ரஸ்டியின் வீரதீரங்கள்’ என்ற மொழிபெயர்ப்பு நூல்களையும், சந்தியா பதிப்பகத்தில் வண்ணதாசனின் கடிதத் தொகுப்பான ‘சில இறகுகள் சில பறவைகள்’ புத்தகத்தையும், பாரதி புத்தகாலயத்தில் ஆ.சிவசுப்ரமணியன் எழுதிய ‘பிள்ளையார் அரசியல்’, ச.தமிழ்ச்செல்வனின் ‘வ.உ.சி.யின் சுதேசிக் கப்பலும் தொழிற்சங்க இயக்கமும்’, முகில் எழுதிய ‘நாமும் நமது கலைகளும்’ என்ற புத்தகங்களை வாங்கினேன். சகோதரன் ச.தமிழ்ச்செல்வன் கதைகள் நூலையும், யுவன் சந்திரசேகர் எழுதிய மணற்கேணி கதைத்தொகுப்பையும், பெரியார் எழுதிய பெண் ஏன் அடிமையானாள்? என்ற புத்தகத்தையும் வாங்கினார்.

புத்தகத்திருவிழாவிற்கு செல்ல முடியாத விடுபட்ட  கொஞ்ச நாட்களை மேகம் கருத்து மிரட்டி என்னை வீட்டுக்கு அனுப்பியது. திருவிழா என்றாலே மழை வந்துவிடும் அல்லது மழை பெய்தாலே திருவிழாதான். இந்த வருட புத்தகத்திருவிழாவின் போதும் மழைவாசகன் வந்து கொஞ்சம் வாசித்துப் போனான்.

மணா தொகுத்த ‘கமல் நம் காலத்து நாயகன்’ என்ற புத்தகத்தை வாங்கலாமென்று நினைத்தேன். பணம் பத்தவில்லை. அதில் கமல்ஹாசன் குறித்து பண்பாட்டு ஆய்வாளர் தொ.பரமசிவன், இசை அறிஞர் மம்மது எல்லாம் எழுதியிருப்பதை பார்த்தேன். அந்த புத்தகத்தை பார்த்துக்கொண்டிருந்த போது மம்மது ஐயா உயிர்மையரங்கில் இருந்தார். ஆச்சர்யமாகயிருந்தது. அவருடன் எதாவது பேசலாமென்று ஆசைதான். ஆனால், எனக்கு பாட்டுக் கேட்கப் பிடிக்கும். மற்றபடி இசை குறித்து ஒன்றும் தெரியாது. எனவே மௌனமாக கடந்துவிட்டேன்.

நற்றினை பதிப்பகத்தில் சிங்காரம் எழுதிய ‘புயலிலே ஒரு தோணி’, ‘கடலுக்கு அப்பால்’ நாவல்களை அருமையாக பதிப்பித்திருக்கிறார்கள். கிழக்கு பதிப்பகத்தில் ‘வண்ணநிலவன் கதைகள்’ முழுத்தொகுப்பையும் வாங்க நினைத்தேன். நானூறு ரூபாய். டிசம்பர் மாசம் பார்த்துக் கொள்ளலாம். அதுவரை வாங்கிய நூல்களை வாசிப்போம் என்று வந்து விட்டேன்.

ஐந்தாவது புத்தகத்திருவிழாவின் போது எழுத்தாளர் எஸ்.ராமகிருஷ்ணன் தொகுத்த சிறந்த நூறு புத்தகங்கள், சிறந்த நூறு நாவல்கள் குறித்த பட்டியலை ஆயிரம் பிரதிகள் எடுத்து வழங்கினோம். ஆறாவது புத்தகத்திருவிழாவிற்கு நூறு பதாகைகள் அடித்தோம். ஏழாவது புத்தகத்திருவிழாவில் சகோதரன் திருமண விழாவிற்கு வழங்கிய புத்தகத்தில் புத்தகத்திருவிழா குறித்து விளம்பரம் செய்தோம்.

இனி எட்டாவது புத்தகத்திருவிழாவை நண்பர்கள் மற்றும் சகோதரர்கள் ஒத்துழைப்புடன் இன்னும் சிறப்பாக கொண்டாட நிறைய பணிகள் காத்திருக்கின்றன. குறிப்பாக மதுரையிலுள்ள எல்லா கிராமங்களிலும் புத்தகத்திருவிழா குறித்து விழிப்புணர்வு ஏற்படுத்துவது நமது முக்கிய கடமையென நினைக்கிறேன்.

புத்தகத்திருவிழாவில் ராஜூமுருகன், ட்ராட்ஸ்கி மருது, சு.வெங்கடேசன் மற்றும் வண்ணதாசன் 50 விழா நிகழ்வுகளை தனிப்பதிவாகயிடுகிறேன்.

தென்மாவட்டங்களின் மேல் லேசாகப் படிந்திருக்கும் சாதிக் கறையை புத்தகத்திருவிழாவால்தான் மாற்ற முடியும். எல்லோரும் கொண்டாடுவோம்.